அதிமுக – பாஜக கூட்டணி மக்களவைத் தேர்தல் வரை தொடருமா என்ற பேச்சு தமிழக அரசியல் வட்டாரங்களில் எழுந்துள்ள நிலையில் கர்நாடக தேர்தலில் பாஜக கூட்டணியில் அதிமுகவும் போட்டியிட உள்ளதாக தகவல்கள் வெளியாகி வருகின்றன.
தமிழக பாஜக தலைவர் அண்ணாமலை அதிமுகவுடனான கூட்டணி குறித்து முன்னுக்குப் பின் முரணான கருத்துக்களை வெளியிட்டு வந்தாலும் பாஜக தேசிய தலைவர் நட்டா, உள்துறை அமைச்சர் அமித் ஷா, ஒன்றிய இணை அமைச்சர் எல்.முருகன் ஆகியோர் அதிமுகவுடன் கூட்டணி தொடர்வதை உறுதி செய்து வருகின்றனர்.
அதிமுக பொதுச் செயலாளர் எடப்பாடி பழனிசாமியும் கூட்டணி தொடர்வதை உறுதிபடுத்தியுள்ளார். இன்று சேலத்தில் செய்தியாளர்களைச் சந்தித்த போது கூட இது பற்றி கருத்து தெரிவித்தார். “அதிமுக, பாஜக கூட்டணி குறித்து முடிவு செய்பவர்கள் மத்தியில் உள்ள தேசிய தலைவர்களே தவிர , மாநிலத்தில் உள்ளவர்கள் அல்ல. அதிமுக கூட்டணியில் பாஜக தொடர்பாக டெல்லி தலைவர்களே சொல்லிவிட்டனர்” என்று கூறினார்.
இந்த சூழலில் கர்நாடக சட்டமன்றத் தேர்தலில் பாஜக கூட்டணியில் அதிமுகவும் போட்டியிட விருப்பம் தெரிவித்துள்ளதாக தகவல் வெளியாகியுள்ளது.
தமிழ்நாடு, புதுச்சேரி தவிர்த்து கேரளா, கர்நாடகா, ஆந்திரா, மகாராஷ்டிரா சட்டமன்றத் தேர்தல்களிலும் ஒரு சில தொகுதிகளில் அதிமுக கடந்த காலங்களில் போட்டியிட்டுள்ளது.
தற்போது
எடப்பாடி பழனிசாமி
அதிமுக பொதுச் செயலாளராகப் பதவியேற்றுள்ள நிலையில் மீண்டும் கர்நாடக தேர்தலில் போட்டியிட முடிவெடுக்கப்பட்டுள்ளதாக சொல்கிறார்கள். தமிழர்கள் அதிகம் வசிக்கும் கோலார் மற்றும் பெங்களூர் நகர்ப் பகுதிகளில் இரண்டு அல்லது மூன்று தொகுதிகளில் போட்டியிட விருப்பம் தெரிவித்துள்ளதாக கூறுகிறார்கள்.
தமிழ்நாட்டில் அதிமுகவுடனான கூட்டணிக்கு தொடர்ந்து எதிர் கருத்து தெரிவித்து வரும் அண்ணாமலை தான் பாஜகவின் கர்நாடக சட்டமன்றத் தேர்தல் இணை பொறுப்பாளராக உள்ளார். இந்நிலையில் இதன் அடுத்தகட்ட நகர்வுகள் குறித்து எதிர்பார்ப்பு அதிகரித்துள்ளது.