சென்னை
: எம்எல்ஏக்களுக்கு ஐபிஎல் கிரிக்கெட் பாஸ் தர வேண்டும் எனக் கேட்ட அதிமுக கொறடா எஸ்.பி. வேலுமணிக்கு அமைச்சர் உதயநிதி கூறிய பதிலால் சட்டப்பேரவையில் பெரும் சிரிப்பலை எழுந்தது.
தமிழக சட்டப்பேரவையில் ஒவ்வொரு துறைக்கான மானியக் கோரிக்கைகள் மீதான விவாதம் நடைபெற்று வருகிறது. அந்த வகையில், இன்று விளையாட்டுத்துறை மானியக் கோரிக்கைகள் மீதான விவாதம் சட்டப்பேரவையில் நடைபெற்றது.
அப்போது அதிமுக கொறடா எஸ்.பி. வேலுமணி பேசுகையில், “அதிமுக ஆட்சிக்காலத்தில் ஐபிஎல் போட்டிகளை பார்க்க சட்டப்பேரவை உறுப்பினர்களுக்கு 400 பாஸ்கள் கொடுக்கப்பட்டன. ஆனால், இப்போதோ அதிமுக எம்எல்ஏக்களுக்கு மட்டும் பாஸ்கள் கொடுப்பதில்லை. எனவே அதிமுக எம்எல்ஏக்களுக்கு பாஸ் கொடுக்க வேண்டும்” எனக் கூறினார்.
இதற்கு இளைஞர் மற்றும் விளையாட்டு மேம்பாட்டுத் துறை அமைச்சர் உதயநிதி ஸ்டாலின் பதிலளித்தார். அவர் கூறியதாவது: கடந்த 4 வருடங்களாக சென்னையில் ஐபிஎல் கிரிக்கெட் போட்டியே நடக்கவில்லை. இப்போதுதான் போட்டி நடைபெறுகிறது. அப்படி இருக்கும்போது, நீங்கள் யாருக்கு பாஸ் வழங்கினீர்கள்? நான் எனது சொந்த செலவில் ஒவ்வொரு ஐபிஎல் போட்டிக்கும் எனது தொகுதியை சேர்ந்த 150 கிரிக்கெட் வீரர்களுக்கு போட்டியை காண ஏற்பாடு செய்து கொடுக்கிறேன். எல்லாவற்றுக்கும் மேலாக, ஐபிஎல்லை நடத்துவது யார்.. பிசிசிஐ. அந்த பிசிசிஐ-யில் தான் உங்கள் நெருங்கிய நண்பர் அமித் ஷாவின் மகன் ஜெய் ஷா தான் தலைவராக உள்ளார்.
அவரிடமே பாஸ் வழங்குமாறு நீங்கள் கேட்கலாமே.. நாங்கள் கேட்டால் அவர் தர மாட்டார். எனவே நீங்களே அவரிடம் பேசி அனைத்து சட்டமன்ற உறுப்பினர்களுக்கும் டிக்கெட் வாங்கிக் கொடுங்கள். 5 டிக்கெட் கொடுத்தால் கூட போதும். பணம் கொடுத்து கூட நாங்கள் வாங்கிக் கொள்கிறோம். அப்படி இல்லையென்றால், அதை வேறு கணக்கில் சேர்த்து விடுவீர்கள் என உதயநிதி ஸ்டாலின் கூறினார். உதயநிதி ஸ்டாலின் பேச்சால் சட்டசபையில் பெரும் சிரிப்பலை எழுந்தது. முதல்வர் மு.க. ஸ்டாலினும் உதயநிதியின் பேச்சை கேட்டு வாய்விட்டு சிரித்தார்.