கர்நாடக மாநிலத்தில் வரும் மே 10ஆம் தேதி சட்டமன்ற தேர்தல் நடைபெறுகிறது. இதையடுத்து மே 13ஆம் தேதி வாக்குகள் எண்ணப்பட்டு, அன்றைய தினமே முடிவுகள் அறிவிக்கப்படும். இம்மாநிலத்தில் மொத்தமுள்ள 224 தொகுதிகளில் 113 இடங்களை கைப்பற்றும் கட்சியே ஆட்சிக் கட்டிலில் அமரும். மும்முனைப் போட்டியில் பாஜக, காங்கிரஸ், மதச்சார்பற்ற ஜனதா தளம் ஆகிய கட்சிகள் களத்தில் நிற்கின்றன.
வேட்புமனு தாக்கல்
பல்வேறு கட்டங்களாக வேட்பாளர்கள் பட்டியல் அறிவிக்கப்பட்ட நிலையில் தற்போது வேட்புமனு தாக்கல் மும்முரமாக நடந்து கொண்டிருக்கிறது. இந்நிலையில் 40 பேர் கொண்ட நட்சத்திர வேட்பாளர் பட்டியலை பாஜக தேசிய தலைமை வெளியிட்டுள்ளது. அதில் பிரதமர் மோடி, பாஜக தேசிய தலைவர் ஜே.பி.நட்டா, மத்திய அமைச்சர்கள் ராஜ்நாத் சிங், அமித் ஷா, நிதின் கட்கரி ஆகியோர் இடம்பெற்றுள்ளனர்.
பாஜக நட்சத்திர வேட்பாளர்கள்
இதையடுத்து கர்நாடக மாநில முன்னாள் முதல்வரும், பாஜக மூத்த தலைவருமான எடியூரப்பா இருக்கிறார். இவர் பாஜக கட்சி விதிகளின்படி தேர்தல் அரசியலில் இருந்து ஓய்வு பெற்று விட்டார். இருப்பினும் இவர் சார்ந்த லிங்காயத்து வாக்குகளில் சிக்கல் வந்துவிடக் கூடாது என பிரச்சாரக் குழுவில் முக்கியமான நபராக நியமிக்கப்பட்டுள்ளார்.
Karnataka Star Campaigners
எடியூரப்பா மகன்
மேலும் வேட்பாளர்கள் தேர்வு, தேர்தல் வாக்குறுதிகள், அதிருப்தி வேட்பாளர்களை சரிகட்டுதல் ஆகியவற்றிலும் கவனம் செலுத்தி வருகிறார். இவரது மகன் விஜயேந்திராவிற்கு சீட் வழங்கப்பட்டு லிங்காயத்து மக்களை ஆறுதல்படுத்தியுள்ளனர். மேலும் கர்நாடக மாநில பாஜக தலைவரும், எம்.பியுமான நளின் குமார் கட்டீல், முதல்வர் பசவராஜ் பொம்மை, மத்திய அமைச்சர் பிரகலாத் ஜோஷி,
மத்திய அமைச்சர்கள்
முன்னாள் முதல்வர் சதானந்தா கவுடா, முன்னாள் துணை முதல்வர்கள் கே.எஸ்.ஈஸ்வரப்பா, கோவிந்த் கர்ஜோல், அமைச்சர் ஆர்.அசோகா, மத்திய அமைச்சர்கள் நிர்மலா சீதாராமன், ஸ்மிருதி இரானி, தர்மேந்திர பிரதான், மன்சுக் மாண்டவியா ஆகியோர் இடம்பெற்றுள்ளனர். இதன் தொடர்ச்சியாக தமிழக பாஜக மாநிலத் தலைவர் கே.அண்ணாமலை பெயரும் உள்ளது.
அண்ணாமலை மட்டும்
இந்த பட்டியலில் தமிழகத்தில் இருந்து இடம்பெற்றுள்ள ஒரே ஒரு தலைவர் அண்ணாமலை மட்டுமே என்பது குறிப்பிடத்தக்கது. அதுவும் உத்தரப் பிரதேச முதல்வர் யோகி ஆதித்யநாத், அசாம் முதல்வர் ஹிமந்த பிஸ்வ சர்மா, மகாராஷ்டிர துணை முதல்வர் தேவேந்திர பட்னாவிஸ் ஆகியோருக்கு முன்பாக அண்ணாமலை பெயர் இடம்பெற்றிருப்பது சற்றே கவனம் பெற்றுள்ளது.
கர்நாடகாவில் ஐபிஎஸ் அதிகாரியாக பணியாற்றிய அனுபவம் இருப்பதால், அதை தேர்தல் அரசியலில் பயன்படுத்தி கொள்ள பாஜக திட்டமிட்டுள்ளது. மேலும் சி.டி.ரவி, சோபா கரந்த்லாஜே, ஏ.நாராயணசாமி, பகவந்த் கூபா, அரவிந்த லிம்பவள்ளி, ஸ்ரீராமுலு, கோடா ஸ்ரீனிவாச பூஜாரி, பசனகவுடா பட்டில் யாட்னால், உமேஷ் ஜாதவ், சாலவாடி நாராயணசாமி, என்.ரவிகுமார், ஜி.வி.ராஜேஷ், ஜக்கேஷ், ஸ்ருதி உள்ளிட்டோரின் பெயர்கள் நட்சத்திர வேட்பாளர்கள் பட்டியலில் இடம்பெற்றுள்ளன.