நியூயார்க்:
இந்தியாவில் முஸ்லிம்கள் பாதுகாப்பாக இல்லையாமே என அமெரிக்காவில் நிருபர் ஒருவர் கேட்ட கேள்விக்கு ஆவேசமாக நிர்மலா சீதாராமன் பதிலளித்திருப்பது சமூக வலைதளங்களில் வேகமாக பரவி வருகிறது.
இந்திய தொழில் கூட்டமைப்பு மற்றும் அமெரிக்கா – இந்திய வர்த்தக கவுன்சில் சார்பில் முதலீட்டாளர்களுடான வட்ட மேஜை மாநாடு வாஷிங்டனில் நேற்று நடைபெற்றது. இதில் மத்திய நிதியமைச்சர் நிர்மலா சீதாராமன் கலந்துகொண்டார்.
மாநாட்டுக்கு இடையே நிர்மலா சீதாராமனிடம் நிருபர்கள் பல்வேறு விவகாரங்கள் தொடர்பாக கேள்வியெழுப்பினர். அப்போது ஒரு நிருபர், “இந்தியாவில் முஸ்லிம்களுக்கு எதிரான வன்முறை நிகழ்த்தப்படுகிறது எனக் கூறப்படுகிறதே..” என கேட்டார்.
இந்த கேள்வியால் சற்று ஆவேசமடைந்து நிர்மலா சீதாரமான் கூறியதாவது: உலகிலேயே முஸ்லிம் மக்கள் தொகை அதிகம் கொண்ட நாடுகளில் இரண்டாவது நாடாக இருப்பது இந்தியா. இந்தியாவில் முஸ்லிம்களின் மக்கள்தொகை தொடர்ந்து அதிகரித்துக் கொண்டுதான் இருக்கிறது. நீங்கள் சொல்வது போல, முஸ்லிம்களுக்கு எதிராக வன்முறை நிகழ்த்தப்பட்டிருந்தாலோ அல்லது அவர்கள் வாழ்வதற்கு ஏற்ற சூழல் இல்லாமல் இருந்தாலோ அவர்கள் மக்கள்தொகை எப்படி பெருகி இருக்கும்?
1947-ம் ஆண்டில் இந்தியாவில் இருந்த முஸ்லிம் மக்கள் தொகை, தற்போது எத்தனை மடங்கு அதிகரித்திருக்கிறது என்பது உங்களுக்கே தெரியும். ஆனால், அதே ஆண்டு உருவான பாகிஸ்தானை பாருங்கள். அங்கு சிறுபான்மை மக்களின் எண்ணிக்கை குறைந்து கொண்டே வருகிறது. அவ்வளவு ஏன்.. முஸ்லிம்களில் சில குறிப்பிட்ட பிரிவைச் சேர்ந்தவர்களின் எண்ணிக்கையும் குறைந்து கொண்டே வருகிறது. அங்கு சிறுபான்மையினர் கொல்லப்படுகிறார்கள். ஆனால், இந்தியாவிலோ முஸ்லிம்கள் தசுதந்திரமாக தொழில் செய்கிறார்கள்.. அவர்களின் குழந்தைகள் படிக்கிறார்கள்..
இந்தியாவுக்கு வருகை தாருங்கள்.. நாடு முழுவதும் சென்று பார்வையிடுங்கள்.. அப்போதுதான் இந்தியாவில் என்ன நடக்கிறது என்பது தெரியவரும். அதை விடுத்து, இந்தியாவுக்கு இதுவரை வந்திராத, இந்தியாவில் கள நிலவரம் கூட தெரியாமல் சிலர் பேசுவதை கேட்டால் நீங்கள் அப்படிதான் நினைப்பீர்கள். இவ்வாறு நிர்மலா சீதாராமன் பேசினார்.