காந்திநகர்: குஜராத் உயர் நீதிமன்றம் இன்று வழங்கிய தீர்ப்பை பற்றிதான் ஒட்டுமொத்த நாடே பேசிக்கொண்டு இருக்கிறது. பிரதமர் நரேந்திர மோடியின் கல்விச் சான்றிதழை கேட்ட டெல்லி முதல்வர் அர்விந்த் கேஜ்ரிவாலுக்கு ரூ.25 ஆயிரம் அபராதம் விதித்துள்ளது குஜராத் உயர் நீதிமன்றம்.
ஏற்கனவே ராகுல் காந்தி விவகாரத்தில் சூரத் நீதிமன்றம் வழங்கிய தீர்ப்பே பெரும் பேசுபொருளாகிய நிலையில், குஜராத் உயர் நீதிமன்றத்தின் இந்த உத்தரவு குறித்து பலரும் சமூக வலைதளங்களில் கருத்து தெரிவித்து வருகிறார்கள்.
இதனிடையே, இந்த தீர்ப்பால் அதிர்ச்சிக்கு உள்ளாகியிருக்கும் ஆம் ஆத்மி உள்ளிட்ட எதிர்க்கட்சியினர், ஒரு ஜனநாயக நாட்டில் பிரதமரின் கல்விச் சான்றிதழை கேட்டது தவறா என கேள்வியெழுப்பி வருகின்றனர்.
ராகுலுக்கு வைத்த ‘செக்’
கடந்த 2019-ம் ஆண்டு மக்களவைத் தேர்தலுக்காக கர்நாடகாவின் கோலார் மாவட்டத்தில் ராகுல் காந்தி தேர்தல் பிரச்சாரம் மேற்கொண்டார். அப்போது அவர் மோடி என்ற குடும்பப் பெயரை முன்வைத்து சில கருத்துகளை கூறினார். இதற்கு எதிர்ப்பு தெரிவித்து பாஜக எம்எல்ஏ ஒருவர் தொடர்ந்த வழக்கை விசாரித்த சூரத் நீதிமன்றம், ராகுல் காந்திக்கு 2 ஆண்டு சிறைத்தண்டனை விதித்தது. இந்த அதிர்ச்சி ஓய்வதற்குள்ளாக, ராகுல் காந்தியின் எம்.பி. பதவியும் அதிரடியாக பறிக்கப்பட்டது. இது, நாடு முழுவதும் உள்ள காங்கிரஸாரை கொந்தளிக்க வைத்துள்ளது. இந்தியா முழுவதும் பல்வேறு போராட்டங்களும் நடைபெற்று வருகின்றன.
மோடியின் சர்டிபிகெட் சர்ச்சை
இதுபோன்ற சூழலில்தான், தற்போது குஜராத் உயர் நீதிமன்றம் அதிரடியாக தீர்ப்பளித்துள்ளது. பிரதமர் நரேந்திர மோடியின் பட்டப்படிப்புகள் குறித்து, அவர் பிரதமராக பதவியேற்றது முதலாகவே சர்ச்சைகள் கிளம்பி வருகின்றன. மோடி கல்லூரிக்கே செல்லவில்லை என்றும், அப்படி இருக்கும் போது அவர் எப்படி பட்டப்படிப்புகள் படித்திருக்க முடியும் என காங்கிரஸ் உள்ளிட்ட எதிர்க்கட்சிகள் கேள்வியெழுப்பி வருகின்றன. மேலும், அப்படி அவர் படித்திருந்தால் அதற்கான சான்றிதழ்களை காட்ட வேண்டும் எனவும் அவர்கள் கூறி வருகின்றனர். இதற்கு பாஜகவினர் எதிர்ப்பு தெரிவிக்கும் போதிலும், மோடியின் சான்றிதழ்கள் வெளியிடப்படவில்லை.
சிஐசிக்கு போன கேஜ்ரிவால்..
இந்நிலையில், மோடியின் கல்விச் சான்றிதழ்களை வெளியிடக் கோரி பலரும் தகவல் அறியும் உரிமைச் சட்டத்தின் கீழ் விண்ணப்பித்தனர். ஆனால், அதற்கு உரிய பதில் அளிக்கப்படவில்லை. இதையடுத்து, டெல்லி முதல்வர் கேஜ்ரிவால் கடந்த 2016-ம் ஆண்டு தகவல் ஆணையருக்கு (சிஐசி) ஒரு கடிதம் எழுதியிருந்தார். அதில், “எனது கல்வி மற்றும் பணி குறித்த ஆவணங்களை வெளியிட எனக்கு எந்த ஆட்சபேனையும் இல்லை. அப்படி இருக்கும் போது, பிரதமர் நரேந்திர மோடியின் கல்விச்சான்றிதழ்களை மறைக்க தகவல் ஆணையம் முற்படுவது ஏன்?” என அவர் கேள்வியெழுப்பி இருந்தார். இதனைத் தொடர்ந்து, நரேந்திர மோடி படித்ததாக கூறப்படும் குஜராத் பல்கலைக்கழகம் மற்றும் டெல்லி பல்கலைக்கழகத்திடம் அவரது பட்டப்படிப்பு ஆவணங்களை வெளியிடுமாறு தகவல் ஆணையம் உத்தரவிட்டது.
25000 ஃபைன்..
இந்த சூழலில், தகவல் ஆணையத்தின் இந்த உத்தரவுக்கு எதிராக குஜராத் பல்கலைக்கழகம் குஜராத் உயர் நீதிமன்றத்தில் வழக்கு தொடர்ந்தது. அதில், “பொறுப்பற்ற சிலரின் குழந்தைத்தனமான ஆர்வம், தகவல் அறியும் உரிமைச் சட்டத்தின் கீழ் வராது” எனக் கூறியிருந்தது. இந்த வழக்கு விசாரணை நடைபெற்று வந்த நிலையில், குஜராத் உயர் நீதிமன்றம் இன்று தீர்ப்பு வழங்கியது. அதில், பிரதமர் நரேந்திர மோடியின் கல்விச்சான்றிதழ் தொடர்பான ஆவணங்களை வெளியிடுமாறு தகவல் ஆணையம் பிறப்பித்த உத்தரவுக்கு தடை விதிக்கப்படுவதாக தெரிவிக்கப்பட்டது. மேலும், பிரதமரின் கல்விச்சான்றிதழை கோரிய டெல்லி முதல்வர் அர்விந்த் கேஜ்ரிவாலுக்கு ரூ.25,000 அபராதம் விதித்தும் நீதிபதி உத்தரவிட்டார்.