பெங்களூர்:
தமிழ்த்தாய் வாழ்த்து பாடலின் மெட்டு சரியில்லாத காரணத்தாலேயே அது பாதியிலேயே நிறுத்தப்பட்டதாக தமிழ்நாடு பாஜக தலைவர் அண்ணாமலை கூறியிருப்பது சர்ச்சையை ஏற்படுத்தியுள்ளது.
கர்நாடகா சட்டமன்றத் தேர்தலை முன்னிட்டு அங்குள்ள ஷிவமொக்கா நகரில் நேற்று மதியம் பாஜக சார்பில் பிரச்சாரப் பொதுக்கூட்டம் நடைபெற்றது. அப்போது நிகழ்ச்சி தொடங்குவதற்கு முன்பாக அங்கு தமிழ்த்தாய் வாழ்த்து ஒலிபரப்பட்டது.
தமிழ்த்தாய் வாழ்த்து ஒலித்துக் கொண்டிருந்த போது, திடீரென பாஜக எம்எல்ஏ ஈஸ்வரப்பா கையை உயர்த்தி பயங்கரமாக சத்தம் போட்டார். பின்னர், மைக் அருகே சென்ற அவர், யார் தமிழ்த்தாய் வாழ்த்து பாடலை ஒலிபரப்பியது.. இது கர்நாடகா.. கன்னட கீதத்தை போடுங்கள்” எனக் கூறி கடுமையாக திட்டினார். உடனடியாக நிகழ்ச்சி ஏற்பாட்டாளர்கள் பாதியிலேயே தமிழ்த்தாய் வாழ்த்தை நிறுத்தி, கன்னட நாட்டு கீதத்தை ஒலிக்கச் செய்தனர்.
இந்த சம்பவம் நிகழ்ந்த போது, அண்ணாமலை மேடையில் நின்று கொண்டிருந்தார். எனினும், தமிழ்த்தாய் வாழ்த்து நிறுத்தப்பட்டதற்கு அவர் எதிர்வினை ஏதும் ஆற்றவில்லை. கர்நாடகாவில் தமிழக பாஜக தலைவர் முன்பே தமிழ்தாய் வாழ்த்து அவமதிக்கப்பட்டது பெரும் அதிர்வலைகளை ஏற்படுத்தியது. இந்த சம்பவத்துக்கு திமுக எம்.பி. கனிமொழி, பாமக நிறுவனர் ராமதாஸ் உள்ளிட்ட தலைவர்கள் கடும் கண்டனம் தெரிவித்துள்ளனர்.
இந்நிலையில், கனிமொழியின் கண்டனத்துக்கு பதிலளித்திருந்த அண்ணாமலை, , “அடித்துக் கொண்டு புரள அது திமுக மேடை இல்லை. ஒவ்வொரு மாநிலத்தின் மாநில கீதம் பாடிய பிறகுதான் வேறு மாநிலத்தின் வாழ்த்துப் பாடல் இசைக்கப்படும் என்பது நியதி. அந்த நியதியை தான் கர்நாடக மாநில முன்னாள் துணை முதல்வர் திரு ஈர்வரப்பா செய்தார்” எனக் கூறியிருந்தார்.
இந்த சூழலில், பெங்களூரில் தனியார் தொலைக்காட்சி நிருபர் ஒருவர் அண்ணாமலையிடம், கர்நாடகாவில் முதலில் கன்னட கீதம்தான் இசைக்கப்பட வேண்டும்.. அதன் பிறகே மற்ற மாநில கீதங்கள் இசைக்கப்படும் எனக் கூறினீர்கள். அதன்படி, நேற்று கன்னட கீதம் இசைக்கப்பட்ட பிறகு, தமிழ்த்தாய் வாழ்த்து பாடல் ஒலிபரப்பப்பட்டதா?” என்று கேள்வி எழுப்பினார்.
அதற்கு பதிலளித்து அண்ணாமலை கூறியதாவது: ஷிவமொக்காவில் நேற்று நடந்த பாஜக பிரச்சாரப் பொதுக்கூட்டத்தின் போது, கன்னட நாட்டு கீதத்தை ஒலிபரப்புமாறு எம்எல்ஏ ஈஸ்வரப்பா கூறினார். ஆனால், ஆபரேட்டர்கள் தவறுதலாக தமிழ்த்தாய் வாழ்த்துப் பாடலை ஒலிபரப்பிவிட்டனர். அந்த தமிழ்த்தாய் வாழ்த்து பாடல் கூட சரியான பாடல் இல்லை. அதனுடைய ட்யூன், மெட்டு ஆகியவை சரியாக இல்லை. அது நமது தமிழ்த்தாய் வாழ்த்து பாடலை அவமதிப்பதாகவே இருந்தது.
இதை நான் ஈஸ்வரப்பாவின் கவனத்துக்கு கொண்டு சென்றேன். உடனே அவர், தமிழ்த்தாய் வாழ்த்து பாடலை நிறுத்த சொன்னார். அதன் பிறகு, கன்னட நாட்டு கீதம் ஒலிபரப்பப்பட்டது. மெட்டு சரியில்லாததால் மீண்டும் தமிழ்த்தாய் வாழ்த்து பாடலை போட வேண்டாம் என நான் கூறிவிட்டேன்” என அண்ணாமலை கூறினார்.