வெறுப்பு பேச்சு குறித்து புகார் வராவிட்டாலும் எஃப்ஐஆர் பதிவு செய்யப்பட வேண்டும் என உச்சநீதிமன்றம் உத்தரவிட்டுள்ளது.
இந்தியாவில் கடந்த 2014ம் ஆண்டு பாஜக ஆட்சி அமைத்தது முதலே முஸ்லிம்கள் மற்றும் கிறிஸ்தவர்கள் உள்ளிட்ட சிறுபான்மையினருக்கு எதிரான வன்முறைகள் அதிகரித்து வருவதாக எதிர்கட்சிகள் மற்றும் சமூக ஆர்வலர்கள் குற்றம்சாட்டி வருகின்றன. மாட்டுக்கறி வைத்திருப்பதாக கூறி கும்பல் கொலை, ராமநவமி ஊர்வலங்களில் திட்டமிட்டு வன்முறை, சிறுபான்மையினருக்கு எதிரான வெறுப்பு பேச்சுக்கள், மாடுகள் கடத்தப்படுவதாக கூறி கொலை என வன்முறை அதிகரித்துக் கொண்டே செல்கிறது.
மசூதிகள் உடைப்பு, மசூதிகளில் இந்துதுவானர் கொடியேற்றுவது, சர்ச்சுகளை எரிப்பது, மதமாற்றுவதாக கூறி தாக்குதல் என பல்வேறு சம்பவங்கள் நாள்தோறும் சமூக வலைதளங்களில் பேசு பொருளாகி வருகிறது. சமீபத்தில் கூட தொழுகையில் ஈடுபட்டதற்காக 1700 முஸ்லிம்கள் மீது உத்தரபிரதேசத்தில் எஃப்ஐஆர் பதிவு செய்யப்பட்டுள்ளது. முஸ்லிம்களின் வீடுகள் புல்டோசர் கொண்டு இடிக்கப்படுவது வழக்கமாகி விட்டன.
சிறுபான்மையினருக்கு எதிரான வெறுப்பு பேச்சுக்கள் பொது வெளியிலும், ஊடகங்களில் வெளிப்படையாக இந்துத்துவவாதிகளால் பேசப்பட்டு வருகிறது. சிறந்த உதாரணம் நுபுர் சர்மா தான். அதேபோல் லவ் ஜிகாத் என்ற பெயரில் இந்து பெண்களை குறிவைத்து முஸ்லிம் இளைஞர்கள் செயல்படுவதாகவும், திருமணத்திற்கு பின் ஜிகாதிகளாக அவர்கள் மாற்றுவதாகவும் வலதுசாரிகள் குழப்பத்தை ஏற்படுத்தி வருகின்றனர். இந்த சூழலில் வெறுப்பு பேச்சுக்காக ஒன்றிய அமைச்சர் அனுராக் தாக்கூர் மற்றும் சிலபேர் மீது எஃப்ஐஆர் பதிவு செய்ய வேண்டும் எனக்கூறி தாக்கல் செய்யப்பட்ட மனுவில் உச்சநீதிமன்றம் பரபரப்பு உத்தரவுகளை பிறப்பித்துள்ளது.
உச்சநீதிமன்ற நீதிபதிகள் கேஎம் ஜோசப் மற்றும் பிவி நாகரத்னா ஆகியோர் அடங்கிய அமர்வு இட்ட உத்தரவில், ‘‘மதச்சார்பின்மை என்ற இந்திய அரசியல் சாசனத்தை மீற நாங்கள் அனுமதிக்க மாட்டோம். இனி எந்த மாநிலத்திலாவது சிறுபான்மையினருக்கு எதிரான வெறுப்பு பேச்சுக்கள் பேசப்பட்டால், புகார் தரப்படாவிட்டலும் சம்மந்தப்பட்ட நபர்கள் மீது எஃப்ஐஆர் பதிவு செய்யப்பட வேண்டும். இது அனைத்து மாநிலங்கள் மற்றும் யூனியன் பிரதேசங்களுக்கும் பொருந்தும்.
வழக்கு பதிவு செய்வதில் கால தாமதம் செய்யப்பட்டால், அது உச்சநீதிமன்றத்தை அவமதித்ததாகவே கருதப்பட்டு நடவடிக்கை எடுக்கப்படும். நாங்கள் அரசியல்வாதிகள் அல்லர், நாட்டின் அரசியல் சாசனத்தை காப்பது தான் எங்களது பணி’’ என நீதிபதிகள் கூறியுள்ளனர். மேலும் மே 12ம் தேதி அடுத்த கட்ட விசாரணை நடக்கும் என நீதிபதிகள் தெரிவித்துள்ளனர்.