70ஸ் கிட்ஸ்களின் மனம் கவர்ந்த 'அக்னி நட்சத்திரம்'
மணிரத்னம் இயக்கத்தில், இளையராஜா இசையமைப்பில், பிரபு, கார்த்திக், அமலா, நிரோஷா மற்றும் பலர் நடிப்பில் 1988ம் ஆண்டு ஏப்ரல் 15ம் தேதி வெளிவந்த படம் 'அக்னி நட்சத்திரம்'. அப்படம் வெளிவந்து இன்றுடன் 35 ஆண்டுகள் நிறைவடைந்துள்ளது.
70களில் பிறந்தவர்களுக்கு, அந்தப் படம் வெளிவந்த போது இளைஞர்களாக இருந்தவர்களுக்கு மிகவும் பிடித்த படமாக அமைந்த படம். ஒரே அப்பா, வெவ்வேறு தாய் வயிற்றில் பிறந்த அண்ணன் தம்பிகளான பிரபு, கார்த்திக் இருவர் இடையிலான மோதல் ஒரு பக்கம், இருவரது காதலும் மற்றொரு பக்கம் என காதலும், மோதலும் கலந்த ஒரு ஆக்ஷன் படமாக வெளிவந்த படம்.
மணிரத்னத்தின் கதாபாத்திர உருவாக்கம், நட்சத்திரங்களை நடிக்க வைத்த விதம், இளையராஜாவின் இசையில் அனைத்துப் பாடல்களுமே சூப்பர் ஹிட், பி.சி.ஸ்ரீராமின் 'பேக் லைட்' எபெக்டில் வித்தியாசமாய் ஒளிர்ந்த காட்சிகள் என படம் பற்றி அப்போது பேசாதவர்களே கிடையாது. அப்போதெல்லாம் சமூக வலைத்தளங்கள் இருந்திருந்தால் டைம் லைனில் அக்கு வேறு ஆணி வேராக படம் பற்றிய கருத்துக்களே நிறைந்திருக்கும்.
அப்படி ஒரு 'யூத் புல் என்டர்டெயினர்' படம் கடந்த 35 வருடங்களாக வரவேயில்லை என்று அடித்துச் சொல்லலாம்.