சாஹல் அபார பந்து வீச்சு…! ஐதராபாத்தை பந்தாடிய ராஜஸ்தான் அபார வெற்றி…!

ஐதராபாத்,

ஐபிஎல் தொடரின் 4-வது லீக் ஆட்டத்தில் இன்று சன்ரைசர்ஸ் ஐதராபாத் – ராஜஸ்தான் ராயல்ஸ் அணிகள் மோதின.

இதில் டாஸ் வென்ற ஐதராபாத் கேப்டன் புவனேஷ்வர் குமார் பந்து வீச்சை தேர்வு செய்தார். இதையடுத்து ராஜஸ்தான் அணியின் தொடக்க ஆட்டக்காரர்களாக ஜோஸ் பட்லர் மற்றும் யயஷஸ்வி ஜெய்ஸ்வால் ஆகியோர் களம் இறங்கினர். அதிரடியில் மிரட்டிய இந்த இணையால் அணியின் ஸ்கோர் ராக்கெட் வேகத்தில் உயர்ந்தது.

வெறும் பவுண்டரி, சிக்சர்களில் மட்டுமே மிரட்டிய இவர்கள் முதல் விக்கெட்டுக்கு 5.5 ஓவரில் 85 ரன் குவித்த நிலையில் அதிரடி ஆட்டக்காரர் ஜோஸ் பட்லர் 22 பந்தில் 54 ரன் எடுத்த நிலையில் அவுட் ஆனார். இதையடுத்து கேப்டன் சஞ்சு சாம்சன் ஜெய்ஸ்வாலுடன் ஜோடி சேர்ந்தார்.

அதிரடி ஆட்டத்தை வெளிப்படுத்திய ஜெய்ஸ்வால் 37 பந்தில் 54 ரன் எடுத்த நிலையில் அவுட் ஆனார். இதையடுத்து களம் இறங்கிய தேவ்தத் படிக்கல் 2 ரன்னிலும், அடுத்த வந்த ரியான் பராக் 7 ரன்னிலும் அவுட் ஆகினர். இதையடுத்து ஷிம்ரன் ஹெட்மையர் சாம்சனுடன் ஜோடி சேர்ந்தார்.

மறுமுனையில் நிதான ஆட்டத்தை வெளிப்படுத்தி வந்த சாம்சன் 28 பந்தில் அரைசதம் அடித்து அசத்தினார். அவர் 32 பந்தில் 55 ரன் எடுத்த நிலையில் அவுட் ஆனார். இதையடுத்து ரவிச்சந்திரன் அஷ்வின் களமிற்ங்கினார்.

இறுதியில் ராஜஸ்தான் 20 ஓவர்கள் முடிவில் 5 விக்கெட் இழப்புக்கு 203 ரன்கள் குவித்தது. ராஜஸ்தான் தரப்பில் பட்லர் 54 ரன், ஜெய்ஸ்வால் 54 ரன், சாம்சன் 55 ரன் எடுத்தனர்.

இதையடுத்து 204 ரன்கள் எடுத்தால் வெற்றி என்ற கடினமான இலக்குடன் ஐதராபாத் அணியின் தொடக்க வீரர்களாக அபிஷேக் சர்மா , மயங்க் அகர்வால் களமிறங்கினர். அபிஷேக் சர்மா ரன் எதுவும் எடுக்காமல் (0) அவுட் ஆனார். அடுத்து வந்த ராகுல் திரிபாதியும் ரன் எதுவும் எடுக்காமல் (0) ஏமாற்றம் அளித்தார்.

அடுத்து வந்த ஹரி புரோக் 13 ரன்னில் வெளியேறினார். அடுத்து வந்த வாஷிங்டன் சுந்தர் 1 ரன்னிலும், ஹெலென் பிலிப்ஸ் 8 ரன்னிலும் அவுட் ஆகி ஏமாற்றம் அளித்தனர். ஆனால், சற்று நிலைத்து நின்ற மயங்க் அகர்வால் 27 ரன்கள் எடுத்து அவுட் ஆனார். பின்னர் களமிறங்கிய அப்துல் சமாத் சற்று நிதான ஆட்டத்தை வெளிப்படுத்தினார். இறுதியில் ஐதராபாத் 20 ஓவர் முடிவில் 8 விக்கெட்டுகளை இழந்து 131 ரன்கள் மட்டுமே எடுத்தது. இதன் மூலம் சன்ரைசர்ஸ் ஐதராபாத்தை 72 ரன்கள் வித்தியாசத்தில் வீழ்த்தி ராஜஸ்தான் ராயல்ஸ் அபார வெற்றிபெற்றது.

ஐதராபாத் அணியின் அப்துல் சமாத் 32 ரன்னிலும், உம்ரான் மாலிக் 19 ரன்னிலும் இறுதி வரை ஆட்டமிழக்காமல் களத்தில் இருந்தனர்.

சிறப்பாக பந்து வீசிய ராஜஸ்தான் அணியின் யுவேந்திர சாஹல் 4 ஓவரில் 17 ரன்கள் கொடுத்து 4 விக்கெட்டுகளை வீழ்த்தினார்.