அதிமுக – பாஜக இடையேயான உரசல்கள் பொதுவெளியில் அரங்கேறி வருகின்றன. கூண்டை விட்டு கிளி பறந்து செல்ல தயாராகிவிட்டதாக அண்ணாமலை கூறியுள்ள நிலையில் அதிமுகவில்
என்ன நினைக்கிறார் என்பது குறித்து விசாரித்தோம்.
பாஜக ஒரு வகையில் சுமையாக இருந்தாலும் டெல்லியின் ஆதரவு தமக்கு வேண்டும் என்று எடப்பாடி பழனிசாமி கருதுகிறாராம். அதிமுகவின் உட்கட்சிப் பிரச்சினை முழுவதும் முடிவுக்கு வரவில்லை. நீதிமன்றம், தேர்தல் ஆணையம் என இன்னும் பலரது கையில் அதிமுகவின் லகான் சுற்றி உள்ளது. எனவே இப்போதைக்கு டெல்லியை பகைக்க வேண்டாம் என்பதே எடப்பாடி பழனிசாமியின் நிலைப்பாடாக இருக்கிறது.
தனது தரப்பை விளக்குவதற்காகவே தம்பி துரையை பிரதமர் மோடியை சந்தித்து வர சொன்னார் எடப்பாடி பழனிசாமி. அந்த சந்திப்பு திட்டமிட்டபடி நடந்தாலும் அண்ணாமலையின் பேச்சு, நடவடிக்கைகள் அதிமுகவை சீண்டிப் பார்க்கும் விதமாகவே இருக்கிறது. இருப்பினும் தான் பாஜக பக்கம் இருப்பதை காட்டவே ராகுல் காந்தி தகுதி நீக்கம் தொடர்பாக எடப்பாடி பழனிசாமி எந்த கருத்தையும் தெரிவிக்காமல் கமுக்கமாக இருந்து கொண்டார் என்கிறார்கள்.
டெல்லிக்கு நேரடியாக சென்று முக்கிய தலைவர்களை சந்தித்து எங்கள் நிலைப்பாடு இதுதான், உங்கள் நிலைப்பாடு என்ன என்று கேட்டு வந்துவிடலாம் என்று எடப்பாடி பழனிசாமி நினைக்கிறாராம். எனவே அமித் ஷா, ஜே.பி.நட்டா ஆகியோரை சந்திக்க நேரம் கேட்டுள்ளனர்.
பாஜக தலைமையில் ஒரு அணியும், அதிமுக தலைமையில் ஒரு அணியும் அமைந்தால் அதன் மூலம் பயன்பெறுவது திமுக தான். நாற்பதுக்கு நாற்பதையும் அள்ளிச் சென்றாலும் ஆச்சரியப்படுவதற்கில்லை. எனவே ஒரே கூட்டணியில் போட்டியிடலாம் என்று எடப்பாடி பழனிசாமி டெல்லியில் சொல்ல வாய்ப்புள்ளது என்கின்றனர்.
ஆனால் கூட்டணியில் அமமுகவை இணைக்க வேண்டும், கட்சிக்குள் சசிகலா, ஓபிஎஸ்ஸை இணைக்க வேண்டும் என்று டெல்லி தலைவர்கள் சொன்னால் அதற்கு ‘நோ’ சொல்வதிலும் உறுதியாக இருக்கிறாராம். மக்களவைத் தேர்தலின் வெற்றி அதிமுகவை விட பாஜகவுக்கு தான் அதிகம் தேவை. அதனால் அவர்கள் எடப்பாடி பழனிசாமியை பகைக்க மாட்டார்கள் என்கின்றனர் விவரம் அறிந்தவர்கள்.