இந்திய மாற்றுத்திறனாளி கிரிக்கெட் அணியின் கேப்டன் சச்சின் சிவாவிடம் அவதூறாக நடந்து கொண்ட பேருந்து நடத்துநர் அதிரடியாக சஸ்பெண்ட் செய்யப்பட்டுள்ளார்.
இந்திய மாற்றுத்திறனாளி கிரிக்கெட் அணியின் கேப்டன் மதுரையை சேர்ந்த சச்சின் சிவா, ஊருக்கு செல்ல சென்னை கோயம்பேடு பேருந்து நிலையத்தில் காத்துக்கொண்டிருந்தார். அப்போது மதுரை செல்லக்கூடிய SETC பேருந்து ஒன்றில் அவர் ஏற சென்றுள்ளார்.
அப்போது பேருந்தின் நடத்துநர் ராஜா என்பவர் அவரை ஏற விடாமல் தடுத்துள்ளார். பேருந்தில் ஏன் ஏறக்கூடாது என்று சச்சின் சிவா கேட்டுள்ளார். மாற்றுத்திறனாளிகள் இதில் ஏறக்கூடாது என்று நடத்துனர் சண்டையிட்டுள்ளார்.
அவரை பேருந்தில் ஏற விடமால் வெளியிலேயே நிற்கவைத்ததோடு, முகத்தை உடைப்பேன் என்றும் கொடூரமாக மிரட்டல் விடுத்துள்ளார். இதனால் கோபமடைந்த சிவா, நியாயம் கேட்டு அந்த பேருந்தின் முன் தர்ணாவில் ஈடுபட்டார்.
அங்கிருந்த காவல் அதிகாரி சமரசம் பேச முயன்றும் உடன்பாடு எட்டப்படவில்லை. அந்த பேருந்து அங்கிருந்து சென்றுவிட்டது. சச்சின் சிவா மன வேதனையுடன் வேறு பேருந்தில் மதுரை சென்றார்.
இந்நிலையில், ஒரு இந்திய மாற்றுத்திறனாளி கிரிக்கெட் அணியின் கேப்டனுக்கு நடத்துநர் ஒருவர் பகிரங்கமாக மிரட்டல் விடுத்த வீடியோ வெளியானது. இதையடுத்து பேருந்து நடத்துநர் ராஜாவை, போக்குவரத்து கழகம் அதிரடியாக பணியிடை நீக்கம் செய்துள்ளது.
newstm.in