வேலூர் மாவட்டத்தில் வங்கியில் நகையை அடமானம் வைக்க வந்த நபரை பின்தொடர்ந்து வந்து, 15 சவரன் நகையை கொள்ளையடித்து சென்றவர்களை சிசிடிவி பதிவுகளை வைத்து போலீசார் கைது செய்துள்ளனர்.
கடந்த 7ஆம் தேதி வேலப்பாடி ஆரணிசாலையில் உள்ள வங்கியில் நகையை அடமானம் வைக்க வந்த லோகோஷ்குமார் என்பவர், தேவையான அளவு பணம் கிடைக்காததால் அதனை திருப்பி எடுத்துச்சென்றுள்ளார்.
இதனை நோட்டமிட்ட கொள்ளையர்கள் வங்கி வாசலிலேயே வைத்து நகை பையை பறித்துக்கொண்டு தப்பிச்சென்றுள்ளனர். இரண்டு பைக்குகளில் நான்கு பேர் வந்த நிலையில், ஒரு பைக் விபத்தில் சிக்கியதால் அதனை அங்கேயே விட்டுவிட்டு தப்பியோடியுள்ளனர்.
பைக்கை பறிமுதல் செய்த போலீசார், தீவிர விசாரணை மேற்கொண்டு கொள்ளையர்களை தேடிவந்தனர். இந்நிலையில், கொள்ளை சம்பவம் தொடர்பாக செந்தில் ஈஸ்வரன், ராஜசேகர் ஆகியோரை சேலத்தில் கைது செய்து நகையை மீட்ட போலீசார், தப்பியோடிய சுதாகர் என்பவரை தேடிவருகின்றனர்.