தமிழ்நாடு மற்றும் புதுச்சேரியில் நேற்று முதல் பிளஸ் 2 பொதுத்தேர்வு தொடங்கியது. இந்த தேர்வு ஏப்ரல் 3-ம் தேதி வரை நடைபெறவுள்ளது. 3,225 மையங்களில் 8.75 லட்சம் மாணவ, மாணவிகள் எழுதுகின்றனர். இந்நிலையில், தமிழகத்தில் நேற்று தொடங்கிய முதல் பாடமாக தமிழ் மொழி தாளை 50,674 மாணவர்கள் எழுதாமல் புறக்கணித்திருப்பது அதிர்ச்சியை ஏற்படுத்தியுள்ளது.
தமிழகத்தில் தேர்வு எழுதிய 8.51 லட்சம் பேரில் 50,674 மாணவர்கள் தமிழ் மொழி முதல் தேர்வுக்கு ஆப்செனட்டாகியிருப்பது பள்ளிக்கல்வித்துறையின் கவனத்தை ஈர்த்துள்ளது. இது குறித்து பள்ளிக் கல்வித் துறை அதிகாரிகள் கூறுகையில், ஒவ்வொரு ஆண்டும் இந்த தேர்வின் போது 4-5% மாணவர்கள் ஆப்சென்ட் ஆகிறார்கள் என்று தெரிவித்தனர். இந்த நிலையில், தமிழ் மொழிப் பாடத்தாள் தேர்வை எழுதாத மாணவர்களுக்கு கவுன்சிலிங் வழங்க வேண்டும் என்று பாமக தலைவர்
வலியுறுத்தியுள்ளார்.
இதுகுறித்து அவர் பதிவிட்டுள்ள ட்வீட்டில், தமிழ்நாட்டில் நேற்று தொடங்கிய 12-ஆம் வகுப்பு தேர்வுகளில் தமிழ் மொழிப்பாடத் தாளை 50,674 மாணவர்கள் எழுதவில்லை என்று செய்திகள் வெளியாகியிருக்கின்றன. மொத்த மாணவர்களில் சுமார் 7% மாணவர்கள் தேர்வை எழுதாதது இதுவே முதல் முறை. இது அதிர்ச்சியளிக்கிறது.
கரோனா பாதிப்பு காரணமாக பத்தாம் வகுப்பு பொதுத்தேர்வுகளை எழுதாதது, தொடர்ந்து வகுப்புகள் நடத்தப்படாதது போன்றவற்றால் ஏற்பட்ட அச்சம் ஆகியவை தான் பெரும்பான்மையான 12-ஆம் வகுப்பு மாணவர்கள் முதல் தேர்வையே எழுதாததற்கு காரணம் என்று உளவியல் வல்லுநர்கள் கூறுகின்றனர்.
அச்சம் காரணமாக அடுத்து வரும் தேர்வுகளையும் இந்த மாணவர்கள் எழுதாமல் இருப்பதற்கு வாய்ப்புள்ளது. அது அவர்களின் எதிர்காலத்தை கடுமையாக பாதிக்கும் என்பதால், இந்தப் போக்கிற்கு முடிவு கட்ட தமிழக அரசின் கல்வித் துறை நடவடிக்கை மேற்கொள்ள வேண்டும்.
தமிழ் மொழிப் பாடத்தாள் தேர்வை எழுதாத மாணவர்களின் பட்டியலை வட்ட அளவில் தயாரித்து, அந்த மாணவர்களுக்கு உளவியல் கலந்தாய்வு வழங்க வேண்டும். அதன் மூலம் அவர்கள் அடுத்து வரும் தேர்வுகளை தவறாமல் எழுதுவதை அரசு உறுதி செய்ய வேண்டும்” என்று அவர் கூறியுள்ளார்.