கர்நாடகா தேர்தலில்
காங்கிரஸ்
கட்சி 140 தொகுதிகளில் வெற்றி பெரும் என புதிய கருத்து கணிப்பில் தெரியவந்துள்ளது.
கர்நாடகா தேர்தல்
கர்நாடகாவில் சட்டசபை தேர்தலுக்கு இன்னும் 12 நாட்களே உள்ளன. மிகுந்த முக்கியத்துவம் வாய்ந்த தேர்தலாக இந்த தேர்தல் பார்க்கப்படுகிறது. தென் மாநிலத்தில் பாஜக ஆட்சியில் இருக்கும் ஒரே மாநிலம் என்பதால், ஆட்சியை பிடிக்க அக்கட்சி பல்வேறு வியூகங்களை அமைத்து செயல்பட்டு வருகிறது. அதேபோல் மிக்க செல்வாக்கு உள்ள கர்நாடகாவில் ஆட்சியை பிடிக்க காங்கிரஸ் தீவிரமாக வேலை செய்து வருகிறது.
கடந்த 2018 சட்டமன்ற தேர்தலில் எந்த கட்சிக்கும் பெரும்பான்மை கிடைக்க வில்லை. காங்கிரஸ் 80 இடங்களையும், பாஜக 108 இடங்களையும், மதச்சார்பற்ற ஜனதா தளம் 37 இடங்களையும் வென்றது. 224 சட்டப்பேரவை தொகுதிகளைக் கொண்ட கர்நாடகாவில், 113 இடங்களில் வெல்லும் கட்சியே பெரும்பான்மை பலத்துடன் ஆட்சி அமைக்க முடியும் இந்த சூழலில் காங்கிரஸ் மற்றும் மதச்சார்பற்ற ஜனதா தளமும் கூட்டணி அமைத்து ஆட்சியமைத்தது.
குதிரை பேரம்
இந்த சூழலில் ஆட்சிகாலம் முடியும் முன்னரே கூட்டணி கட்சிகள் எம்எல்ஏக்கள் பாஜகவிற்கு தாவினர். அதைத் தொடர்ந்து மாநிலத்தில் பாஜக ஆட்சியை பிடித்தது. இந்த நிலமை மீண்டும் வரக்கூடாது என்பதற்காக பெரும்பான்மை பலத்திற்காக 150 இடங்களை கைப்பற்ற வேண்டும் என ராகுல் காந்தி பேசிவருகிறார். 100 அல்லது 120 இடங்களை கைப்பற்றினால், பாஜக மீண்டும் குதிரை பேர அரசியல் செய்து எம்எல்ஏக்களை விலைக்கு வாங்கிவிடும் என அவர் உறுதியாக தெரிவித்துள்ளார்.
அதேபோல் தேர்தலுக்கு முந்தைய பல்வேறு கருத்து கணிப்புகளும் காங்கிரஸ் கட்சிதான் ஆட்சியை பிடிக்கும் என கணித்துள்ளன. இந்த சூழலில் 140 இடங்களை கைப்பற்றி காங்கிரஸ் கட்சி ஆட்சியமைக்கும் என புதிய கருத்து கணிப்பில் தெரியவந்துள்ளன. eedina நடத்திய கருத்து கணிப்பில் கூறப்பட்டுள்ளதாவது, ‘‘காங்கிரஸ் கட்சி 132 முதல் 140 இடங்களில் வென்று ஆட்சியமைக்கும். பாஜக 57 முதல் 65 இடங்களையே கைப்பற்றும் எனவும், மதச்சார்பற்ற ஜனதா தளம் 19 முதல் 25 இடங்களில் வெற்றி பெறும்.
புது கருத்து கணிப்பு
அதேபோல் காங்கிரஸ் கட்சி 43 சதவிகித வாக்குகளையும், பாஜக 33 சதவிகித வாக்குகளையும், மதச்சார்பற்ற ஜனதா தளம் 16 சதவிகித வாக்குகளையும் பெறும். மும்பை கர்நாடகா பிராந்தியத்தில் மட்டும் காங்கிரஸ் 40 முதல் 46 இடங்களில் காங்கிரஸ் வெற்றி பெறும். அதேபோல் 33 சதவிகித மக்கள் இந்த பாஜக ஆட்சி தொடர வேண்டும் எனவும் மீதமுள்ள 67 சதவிகித மக்கள் பாஜக ஆட்சி தொடரக்கூடாது என தெரிவித்துள்ளனர்’’ என கருத்து கணிப்பில் கூறப்பட்டுள்ளது.
ஹிஜாப் விவகாரம், அரசு டெண்டர்களுக்கு 40 சதவிகித கமிஷன், வேலையில்லா திண்டாட்டம், விலைவாசி ஏற்றம், ஒக்கலிகா மற்றும் லிங்காயத் சமூகங்களுக்கான இடஒதுக்கீடு விவகாரம் ஆகிய காரணிகள் பாஜகவிற்கு எதிரான மனநிலையை உருவாக்கியுள்ளதாக விவரம் அறிந்தவர்கள் கூறுகின்றனர்.