பட புரமோஷனுக்காக 172 அடி உயரத்திலிருந்து குதித்த அகில்
நடிகர் நாகார்ஜுனா, அமலா நட்சத்திர தம்பதியின் வாரிசான நடிகர் அகில் சுட்டிக்குழந்தை படத்திலிருந்து தனது திரையுலக பயணத்தை துவங்கிவிட்டார். தற்போது நாகசைதன்யா போல அவரும் இன்னொரு பக்கம் இளம் ஹீரோவாக தனக்கென ஒரு இடத்தை தக்க வைத்துக் கொண்டுள்ளார். இதுநாள் வரை சாக்லேட் ஹீரோ கதாபாத்திரங்களில் நடித்து வந்த அகில் தற்போது முதல் முறையாக ஏஜென்ட் என்கிற படத்தில் இந்திய உளவாளி கதாபாத்திரத்தில் கட்டுமஸ்தான தோற்றத்தில் நடித்துள்ளார்.
சுரேந்தர் ரெட்டி என்பவர் இயக்கியுள்ள இந்த படத்தில் நடிகர் மம்முட்டி மிக முக்கியமான அதிரடிப்படை கமாண்டோ கதாபாத்திரத்தில் நடித்துள்ளார். இந்த படம் வரும் ஏப்ரல் 21ஆம் தேதி திரையரங்கிகளில் ரிலீஸ் ஆக இருக்கிறது. இதனை தொடர்ந்து இந்த படத்தின் புரோமோஷன் நிகழ்ச்சிகளில் அகில் உள்ளிட்ட படக்குழுவினர் கலந்து கொண்டு வருகின்றனர். இந்த புரமோஷன் நிகழ்ச்சியின் ஒரு பகுதியாக சமீபத்தில் விஜயவாடாவில் உள்ள ஒரு 172 அடி உயர கட்டிடத்தில் இருந்து ரோப் கட்டியவாறு குதித்து அங்கே கூடி இருந்த தனது ரசிகர்களையும் பொதுமக்களையும் உற்சாகப்படுத்தி வியப்பில் ஆழ்த்தியுள்ளார் அகில்.