நாடாளுமன்றத்தில் பட்ஜெட் கூட்டத்தொடரின் இரண்டாவது அமர்வு தற்போது நடைபெற்று வருகிறது. இந்நிலையில் மதிமுக எம்.பி வைகோ, திமுக எம்.பி சண்முகம் ஆகியோர் இ.சி.ஆர் சாலை தொடர்பாக எழுப்பிய கேள்விக்கு மத்திய சாலை மற்றும் நெடுஞ்சாலைத் துறை அமைச்சர் நிதின் கட்கரி பதிலளித்துள்ளார். அதில், மாமல்லபுரம் முதல் கன்னியாகுமரி வரை நான்கு வழிச் சாலையாக மாற்றப்பட உள்ளது.
இ.சி.ஆர் சாலை விரிவாக்கம்
இதன் மொத்த தூரம் 697 கிலோமீட்டர் என்பது குறிப்பிடத்தக்கது. இதற்காக 24,435 கோடி ரூபாய் நிதி ஒதுக்கீடு செய்யப்படும். அதேசமயம் தூத்துக்குடி – திருச்செந்தூர் – கன்னியாகுமரி ஆகியவற்றுக்கு இடையிலான சாலைப் பணிகள் மட்டும் மாநில நெடுஞ்சாலைத் துறையிடம் ஒப்படைக்கப்பட்டுள்ளது. இந்த பகுதியில் 2024ஆம் ஆண்டு பணிகள் முழுமை பெறும் எனத் தகவல்கள் தெரிவிக்கின்றன.
மாநில நெடுஞ்சாலைத் துறை
இதேபோல் திருவான்மியூர் – மாமல்லபுரம் இடையிலான சாலை விரிவாக்கப் பணிகளையும் மாநில நெடுஞ்சாலைத் துறை அமைச்சகம் கையாளும் எனக் கூறப்பட்டுள்ளது. இ.சி.ஆர் சாலை விரிவாக்கத்தில் சரக்கு போக்குவரத்திற்கு தனி வழி, தடுப்புகள், பாலங்கள், கீழ் வழிச் சாலைகள் உள்ளிட்டவை இடம்பெற உள்ளன. இதுதொடர்பாக விரிவான திட்ட அறிக்கை தயாரிக்கப்பட்டு செயல்படுத்தப்படும்.
பல்வேறு வசதிகள்
வாகன ஓட்டிகள், பாதசாரிகள் ஆகியோருக்கு எந்தவித பாதிப்பும் ஏற்படாத வகையில் பிரத்யேக திட்டங்கள் முன்னெடுக்கப்படும். இ.சி.ஆர் சாலையின் பெரும்பகுதி பசுமை போர்த்திய வயல்களுக்கு இடையில் செல்லும். அருகிலுள்ள நகரங்களை தொந்தரவு செய்யாமல் சாலைகள் அமைக்கப்படும். மொத்தம் 8 பகுதிகளாக பிரித்து வேலைகள் நடைபெறும்.
நவம்பர் இலக்கு
அதில் 38 கிலோமீட்டர் தூரம் கொண்ட புதுச்சேரி – பூண்டியான்குப்பம் இடையிலான சாலையை விரிவாக்கம் செய்யும் பணிகள் நடப்பாண்டு நவம்பர் மாதத்திற்குள் முடிக்க இலக்கு நிர்ணயிக்கப்பட்டுள்ளது. இதேபோல் 31 கிலோமீட்டர் தூரம் கொண்ட மாமல்லபுரம் – முகையூர் பகுதியில் அடுத்த ஆண்டு மே மாதத்திற்குள் பணிகள் முடிவுறும் எனக் கூறப்பட்டுள்ளது.
டெண்டர் பணிகள்
இதுதவிர பூண்டியான்குப்பம் – சட்டநாதபுரம் – நாகப்பட்டினம் இடையிலான 113 கிலோமீட்டர் தூரச் சாலையில் முழு வீச்சில் பணிகள் நடந்து கொண்டிருக்கின்றன. 31 கிலோமீட்டர் தூரம் கொண்ட முகையூர் – மரக்காணம் இடையில் விரைவில் பணிகள் முடிவு பெறும் எனத் தெரிவிக்கப்பட்டுள்ளது.
அடுத்தகட்டமாக 46 கிலோமீட்டர் தூரம் கொண்ட மரக்காணம் – புதுச்சேரி இடையில் பணிகளை தொடங்க தேசிய நெடுஞ்சாலைத் துறை ஆணையம் டெண்டர் கோரியுள்ளது. நாகப்பட்டினம் – ராமநாதபுரம் – தூத்துக்குடி பகுதியில் சாலை விரிவாக்கப் பணிகள் அடுத்த நிதியாண்டில் தொடங்கப்படும் எனத் தெரிகிறது. தற்போது நிலம் கையகப்படுத்தும் பணிகள், தடையில்லா சான்று பெறும் பணிகள் மும்முரமாக நடந்து கொண்டிருக்கின்றன.