நாடாளுமன்றத்தில் பட்ஜெட் கூட்டத்தொடரின் இரண்டாவது அமர்வு கடந்த மூன்று நாட்களாக நடைபெற்று வருகிறது. ஆனால் எதிர்க்கட்சிகளின் தொடர் அமளியால் ஆரோக்கியமான விவாதம் ஏதுமின்றி அவை தொடர்ந்து ஒத்திவைக்கப்பட்டு வருகிறது. இதனால் மக்களின் வரிப்பணம் கோடிக்கணக்கில் வீணாவதாக பல்வேறு தரப்பினரும் வேதனை தெரிவித்து வருகின்றனர்.
அதானி குழும முறைகேடு
இந்நிலையில் அதானி முறைகேடு தொடர்பாக அமலாக்கத்துறை உரிய விசாரணை நடத்த வேண்டும் என்று எதிர்க்கட்சிகள் கோரிக்கை விடுத்து வருகின்றன. கடந்த ஜனவரி மாதம் ஹிண்டன்பர்க் அறிக்கை வெளியான நிலையில், உலக பணக்காரர்களில் முன்னணியில் இருக்கும் அதானி, தனது குழும நிறுவனங்கள் மூலம் பங்குச்சந்தையில் மிகப்பெரிய முறைகேட்டில் ஈடுபட்டார்.
எதிர்க்கட்சி எம்.பிக்கள் பேரணி
வெளிநாடுகளில் போலியான நிறுவனங்களை கணக்கு காட்டியுள்ளார். இதன்மூலம் பல ஆயிரம் கோடி ரூபாய் வங்கிகளில் கடன் பெற்றிருப்பதாக அதிர்ச்சியூட்டும் தகவல்கள் வெளியாகின. இதுதொடர்பாக நாடாளுமன்றத்தில் இருந்து அமலாக்கத்துறை அலுவலகம் வரை பேரணியாக செல்ல எதிர்க்கட்சி எம்.பிக்கள் முடிவு செய்தனர். இந்த விவகாரத்தில் அனைத்து எதிர்க்கட்சி தலைவர்களும் கைகோர்த்து செயல்பட வேண்டும்
விரிவான ஆலோசனை
என்று நாடாளுமன்றத்தில் எதிர்க்கட்சி தலைவரும், மாநிலங்களவை எம்.பியுமான மல்லிகார்ஜுன கார்கே அறையில் இன்று காலை நடந்த கூட்டத்தில் அறிவுறுத்தப்பட்டது. பேரணி குறித்தும் விரிவான ஆலோசனை நடத்தினர். அதன்படி, இன்று நண்பகல் 12.30 மணிக்கு நாடாளுமன்ற வளாகத்தில் எதிர்க்கட்சி எம்.பிக்கள் புறப்படுகின்றனர். இதில் பல்வேறு எதிர்க்கட்சி தலைவர்கள் கலந்து கொள்வது குறிப்பிடத்தக்கது.
மனு அளிக்க திட்டம்
நேராக அமலாக்கத்துறை அலுவலகம் சென்று எம்.பிக்கள் கையெழுத்திட்ட மனு ஒன்றை அளிக்கவுள்ளனர். அதில் அதானி விவகாரத்தில் உரிய விசாரணை நடத்தப்பட வேண்டும் என வலியுறுத்தப்படும். இதன்மூலம் அதானி முறைகேடு – ஹிண்டன்பர்க் அறிக்கை விவகாரத்தில் நாடாளுமன்ற கூட்டுக் குழுவை (JPC) அமைத்து உரிய விசாரணைக்கு உட்படுத்த வேண்டும் என்ற கோரிக்கை வலுக்க தொடங்கியுள்ளது.
பலத்த பாதுகாப்பு
இந்நிலையில் நாடாளுமன்றத்திற்கு வெளியே பலத்த போலீஸ் பாதுகாப்பு போடப்பட்டுள்ளது. இதனால் எதிர்க்கட்சி எம்.பிக்கள் ஒன்று கூடி அமலாக்கத்துறை அலுவலகம் நோக்கி பேரணியில் ஈடுபட முடியாத நிலை ஏற்பட்டுள்ளது. தடையை மீறி ஈடுபட்டால் கைது நடவடிக்கை எடுக்கப்படும். இதற்காக ஏராளமான போலீசார் குவிக்கப்பட்டிருப்பதால் பரபரப்பான சூழல் காணப்படுகிறது.
உச்ச நீதிமன்ற உத்தரவு
அதானி குழும முறைகேடுகள் தொடர்பாக உச்ச நீதிமன்றத்தில் பல்வேறு வழக்குகள் தொடரப்பட்டுள்ளன. இவற்றை விசாரித்த தலைமை நீதிபதி சந்திரசூட், அதானி குழுமம் முறைகேட்டில் ஈடுபட்ட விவகாரம் குறித்து கண்டிப்பாக உரிய உத்தரவு பிறப்பிக்கப்படும். ஓய்வுபெற்ற நீதிபதி தலைமையில் விசாரணை குழு ஒன்று அமைக்கப்படும் என உத்தரவு பிறப்பித்திருந்தார்.