எடப்பாடி பழனிசாமியின் அரசியல் வாழ்க்கையில் இன்றைய தினம் சிறப்பான நாளாக அவருக்கு அமைந்துள்ளது. அதிமுக பொதுச்செயலாளர் தேர்தலில் ஒருமனதாக தேர்வு செய்யப்பட்ட எடப்பாடி பழனிசாமிக்கு இன்று நடந்த செயற்குழுவில் பாராட்டு தெரிவிக்கப்பட்டது. அதிமுகவின் அடிப்படை தொண்டனாக இருந்து கிளை செயலாளராக தனது அரசியல் பயணத்தை தொடங்கிய
இன்று அதிமுகவின் பொதுச்செயலாளராக வளர்ச்சி அடைந்த என்ற வகையில் கழக செயலாளர்கள் அவருக்கு பாராட்டு தெரிவிக்க செயற்குழு உறுப்பினர்கள் வழிமொழிந்தனர்
தீர்மானம் 1
எம்.ஜி.ஆரால் 1972-ஆம் ஆண்டு அக்டோபர் மாதம் 17-ஆம் தேதி, லட்சோப லட்சம் தொண்டர்களின் பேராதரவோடு தொடங்கப்பட்ட அதிமுக அரை நூற்றாண்டைக் கடந்து இந்திய அரசியல் களத்தில் வீறுநடை போட்டு வருகிறது. இதில், சுமார் 28 ஆண்டு காலம் கழகப் பொதுச் செயலாளராகப் பொறுப்பேற்று, இந்திய திருநாடே வியக்கும் வகையில் பல்வேறு சாதனைகளை நிகழ்த்திக் காட்டி, ஒன்றரை கோடி தொண்டர்களின் இயக்கமாக உருவாக்கினார் ஜெயலலிதா.
“அனைத்திந்திய அண்ணா திராவிட முன்னேற்றக் கழகம் ஓர் ஆலமரம். ஆயிரம் காலத்துப் பயிர். இன்னும் எத்தனையோ தலைமுறைகளுக்கு தமிழர்களுக்காகப் பாடுபடப்போகும் நல்லியக்கம்” என ஜெயலலிதா சூளுரைத்தார்.
சரித்திரப் புகழ் கொண்ட அதிமுக ஒரு மிக முக்கியமான வரலாற்றுக் காலகட்டத்தில் பேரறிஞர் அண்ணா, புரட்சித் தலைவர் எம்.ஜி.ஆர், புரட்சித் தலைவி அம்மா ஆகியோரின் பெரும் கனவுகளை நனவாக்கும் வண்ணம், சட்டமன்ற எதிர்க்கட்சித் தலைவரும், தமிழ் நாடு முன்னாள் முதலமைச்சருமான எடப்பாடி பழனிசாமியை உச்ச உயர் பொறுப்பான கழகப் பொதுச் செயலாளராக 28.3.2023 அன்று தேர்ந்தெடுத்து, அவர்தம் தலைமையை ஏற்றிருக்கிறது.
ஜனநாயகத்தின் அடிப்படை நோக்கமே, சாமானிய மக்களின் கரங்களில் அதிகாரத்தைக் கொண்டு சேர்ப்பது தான். அண்ணா அந்த உயரிய லட்சியத்தோடுதான் இயக்கம் கண்டார். அவர்தம் வழியில் புரட்சித் தலைவரும், புரட்சித் தலைவி அம்மாவும், எளிய சாமானிய மக்களில் பலரை அதிகாரம் மிக்க பொறுப்புகளில், பதவிகளில் அமரச் செய்து, ஜனநாயகத்தின் மாண்புகளைக் காத்து நின்றார்.
அந்த மாபெரும் தலைவர்களால் உருவாக்கப்பட்டு வளர்த்தெடுக்கப்பட்ட அதிமுக அவர் வழியிலேயே செயல்பட்டு, கழகத்தின் மூன்றாம் தலைமுறை அரசியல் தலைமையை தேர்ந்தெடுத்திருக்கிறது. ஒரு கிளைக் கழகச் செயலாளராக தனது கழகப் பணியை, மக்கள் பணியை தொடங்கி, தனது உழைப்பால், நேர்மையால், விடாமுயற்சியால், கொண்ட கொள்கை மீதும், இயக்கத்தின் தலைமை மீதும் கொண்டிருந்த மாறாத விசுவாசத்தால், “கழகப் பொதுச் செயலாளர்” என்கிற உயர் பொறுப்பை அடைந்திருக்கிறார் எடப்பாடி பழனிசாமி.
ஜெயலலிதா நம்மைவிட்டுப் பிரிந்த துயர்மிகு காலகட்டத்திற்கு பிறகு, புரட்சித் தலைவர் கண்ட அனைத்திந்திய அண்ணா திராவிட முன்னேற்றக் கழகத்தை வீழ்த்தி, அழித்துவிடத் துடித்தார்கள் துரோகிகளும், எதிரிகளும். அம்மாவின் அரசைக் கலைத்துவிட அவர்கள் முயற்சித்த அந்த வேளையில், சுமார் நான்கரை ஆண்டுகாலம் கழக அரசை வெற்றிகரமாக நடத்திக் காட்டியது மட்டுமல்ல, சாதனை மேல் சாதனைகளைப் புரிந்து, அம்மாவின் அரசியல் வாரிசு என்பதை நிரூபித்துள்ளார் எடப்பாடி பழனிசாமி.
அதன் பிறகும், தொடர் பிரச்சினைகளை உருவாக்கிக் கொண்டே இருந்தார்கள். மலை மலையான துன்பங்கள் அலை அலையாக வந்த நேரத்திலும், கொஞ்சமும் கலங்காமல் நெஞ்சுரத்தோடு எதிர்த்து நின்று, அவற்றையெல்லாம்
வெற்றி கண்டு, அதிமுகவையும் அதன் தொண்டர்களையும் காத்து நின்ற காவல் அரண் எடப்பாடி பழனிசாமி.
“இதனை இதனால் இவன்முடிக்கும் என்றாய்ந்து
அதனை அவன்கண் விட”
என்கிற வள்ளுவப் பெருந்தகையின் வாக்கிற்கிணங்க, நம் இதய தெய்வங்களுக்குப் பிறகு, அவர்களின் வழியிலேயே கழகத்தையும், தொண்டர்களையும் காத்து நின்று வலிமைப்படுத்தும் வகையில், அனைத்திந்திய அண்ணா திராவிட முன்னேற்றக் கழகப் பொதுச் செயலாளராக தேர்ந்தெடுக்கப்பட்டுள்ள, எடப்பாடி பழனிசாமிக்கு இந்தச் செயற்குழு தனது இதயபூர்வமான வாழ்த்துகளையும், நன்றிகளையும் தெரிவித்து மகிழ்கிறது.
என செயற்குழுவில் தீர்மானம் கொண்டுவரப்பட்டது