ரஜினிகாந்தின் 170ஆவது திரைப்பட அறிவிப்பு தமிழக அரசியலிலும் அதிர்வலைகளை ஏற்படுத்தும் என்கிறார்கள்.
ரஜினிகாந்த் நடிப்பில் ஜெயிலர் திரைப்படம் உருவாகி வரும் நிலையில் அடுத்த படத்திற்கான அறிவிப்பை லைகா நிறுவனம் வெளியிட்டது.
ரஜினிகாந்தின் 170ஆவது படமான அதற்கு இன்னும் பெயரிடப்படவில்லை. லைகா நிறுவனம் தயாரிக்கிறது. தர்பார், பேட்ட திரைப்படங்களைத் தொடர்ந்து இந்த படத்திலும் அனிருத் இசையமைக்கிறார். ஜெய் பீம் திரைப்படத்தை இயக்கிய செ.த.ஞானவேல் இயக்குகிறார்.
ரஜினிகாந்த் கடந்த சில ஆண்டுகளாக இளம் இயக்குநர்களுக்கு தொடர்ந்து வாய்ப்பு வழங்கி வருகிறார். அந்த வகையில் ஞானவேல் இரண்டாவது படத்திலேயே ரஜினிகாந்தோடு இணைந்து பணியாற்றும் வாய்ப்பை பெற்றுள்ளார். ஜெய்பீம் திரைப்படம் ஓடிடி தளத்தில் வெளியாகி தமிழ் ரசிகர்களிடம் நல்ல வரவேற்பை பெற்றது. விமர்சன ரீதியாகவும் முக்கியத்துவம் வாய்ந்த படமாக பார்க்கப்பட்டது.
எனவே ஞானவேல் – ரஜினிகாந்த கூட்டணியில் உருவாகும் இந்த புதிய திரைப்படத்தை திரைத்துறையைச் சேர்ந்தவர்களும், ரசிகர்களும் எதிர்பார்க்கத் தொடங்கிவிட்டனர். ஆனால் இந்த திரைப்பட அறிவிப்பு பாட்டாளி மக்கள் கட்சி வட்டாரத்தில் சலசலப்பை உருவாக்கியுள்ளது.
ஜெய் பீம் திரைப்படத்தில் காவல்துறை அதிகாரி கதாபாத்திரம் கொடூர வில்லத் தன்மை வாய்ந்ததாக படைக்கப்பட்டிருக்கும். அந்த கதாபாத்திரம் தனது வீட்டில் போனில் பேசிக்கொண்டிருக்கும் போது பின்னால் சுவரில் வன்னியர் சமூகத்தை குறிக்கும் அக்னி சட்டி படம் போட்ட காலண்டர் மாட்டப்பட்டிருக்கும். ‘உண்மைக் கதையை எடுப்பதாக கூறியுள்ள இயக்குநர் நிஜத்தில் அந்த காவல்துறை அதிகாரி வன்னியர் சமூகத்தை சாராதவர் என்றபோதும் வன்னியர்களை இழிவுபடுத்தும் விதமாக அக்னிசட்டியை பயன்படுத்தியுள்ளார்’ என்று எதிர்ப்பு கிளம்பியது.
பாமக அதற்கு கண்டனம் தெரிவித்தது. அதுமட்டுமல்லாமல் அந்த திரைப்படத்தில் நடித்த சூர்யாவின் திரைப்படங்களை புறக்கணிக்க வேண்டும் என்று பிரச்சாரத்தையும் முன்னெடுத்தனர்.
இந்நிலையில் ரஜினிகாந்தின் திரைப்படத்தை இயக்கும் வாய்ப்பு ஞானவேலுக்கு கிடைத்துள்ளது. படத்தை லைகா நிறுவனம் தயாரிக்கிறது. லைகா நிறுவனத்தின் தலைமை பொறுப்பாளராக இருப்பவர் தமிழ் குமரன். இவர் பாமகவின் முன்னாள் இளைஞரணித் தலைவர் ஆவார். முன்னாள் தலைவர் ஜி.கே.மணியின் மகனும் கூட. நம் கட்சியைச் சேர்ந்த ஒருவர் உயர் பொறுப்பில் இருக்கும் போதே அந்த இயக்குநருக்கு எப்படி வாய்ப்பு வழங்கலாம் என்று பாமகவினர் அதிருப்தி தெரிவித்து வருகின்றனர்.
இது தொடர்பாக பாமக தலைவர் அன்பு மணி ராமதாஸையும் நேரில் சந்தித்து வலியுறுத்த பாமக நிர்வாகிகள் திட்டமிட்டுள்ளனர்.
அன்புமணி ராமதாஸுக்கும் தமிழ் குமரனுக்கும் இடையே ஏற்கெனவே பனிப்போர் நிலவியதாக சொல்கிறார்கள் பாமக வட்டாரத்தில். பாமக தலைவராக இருந்த ஜி.கே.மணியை மாற்றிவிட்டு அந்த பதவிக்கு
அன்புமணி ராமதாஸ்
கொண்டு வரப்பட்டார். அதைத் தொடர்ந்து அன்புமணி வகித்து வந்த இளைஞரணித் தலைவர் பதவி ஜி.கே.மணியின் மகன் தமிழ் குமரனிடம் வழங்கப்பட்டது.
ஜி.கே.மணி மற்றும் அவரது மகன் தமிழ் குமரன் ஆகியோர் பாமக நிறுவனர் ராமதாஸின் ஆதரவாளர்களாக பார்க்கப்படுகின்றனர். இளைஞரணித் தலைவர் பதவி தமிழ் குமரனிடன் சென்றது அன்புமணிக்கு உடன்பாடில்லை என்றும் கூறுகிறார்கள். அதன் தொடர்ச்சியாக தமிழ் குமரனும் தனது கட்சிப் பொறுப்பிலிருந்து விலகினார்.
இந்த சூழலில் அவர் தலைமை பொறுப்பாளராக இருக்கும் லைகா நிறுவனம் ஞானவேல் இயக்கத்தில் திரைப்படம் தயாரிப்பதை காரணம் காட்டி மீண்டும் தமிழ் குமரனை கட்டம் கட்ட திட்டம் தீட்டப்படுவதாகவும் சொல்கிறார்கள்.
பாமக ரஜினிகாந்த் திரைப்படத்திற்கு வெளிப்படையாக எதிர்ப்பு தெரிவிக்க தயாராகும் சூழல் உருவாவதாகவும் கூறுகிறார்கள். பாபா திரைப்படத்தின் போது ரஜினிகாந்த் புகைபிடிக்கும் காட்சிகளை பாமக கடுமையாக விமர்சித்தது. இதனால் ரஜினிகாந்த் தரப்புக்கும் பாமகவுக்கும் கருத்து மோதல் ஏற்பட்டது. பாபா திரைப்படத்தின் படப்பெட்டிகள் வட மாவட்டங்களில் சில இடங்களில் பாமகவினரால் தூக்கிச் செல்லப்பட்ட சம்பவங்களும் அரங்கேறின.
ரஜினிகாந்தின் 170ஆவது திரைப்படம் இன்று தான் அறிவிக்கப்பட்டுள்ள நிலையில் இதற்கு பாமக சார்பில் எதிர்ப்பு தெரிவிக்கப்படுமா, அரசியலிலும், திரைத்துறையிலும் சலசலப்பு உருவாகுமா என்பதெல்லாம் இனி வரும் நாள்களில் தெரியவரும்.