பாஜக மாநில தலைவர் அண்ணாமலை நேற்று (ஏப்ரல் 14) திமுகவின் குடும்பத்தினரின் மற்றும் அமைச்சர்கள் யார் யார் எவ்வளவு சொத்து சேர்த்துள்ளனர் என்ற விவரத்தை வெளியிட்டார். மேலும், முதல்வர் ஸ்டாலின் ஷெல் நிறுவனத்திடம் இருந்து 200 கோடி ரூபாயை லஞ்சமாக பெற்றுள்ளதாக அண்ணாமலை குற்றசாட்டு வைத்தார்.
மேலும், இதற்கு முன்பு ஆண்ட கட்சிகளின் சொத்து, ஊழல் பட்டியலையும் வெளியிடுவேன் என்று அண்ணாமலை பற்ற வைத்தது அதிமுகவில் புகைச்சலை கிளப்பியுள்ளது. அண்ணாமலையின் இந்த குற்றச்சாட்டுகளுக்கு திமுகவினர், அமைச்சர்கள், நிர்வாகிகள் என பலரும் கருத்து தெரிவித்து வரும் நிலையில் தமிழ்நாடு காங்கிரஸ் கமிட்டியின் தலைவர் கே.எஸ்.அழகிரி தனது சோக நிலையை கூறி கருத்து தெரிவித்துள்ளார். அது கவனம் பெற்றுள்ளது.
இதுகுறித்து கே.எஸ். அழகிரி ட்விட்டர் பக்கத்தில் பதிவிட்டிருப்பது;
50 ஆண்டுகால பொது வாழ்க்கையில் இருமுறை சட்டமன்ற உறுப்பினராக, ஒருமுறை மக்களவை உறுப்பினராக இருந்து தமிழ்நாடு காங்கிரஸ் கமிட்டி தலைவராக இருக்கும் நான், நந்தனத்தில் உள்ள தமிழ்நாடு அரசு அடுக்குமாடி குடியிருப்பில் ரூபாய் 16,000 வாடகைக்கு குடியிருக்கிறேன். ஒரு வருடமாக வாடகை கட்டவில்லை என்று நோட்டீஸ் பெறுகிற நிலையில் இருக்கிறேன்.
நான்கு ஆடுகளை மட்டுமே வைத்திருந்ததாக கூறிய பாஜக தலைவர் அண்ணாமலை மாதம் ஒன்றுக்கு மூன்றே முக்கால் லட்சம் வீட்டு வாடகை எப்படி கொடுக்க முடிகிறது? மூன்று லட்ச ரூபாய் கை கடிகாரமும் எப்படி அணிய முடிகிறது? இதற்கு யார் பணம் கொடுக்கிறார்கள்? இதுகுறித்து உரிய விசாரணை நடத்தப்பட வேண்டும்” என்று அவர் பதிவிட்டுள்ளார். கே.எஸ். அழகிரியின் இந்த பதிவு கலவையான விமர்சனங்களை பெற்று வருகிறது.
முன்னதாக அண்ணாமலை ஒரு ட்வீட் போட்டிருந்தார். அதில், திமுகவினரால் குவிக்கப்பட்டுள்ள சொத்துக்களின் விவரங்களையும் பொதுமக்கள் பார்வைக்காக வெளியிட்டிருந்தேன்.
அவற்றின் விவரங்கள் https://enmannenmakkal.com என்கிற இணையதளத்தில் வழங்கப்பட்டுள்ளன. தமிழகத்தில் நாம் எதிர்பார்க்கும் மாற்றமும், அரசியல்வாதிகளிடமிருந்து மக்கள் எதிர்பார்க்கும் வெளிப்படைத்தன்மையும், திமுக போன்ற ஊழல் கட்சிகள் அதிகாரத்தில் இருக்கும் வரை சாத்தியமில்லை. இன்று முதல், திமுகவிடம் தொடர்ந்து கேள்விகள் எழுப்புவோம். மக்களுக்கான எங்கள் கேள்விகளுக்கு உரிய பதில்களையும் திமுகவிடமிருந்து எதிர்பார்க்கிறோம் என இவ்வாறு அண்ணாமலை கூறியிருந்தார்.