இம்பால்:
தேவாலயங்களை இடிப்பதற்கும், காடுகளை கணக்கெடுப்பதற்கும் எதிர்ப்பு தெரிவித்து மணிப்பூரில் பயங்கர கலவரம் ஏற்பட்டுள்ளது. இதன் ஒருபகுதியாக, இன்று முதல்வர் பிரென் சிங் கலந்துகொள்ள இருந்த நிகழ்ச்சி அரங்கையும், அவர் திறக்கவிருந்த இடங்களையும் மக்கள் தீக்கிரையாக்கி உள்ளனர்.
வடகிழக்கு மாநிலங்களில் ஒன்றான மணிப்பூரில் முதல்வர் பிரென் சிங் தலைமையில் பாஜக கூட்டணி ஆட்சி நடைபெற்று வருகிறது. பொதுவாக, மணிப்பூர், மேகாலயா, மிசோராம் உள்ளிட்ட வடகிழக்கு மாநிலங்களில் கிறிஸ்தவர்களின் எண்ணிக்கை அதிகம்.
எனவே பாஜகவால் வடகிழக்கு மாநிலங்களில் காலூன்றவே முடியாத நிலை இருந்தது. ஆனால், தற்போது கூட்டணி அரசியல் மூலமாக வடகிழக்கு பிராந்தியங்களில் பாஜக மெல்ல மெல்ல தடம்பதித்து வருகிறது.
தேவாலயங்கள் இடிப்பு:
அந்த வகையில், கூட்டணிக் கட்சிகளின் ஆதரவுடன் மணிப்பூரில் பாஜக ஆட்சியை பிடித்திருக்கிறது. பாஜக ஆட்சி அமைந்தது முதலாகவே மணிப்பூரில் கிறிஸ்தவ மற்றும் இஸ்லாமிய மக்களின் உணர்வுக்கு எதிராக பல்வேறு நடவடிக்கைகள் எடுக்கப்பட்டு வருவதாக தொடர்ந்து குற்றச்சாட்டு எழுந்து வந்தது. குறிப்பாக, கிறிஸ்தவர்களின் தேவாலயங்களை அகற்றும் நடவடிக்கைகள் அங்கு முன்னெடுக்கப்பட்டு வருகின்றன. இதுவரை அங்கு 3 பெரிய தேவாலயங்களை அரசு அகற்றியுள்ளது.
கொந்தளித்த மக்கள்:
விதிகளை மீறி கட்டப்பட்டிருப்பதாக கூறி இந்த தேவாலயங்கள் இடிக்கப்பட்டிருக்கின்றன. இதை தவிர, பழங்குடி மக்கள் வசிக்கும் பகுதிகளை அரசுக்கு சொந்தமான இடம் எனக் கூறி கையகப்படுத்தும் நடவடிக்கைகளிலும் பாஜக அரசு ஈடுபட்டுள்ளது. இதற்கு எதிர்ப்பு தெரிவித்து மணிப்பூரில் ஆங்காங்கே போராட்டங்களும், வன்முறைச் சம்பவங்களும் நடைபெற்று வந்தன.
வெடித்தது கலவரம்:
இந்நிலையில், சூராச்சந்தபூர் மாவட்டத்தில் பெருமளவில் வசிக்கும் ஒரு பழங்குடியினக் குழுவைச் சேர்ந்த மக்கள், பாஜக அரசுக்கு எதிராக வன்முறையில் குதித்துள்ளனர். முதல்வர் பிரென் சிங் இன்று அந்த மாவட்டத்துக்கு வருவதற்கு எதிர்ப்பு தெரிவிக்கும் வகையில் நடந்த போராட்டம் பெரும் கலவரமாக மாறியது. இதன் ஒருகட்டமாக, முதல்வர் இன்று காலை கலந்துகொள்ள இருந்த ஒரு நிகழ்ச்சியின் அரங்குகளை பழங்குடியின மக்கள் அடித்து நொறுக்கி தீக்கிரையாக்கினர். மேலும், அவர் திறந்து வைக்க இருந்த உடற்பயிற்சிக் கூடம், மைதானம் உள்ளிட்டவற்றுக்கும் மக்கள் தீ வைத்தனர்.
இணையச் சேவை ரத்து:
இதனால் அங்கு பெரும் கலவரச் சூழல் ஏற்பட்டது. இதையடுத்து, அங்கு வந்த போலீஸார், மக்களை அங்கிருந்து கலைக்க முயற்சித்தனர். இதில் போலீஸாருக்கும், போராட்டக்காரர்களுக்கும் இடையே மோதல் ஏற்பட்டது. இதில் நூற்றுக்கணக்கானோர் காயமடைந்தனர். பல வாகனங்கள் தீக்கிரையாக்கப்பட்டன. கலவரத்தை கட்டுப்படுத்த முடியாமல் போலீஸார் திணறி வருகின்றன. இதனால் நிலைமையை சீராக்க துணை ராணுவப் படையினர் வரவழைக்கப்பட்டுள்ளனர். இதனிடையே, இந்தக் கலவரம் மற்ற மாவட்டங்களுக்கும் பரவாமல் தடுக்க, இணைய சேவைகள் ரத்து செய்யப்பட்டுள்ளன. 144 தடை உத்தரவும் பிறப்பிக்கப்பட்டுள்ளது.