அறிமுக இயக்குநர் மந்திரமூர்த்தி இயக்கத்தில் நடிகர் சசிகுமார் நடிப்பில் வெளியான திரைப்படம் ‘அயோத்தி’. ட்ரைடென்ட் ஆர்ட்ஸ் ஆர்.ரவீந்திரன் தயாரித்துள்ள இந்தப் படத்தில் சசிகுமாருடன் ‘குக் வித் கோமாளி’ நிகழ்ச்சி மூலம் பிரபலமான புகழ், போஸ் வெங்கட், பிரீத்தி அஸ்ராணி, அஞ்சு அஸ்ராணி, யஷ்பால் ஷர்மா உள்ளிட்ட பலர் நடித்திருந்தனர்.
அயோத்தியிலிருந்து தீவிரமான இந்து குடும்பம் ஒன்று ராமேஸ்வரத்திற்குத் தீபாவளியை ஒட்டி புனித யாத்திரைக்கு வருகிறது. வந்த இடத்தில் ஏற்படும் திடீர் விபத்தில் அந்தக் குடும்பத்தைச் சேர்ந்த ஒருவர் உயிரிழக்கிறார். ஊர் பேர் தெரியாத இடத்தில் தவிக்கும் அவர்கள் இறந்தவரின் சடலத்துடன் எப்படி மீண்டும் ‘அயோத்தி’ திரும்பினார்கள் என்பதுதான் இப்படத்தின் கதை.
அப்படத்தின் கதை தங்களுடையது என்று சில எழுத்தாளர்கள் தமிழக ஊடகங்கள் வழி செய்தி வெளியிட்டிருந்தது சர்ச்சையைக் கிளப்பியிருந்தாலும் இயக்குநர் சசிகுமார் நடிப்பில் நீண்ட இடைவேளைக்குப் பிறகு வெளியான இப்படம் மக்களிடையே நல்ல வரவேற்பைப் பெற்றது. சினிமா பிரபலங்கள் உள்ளிட்ட பலரும் ‘அயோத்தி’ படக்குழுவினருக்கு தங்களது வாழ்த்துகளையும், பாராட்டுகளையும் தெரிவித்திருந்தனர்.
அயோத்தி…
நண்பர் சசிகுமாருக்கு ரொம்ப நாட்களுக்குப் பிறகு அருமையான கருத்துள்ள ஒரு வெற்றிப் படம்.
முதல் படத்திலேயே தான் ஒரு தலை சிறந்த இயக்குநர் என்று நிரூபித்திருக்கிறார் ஆர். மந்திரமூர்த்தி.
தயாரிப்பாளருக்கு என்னுடைய பாராட்டுகளும், வாழ்த்துகளும்!#Ayothi
— Rajinikanth (@rajinikanth) April 11, 2023
அந்த வகையில் தற்போது படத்தைப் பார்த்த நடிகர் ரஜினிகாந்த் படக்குழுவினரைப் பாராட்டி ட்வீட் ஒன்றைப் பதிவிட்டுள்ளார். அப்பதிவில், “அயோத்தி… நண்பர் சசிகுமாருக்கு ரொம்ப நாள்களுக்குப் பிறகு அருமையான கருத்துள்ள ஒரு வெற்றிப் படம். முதல் படத்திலேயே தான் ஒரு தலை சிறந்த இயக்குநர் என்று நிரூபித்திருக்கிறார் ஆர்.மந்திரமூர்த்தி. தயாரிப்பாளருக்கு என்னுடைய பாராட்டுகளும், வாழ்த்துகளும்!” என்று படக்குழுவினரைப் பாராட்டியுள்ளார்.