அதிமுக பொதுச்செயலாளர்
நேற்று (புதன்கிழமை) டெல்லி சென்று மத்திய உள்துறை அமைச்சர் அமித் ஷாவை சந்தித்தபிறகு கூட்டணி குறித்த குழப்பம் முடிவுக்கு வந்துள்ளது. அண்மைய காலமாக தமிழக பாஜக தலைவர் அண்ணாமலைக்கும், அதிமுகவினருக்கும் இடையே வாய்க்கா தகராறு இருந்து வந்தது. அது அதிமுக தலைமை வரைக்கும் எதிரொலித்தது.
செய்தியாளர் சந்திப்பில் எடப்பாடி பழனிசாமியை நேரிடையாகவே அண்ணாமலை கடுமையாக விமர்சித்தார். அதிமுகவுடன் கூட்டணி இல்லை என்ற நிலைபாட்டுக்கே வந்தார் அண்ணாமலை. இது இரு கட்சிகளுக்கும் இடையே பல்வேறு குழப்பத்தை ஏற்படுத்திய சூழலில் அதிமுகவின் பொதுச்செயலாளராக தேர்வான எடப்பாடி பழனிசாமி நேற்றைய தினம் டெல்லிக்கு சென்று அமித் ஷாவை சந்தித்தார்.
அவருடன் முன்னாள் அமைச்சர்கள் எஸ்.பி.வேலுமணி, ஜெயகுமார், சி.வி.சண்முகம், கே.பி.முனுசாமி மற்றும் பாஜக தேசிய தலைவர் ஜே.பி.நட்டா மற்றும் அண்ணாமலையும் உடன் இருந்தார். இது முக்கியம் வாய்ந்ததாக பார்க்கப்பட்டது. அந்த சந்திப்பிற்கு பிறகு டெல்லியில் செய்தியாளர்களை சந்தித்த எடப்பாடி பழனிசாமி ” அதிமுக – பாஜக கூட்டணி தொடர்கிறது. அண்ணாமலையுடன் எந்த தகராறும் இல்லை என்றும் தெரிவித்தார். இதனால் அண்ணாமலைக்கும் எடப்பாடி பழனிசாமிக்கும் இடையே இருந்து வந்த மோதல் போக்கு முடிவுக்கு வந்ததாக பார்க்கப்படுகிறது.
திமுக-வில் 8 அமைச்சர்கள் அதிமுக-வில் இருந்து சென்றவர்கள் தான் – எடப்பாடி பழனிசாமி
இந்த நிலையில், வரும் பாராளுமன்ற தேர்தலில் பாஜகவுக்கு இத்தனை சீட்டுகளை ஒதுக்க வேண்டும் என்று பாஜக தலைமை கேட்டதாகவும் அதற்கு ஈபிஎஸ் தரப்பில் பச்சை கொடி காட்டியதாகவும் பத்திரிகையாளர் கோலாகல ஸ்ரீநிவாஸ் கூறியதாக பிரபல செய்தி நிறுவனம் தகவல் வெளியிட்டுள்ளது.
அதாவது மூன்றில் ஒரு பங்கு சீட்டுகளை பாஜகவுக்கு ஒதுக்க வேண்டும் என்று அமித் ஷா கேட்க அதற்கு எடப்பாடி பழனிசாமி ஏற்றுக்கொண்டாராம். அதன்படி பாராளுமன்ற தேர்தலில் 13 சீட்டுகளை அதிமுக பாஜகவுக்கு ஒதுக்க முடிவு செய்துள்ளதாக அதில் தெரிவிக்கப்பட்டுள்ளது. சீட்டு பங்கீட்டில் டெல்லி பாஜகவும், அதிமுகவும் ஒரு முடிவுக்கு வந்துள்ளது. அதனால் அண்ணாமலையின் குறுக்கீடு எந்த பயனும் அளிக்காது என்கின்றனர். இவர் எண்ணமெல்லாம் 20 தொகுதிகளில் பாஜக போட்டியிடுவது என்பதுதான். இந்த 13 சீட்டுகள் விவகாரத்தில் அண்ணாமலையின் நிலைப்பாடு என்னதென்பது அடுத்தகட்ட நகர்வுகளில் தெரிய வரும்.