பாலியல் விவகாரத்தில் சிக்கி பதவியை ராஜினாமா செய்த முன்னாள் அமைச்சருக்கு, பாஜக சீட் வழங்கியுள்ளது.
கர்நாடகா தேர்தல்
கர்நாடகா மாநிலத்தில் மே மாதம் 10ம் தேதி சட்டப்பேரவை தேர்தல் நடைபெற உள்ளது. மொத்தம் உள்ள 224 தொகுதிகளுக்கும் ஒரே கட்டமாக தேர்தல் நடத்தப்பட்டு , மே 13ம் தேதி தேர்தல் முடிவுகள் அறிவிக்கப்படும் என இந்திய தேர்தல் ஆணையம் அறிவித்துள்ளது. இந்தநிலையில் கர்நாடகாவில் இன்று வேட்பு மனு தாக்கல் தொடங்கியது. தேர்தலுக்கு இன்னும் ஒரு மாதத்திற்கு குறைவான நாட்களே இருப்பதால், மாநிலத்தில் தேர்தல் நடத்தை விதிகள் அமலுக்கு வந்துள்ளது. அதைத் தொடர்ந்து மாநிலத்தில் தீவிர சோதனைகள் மேற்கொள்ளப்பட்டு வருகிறது.
வெற்றி யாருக்கு.?
கர்நாடகாவில் ஆளும் பாஜக, பிரதான எதிர்கட்சியான காங்கிரஸ் உள்ளிட்ட தேசிய கட்சிகளுக்கும், மாநில கட்சியான குமாரசாமியின் மதச்சார்பற்ற ஜனதா தளம் ஆகிய கட்சிகளுக்கும் இடையே மும்முனை போட்டி நிலவி வருகிறது. இருப்பினும் முதல் முறையாக அரவிந்த் கெஜ்ரிவாலின் ஆம் ஆத்மி கட்சி கர்நாடகாவில் போட்டியிடுகிறது. இந்த சூழலில் தேர்தலுக்கு முந்தையை கருத்துக் கணிப்புகளில் காங்கிரஸ் கட்சி தனி பெரும்பான்மையுடன் ஆட்சியை பிடிக்கும் என தெரியவந்துள்ளது. ஒரு சில கருத்து கணிப்புகள் வழக்கம் போல் தொங்கு சட்டசபை அமையும் என்று தெரிவித்துள்ளது. ஆனால் கண்டிப்பாக பாஜக ஆட்சியை தக்க வைக்காது என்பதையே அனைத்து கருத்து கணிப்புகளும் தெரிவித்துள்ளன.
பாஜகவிற்கு ரிவீட்
அரசு ஒப்பந்தங்களை எடுக்க 40 சதவிகித கமிசன், ஹிஜாப் பிரச்சனையால் இஸ்லாமிய பெண்களின் கல்வி பறிப்பு, மதவாத பிரிவினைவாதம், இஸ்லாமிய வெறுப்பு, வெற்றியை தீர்மானிக்கும் ஒக்கலிகா மற்றும் லிங்காயத் சமூகங்களுக்கு இடஒதுக்கீடு சர்ச்சை, வேலை வாய்ப்பின்மை, அத்தியாவசிய பொருட்களின் விலை ஏற்றம், பட்டியலினத்தவர்களுக்கு எதிரான வன்முறை அதிகரிப்பு உள்ளிட்ட காரணங்கள் பாஜகவிற்கு தேர்தலில் நல்ல பாடத்தை புகட்டும் என்று அரசியல் விமர்சகர்கள் கூறிவருகின்றன. இந்த சூழலில் மேலும் ஒரு சர்ச்சையில் பாஜக சிக்கியுள்ளது தற்போது பேசு பொருளாகியுள்ளது.
பலான அமைச்சர்
கடந்த 11ம் தேதி பாஜக 189 பேர் கொண்ட முதல் வேட்பாளர் பட்டியலை வெளியிட்டது. அதில் சர்ச்சைக்குரிய முன்னாள் அமைச்சர் ரமேஷ் ஜர்கிஹோலிக்கு, கோகக் தொகுதியில் போட்டியிட வாய்ப்பளித்துள்ளது தற்போது பூகம்பத்தை கிளப்பியுள்ளது. இவர் பலான விவகாரத்தில் கடந்த 2021ம் ஆண்டு தனது பதவியை ராஜினாமா செய்தது குறிப்பிடதக்கது.
யார் இந்த ரமேஷ்.?
கடந்த 2021ம் ஆண்டில் கர்நாடகா நீர்வளத்துறை அமைச்சராக ரமேஷ் ஜர்கிஹோலி இருந்தபோது, அரசு வேலை வாங்கி தருகிறேன் என்று கூறி இளம்பெண் ஒருவரை தன்னுடைய ஆசைக்கு இணங்க வைத்துள்ளார். இதுதொடர்பான வீடியோ தொலைக்காட்சிகள், சமூக வலைதளங்களில் வெளியாகி பெரும் அதிர்ச்சியை ஏற்படுத்தியது.
அதையடுத்து கர்நாடகாவைச் சேர்ந்த சமூக ஆர்வலர் தினேஷ் கல்லஹள்ளி, ஆபாச படம் அடங்கிய சி.டி பாதிக்கப்பட்ட பெண்ணிடம் இருப்பதைத் தெரிந்துகொண்ட அமைச்சர், அந்தப் பெண்ணையும், அவரது குடும்பத்தினரையும் மிரட்டுவதாகவும் போலீசில் புகார் அளித்தார். அதைத் தொடர்ந்து அவர் தனது பதவியை ராஜினாமா செய்தது குறிப்பிடதக்கது.