மதுரை சூப்பர் சரவணா ஸ்டோர்ஸின் 9ஆவது தளத்தில் தீ விபத்து ஏற்பட்டது. இதனால் மக்கள் அலறி அடித்துக் கொண்டு வெளியேறினர்.
கடந்த சில மாதங்களுக்கு முன்பு மாட்டுத்தாவணி அருகே சூப்பர் சரவணா ஸ்டோர் 10 மாடி கட்டிடத்துடன் மிகவும் பிரம்மாண்டமாக திறக்கப்பட்டது. எல்லா பகுதிகளிலும் இருப்பதுபோல் எல்லா பொருட்களும் கிடைக்கும் வகையில் செயல்பட்டு வருகிறது.
இந்நிலையில் இன்று பிற்பகல் 3 மணியளவில் 9ஆவது தளத்தில் திடீரென தீ விபத்து ஏற்பட்டது. கரும்புகை வெளியேறியதால் தளத்தில் இருந்த மக்கள் அலறி அடித்துக் கொண்டு வெளியேறினர். உடனடியாக தீயணைப்புத்துறைக்கு தகவல் தெரிவிக்கப்பட்டது.
40க்கும் அதிகமான தீயணைப்பு வீரர்கள் தீயை அணைக்கும் பணியில் ஈடுபட்டனர். அவசர உதவிக்காக ஆம்புலன்ஸ் வாகனங்களும் வரவழைக்கப்பட்டன. காற்று பலமாக வீசுவதால் தீயை கட்டுப்படுத்துவதில் சிரமம் ஏற்பட்டுள்ளது.
சரவணா ஸ்டோர்ஸில் தீ விபத்து ஏற்பட்டதன் காரணமாக அப்பகுதியில் பரபரப்பான சூழல் ஏற்பட்டுள்ளது. புகையால் உடல்நலம் பாதிக்கப்பட்டவர்கள் மருத்துவமனையில் அனுமதிக்கப்பட்டுள்ளனர்.
newstm.in