"அவரே ஒரு கத்துக்குட்டி".. வளர்த்த கடா மார்பில் பாய்கிறது.. அண்ணாமலையை மீண்டும் சீண்டிய ஜெயக்குமார்..

சென்னை:
தமிழக பாஜக தலைவர் அண்ணாமலையை கத்துக்குட்டி என அதிமுக முன்னாள் அமைச்சர் ஜெயக்குமார் விமர்சித்துள்ளது பேசுபொருளாகி உள்ளது.

திமுகவின் ஊழல் பட்டியலை வெளியிடப்போகிறேன் என தமிழகத்தையே அதிர வைத்த அண்ணாமலை, நேற்று முன்தினம் அக்கட்சியின் முக்கியத் தலைவர்களின் சொத்துப் பட்டியலை வெளியிட்டார். அத்துடன் நிற்காமல், “ஊழல் என்று வந்துவிட்டால் அதன் அடிப்படையையே எதிர்க்க வேண்டும். ஒரு கட்சியை மாத்திரம் எதிர்க்கக் கூடாது.. எனவே தமிழகத்தில் ஆட்சி செய்த அனைத்து கட்சிகளின் ஊழல் பட்டியலையும் நான் வெளியிடுவேன்.. திராணி இருந்தால் என்னை தடுத்து பாருங்கள்” என பேசினார் அண்ணாமலை.

அதிமுகவுக்கு மறைமுகமாக மிரட்டல் விடுக்கும் வகையில் அண்ணாமலையின் பேச்சு பார்க்கப்பட்டது. இதையடுத்து, அண்ணாமலைக்கு அதிமுக சீனியர்கள் கடுமயைாக எதிர்வினையாற்றி வருகின்றனர். குறிப்பாக, ஜெயக்குமாரின் பேச்சு பாஜகவினரை கோபம் அடையச் செய்தது. “அண்ணாமலைக்கு நான் சேலஞ்ச் விடுக்கிறேன்.. முடிந்தால் அவர் அதிமுக என சொல்லட்டும்.. அப்புறம் பாருங்கள் எங்கள் ரியாக்சனை.. இந்த பூச்சாண்டிக்கு எல்லாம் நாங்கள் பயப்பட மாட்டோம்” என கூறியிருந்தார்.

இந்த சூழலில், எடப்பாடி பழனிசாமியே அண்ணாமலையை நேரடியாக விமர்சித்தார். அண்ணாமலையை ஒரு அரசியல் முதிர்ச்சியற்றவர் என்றும், அவரை பேசி பேசி பெரிய ஆள் ஆக்கிவிடாதீர்கள் எனவும் அவர் பேசியிருந்தார். எடப்பாடி பழனிசாமியே அண்ணாமலையை விமர்சித்ததால் அதிமுக – பாஜக கூட்டணி விரைவில் முறிந்துவிடும் என பேச்சு அடிபட்டு வருகிறது.

இந்நிலையில், அதிமுக செயற்குழுக்கூட்டத்துக்கு பிறகு வெளியே வந்த ஜெயக்குமாரிடம் அண்ணாமலை குறித்து நிருபர்கள் கேள்வியெழுப்பினர். அதற்கு பதிலளித்த அவர், “எடப்பாடி பழனிசாமி கூறியது சரிதான். அண்ணாமலை அரசியலில் ஒரு கத்துக்குட்டி. அவர் ஒரு அரசியல் முதிர்ச்சி இல்லாத தலைவர். எங்களின் அரசியல் வாழ்க்கையை பாருங்கள். 30, 40 ஆண்டுகள் அரசியலில் இருந்துள்ளோம். அண்ணாமலையை கண்டு நாங்கள் ஏன் பயப்பட போகிறோம்? அதிமுகவை பாஜக விமர்சிப்பது, வளர்த்த கடா மார்பில் பாய்வதை போன்றது. கூட்டணியில் இருந்துகொண்டே மாறுபாடாக பேசக்கூடாது” என்றார்.