அம்மா ஜெயலலிதா குறித்து இனியும் தவறாக பேசினால், அண்ணாமலை வெளியில் நடமாட முடியாது என புகழேந்தி தெரிவித்துள்ளார்.
அதிமுக பாஜக இடையே மோதல் வலுத்துவருகிறது. பாஜகவின் ஐடி விங் தலைவர் சிடிஆர் நிர்மல்குமார் அதிமுகவில் இணைந்து மோதலுக்கு முதல் புள்ளியை வைத்தார். அதைத் தொடர்ந்து 10க்கும் மேற்பட்ட நிர்வாகிகள் பாஜகவில் இணைந்தனர். இதனால் அதிமுக பாஜக இடையே மோதல் முற்றியது. எடப்பாடி பழனிச்சாமி உருவபடத்தை பாஜகவினர் எரிக்கை, அண்ணாமலையின் படத்தை அதிமுகவினர் எரித்தனர்.
தொடர்ந்து நிர்வாகிகள் வெளியேறுவது குறித்து செய்தியாளர்களிடம் பேசிய அண்ணாமலை, ஜெயலலிதா போல் நானும் ஒரு தலைவர், நான் இப்படித்தான் இருப்பேன் என பேசினார். அதைத் தொடர்ந்து தன்னை ஜெயலலிதாவுடன் ஒப்பிட்டு பேசியதாக அண்ணாமலைக்கு எதிராக அதிமுகவினர் கொந்தளித்தனர்.
அதைத் தொடர்ந்து இது தொடர்பாக விளக்கம் அளித்த அண்ணாமலை, “நான் கூறிய கருத்தில் இருந்து பின் வாங்க போவது இல்லை. அதே நிலைப்பாட்டில் தான் இருக்கிறேன். ஜெயலலிதாவை ஒப்பிட்டு நான் கூறவில்லை. ஜெயலலிதா கூட டெபாசிட் இழந்து மீண்டும் களத்தில் வெற்றி பெற்றிருக்கிறார். என் தாய் என் மனைவி ஆகியோர் ஜெயலலிதாவை விட பலம் கொண்டவர்கள்” என்று கூறினார். அண்ணாமலையின் இந்த பேச்சும் அதிமுக வட்டாரத்தில் பெரும் சலசலப்பை ஏற்படுத்தியது.
இந்தநிலையில் கிருஷ்ணகிரி மாவட்டம் ஒசூரில் அதிமுகவின் ஓபிஎஸ் ஆதரவாளர் பெங்களூர் வா.புகழேந்தி பத்திரிகையாளர்களை சந்தித்தார். அப்போது அவர் பேசுகையில், ”அண்ணாமலைக்கு என்ன ஆச்சுனு தெரியவில்லை, அவருக்கு மென்டலி பிராப்ளம்னு பேசிக்குறாங்க. ஜெயலலிதாவை விட என்னோட தாய் 100 மடங்கு, மனைவி 1000 மடங்கு உயர்ந்தவர் என்கிறார். இவரை யார் கேட்டது, காவலர்களும் அம்மாவை தெய்வமாக மதிக்கிறார்கள்.
உலக மகளிர் தினம் கொண்டாடும் நேரத்தில் பெண்களை இழிவுபடுத்தும் மாதிரி பேசுகிறார். உங்கள் தாயை பற்றி தரக்குறைவாக நான் பேசும் அளவிற்கு நான் தரம் கெட்டவன் இல்லை. உங்கள் மனைவியை நான் சகோதரியாக பார்க்க கூடியவன்.
ஒருவாரமாக பார்த்தீர்கள் என்றால் அண்ணாமலை கோஷ்டியும் எடப்பாடி கோஷ்டியும் பயங்கரமாக மோதிக்கொண்டு இருக்கிறார்கள். அண்ணாமலை போன்ற நிறைய ஐபிஎஸ் அலுவலரோடு நான் பழகியிருக்கிறேன். ஓபிஎஸ் அல்லது வேறு யாராவது பாஜகவை பேசினார்களா?. அம்மாவை தவறாக பேசிய விவகாரம் கர்நாடகா மாநிலத்தில் செய்தி பரவினால், சட்டமன்ற தேர்தலில் பாஜக தோற்றுவிடும். அங்குள்ள தமிழர்கள் மதிக்கவே மாட்டார்கள்.
உங்களை கீழ்பாக்கத்திலோ அல்லது பெங்களூர் நிமான்சிலோ பரிசோதித்துக்கொள்ளுங்கள். அம்மா ஜெயலலிதா இருந்தபோது பேசியிருந்தால் காணாமல் போயிருப்பீர்கள். மத்தியில் பாஜகவை ஆட்சியில் அமர வைத்ததும், ஆட்சியை கவிழ்த்ததும் அம்மாதான். அண்ணாமலை பண்பாட்டை கற்றுக்கொள்ளுங்கள், உங்களுக்கு நாவடக்கம் தேவை. நேற்று அதிமுக கூட்டத்தில் கலந்துக்கொண்ட ஜெயக்குமார், முதலில் பாஜகவை திட்டியும் கூட்டத்திற்கு பிறகு பாஜக உடன் கூட்டணி தொடரும் என்கிறார். இபிஎஸ் உடன் இருக்கும் அனைவரும் அறை மென்டல்கள், முழு மென்டல்களாக உள்ளனர்.
அண்ணாமலைக்கு கடைசி எச்சரிக்கை அம்மா, எம்ஜிஆர் குறித்து பேசினால் இனி வெளியில் நடமாட முடியாது. இபிஎஸ் தலைமையில் சந்தித்த உள்ளாட்சி, நகர்புறம், சட்டமன்றம், நாடாளுமன்றம் மற்றும் இடைத்தேர்தல் என அனைத்து தேர்தல்களிலும் தோல்வியை தழுவியுள்ளார். டேக்கிட் இட் ஈஸி பாலிசி என்று எடப்பாடி இருக்கிறார். ஓபிஎஸ் என்கிற ஒருங்கிணைப்பாளர் இல்லாமல் அதிமுக எதிலும் வெற்றி பெற முடியாது. அதிமுக வேட்பாளரின் வார்டிலேயே வாக்குகள் பெற முடியவில்லை’’ என்றார்.