சென்னை – பெங்களூரூ தேசிய நெடுஞ்சாலைக்கு நிலம் கையகப்படுத்திய விவகாரத்தில் போலி ஆவணங்களுக்கு இழப்பீடு வழங்கப்பட்டது தொடர்பான வழக்கில் விரைவில் குற்றப்பத்திரிக்கை தாக்கல் செய்யப்படும் என்று சென்னை உயர்நீதிமன்றத்தில் சிபிசிஐடி காவல்துறை தெரிவித்துள்ளது.
போலி ஆவணங்களுக்கு இழப்பீடு வழங்கிய விவகாரம்!
சென்னை – பெங்களூரூ தேசிய நெடுஞ்சாலை திட்டத்திற்காக காஞ்சிபுரம் மாவட்டம் ஸ்ரீபெரும்புதூர் அருகே உள்ள கிராமங்களில் நிலம் கையகப்படுத்தப்பட்டபோது, நிலங்களுக்கு போலி ஆவணங்களை சமர்ப்பித்தவர்களுக்கு 20 கோடியே 52 லட்சம் ரூபாய் இழப்பீடு வழங்கிய அதிகாரிகள் மீது நடவடிக்கை எடுக்கக் கோரி ராஜேந்திரன் என்பவர் உயர் நீதிமன்றத்தில் நீதிமன்ற அவமதிப்பு வழக்கு தாக்கல் செய்திருந்தார்.
கைது படலம்!
மோசடி தொடர்பாக சிபிசிஐடி போலீசார் இரு வழக்குகளை பதிவு செய்து, 15 பேரை கைது செய்துள்ளனர். புலன் விசாரணை நடந்து வருகிறது.
வழக்கு கடந்த முறை நீதிபதி சுரேஷ்குமார் முன் இந்த வழக்கு விசாரணைக்கு வந்த போது, சிபிசிஐடி சார்பில் அறிக்கை தாக்கல் செய்யப்பட்டது.
சிபிசிஐடிக்கு நீதிபதி கண்டனம்!
அறிக்கையை படித்து பார்த்த நீதிபதி விசாரணையில் எந்த முன்னேற்றமும் இல்லை என்று அதிருப்தி தெரிவித்தார். சிபிசிஐடி அதிகாரிகள் மந்தமான முறையில் செயல்படுவதாக நீதிபதி கண்டனம் தெரிவித்திருந்தார்..
நத்தை வேகத்தில் செயல்பட்டால் வழக்கின் விசாரணையை சிபிஐ-க்கு மாற்ற நீதிமன்றம் தயங்காது எனவும் குறிப்பிட்டிருந்தார். சரியான திசையில் திறமையாக விசாரணை நடத்தி அறிக்கை தாக்கல் செய்ய சிபிசிஐடி-க்கு இறுதி வாய்ப்பாக ஒருவார காலம் அவகாசம் வழங்கி இருந்தார்.
மீண்டும் விசாரணை!
இந்த நிலையில் வழக்கு நீதிபதி சுரேஷ் குமார் முன்பு இன்று மீண்டும் விசாரணைக்கு வந்தது. அப்போது கூடுதல் குற்றவியல் வழக்கறிஞர் ராஜ் திலக் ஆஜராகி, சிபிசிஐடி போலீசாரின் விசாரணை இறுதிக்கட்டத்தில் உள்ளதாகவும், இந்த வழக்கில் அரசு அதிகாரிகள் சம்பந்தப்பட்டுள்ளதால் அவர்கள் மீது குற்றப்பத்திரிக்கை தாக்கல் செய்ய அரசிடம் அனுமதி கேட்டுள்ளதாகவும் தெரிவித்தார்.
அனுமதி கிடைத்தவுடன் விரைவில் குற்றப்பத்திரிக்கை தாக்கல் செய்யப்படும் என்றும் உறுதி அளித்தார். இதை பதிவு செய்து கொண்ட நீதிபதி வழக்கு விசாரணை மார்ச் 29ஆம் தேதிக்கு தள்ளிவைத்தார்.