பெங்களூர்:
12-ம் வகுப்பில் குறைந்த மதிப்பெண் வாங்கியதற்காக ஐடி ஊழியருக்கு வாடகைக்கு வீடு தர மறுத்த சம்பவம் பெங்களூரில் பெரும் அதிர்ச்சியை ஏற்படுத்தி இருக்கிறது. மேலும், பெங்களூரில் வீட்டு ஓனர்களின் அட்ராசிட்டி எல்லை மீறி செல்வதாக சமூக வலைதளங்களில் பலர் பதிவிட்டு வருகின்றனர்.
இந்தியாவின் ஐடி தலைநகரமாக விளங்குகிறது பெங்களூர். பெரிய பெரிய வெளிநாட்டு ஐடி நிறுவனங்கள் தங்கள் தொழிலை தொடங்க பெங்களூரைதான் முதலில் தேர்வு செய்கின்றன. இதனால் அங்கு ஐடி ஊழியர்களின் எண்ணிக்கையும் கணிசமாக அதிகரித்து வருகிறது. இப்போதைய சூழலில், அங்கு சுமார் 20 லட்சத்துக்கும் மேற்பட்ட ஐடி ஊழியர்கள் இருப்பதாக கூறப்படுகிறது. இவ்வாறு ஐடி ஊழியர்கள் அதிகரித்ததால் சொந்தமாக வீடு வைத்திருப்பவர்கள் காட்டில் மழை பெய்து வருகிறது.
தாங்கள் சொல்வதுதான் வாடகை.. தாங்கள் கூறுவதுதான் சட்டம் என அவர்கள் செய்யும் அராஜகம் சமீபகாலமாக அதிகரித்து வருகிறது.
கிட்னி விற்பனைக்கு:
சாதாரண ஒரு பெட்ரூம் இருக்கும் வீட்டுக்கு கூட சர்வசாதாரணமாக ரூ.20 ஆயிரம் வரை வசூலிக்கப்படுகிறது. அப்படியென்றால் நினைத்து பாருங்கள்.. வீட்டில் கொஞ்சம் வசதி இருந்தால் வாடகை எப்படி இருக்கும் என்று.. இரண்டு மாதங்களுக்கு முன்பு கூட, ஒரு சாஃப்ட்வேர் இன்ஜினியர், வாடகை வீட்டுக்கு முன்பணம் கொடுப்பதற்காக தனது கிட்னியை விற்க தயாராகி போஸ்டர் ஒட்டிய சம்பவங்களும் அங்கு அரங்கேறின.
அடுத்த சம்பவம்:
நிலைமை இவ்வாறு இருக்க, தற்போது பெங்களுரில் உள்ள ஒரு வீட்டு உரிமையாளர் தன் பங்குக்கு ஒரு சம்பவத்தை செய்திருக்கிறார். இதுதொடர்பாக பாதிக்கப்பட்ட நபரின் மாமாவான ஷுப் என்பவர் ட்விட்டர் பக்கத்தில் ஒரு பதிவை போட்டுள்ளார்.
என்ன கூத்து..?
அதில், “எனது அக்கா மகனுக்கு பெங்களூரில் உள்ள ஒரு ஐடி நிறுவனத்தில் நல்ல சம்பளத்தில் வேலை கிடைத்தது. இதையடுத்து, வாடகைக்கு வீடு தேடும் படலத்தை அவன் தொடங்கி இருக்கிறான். அந்த வகையில், கடந்த வாரம் ஒரு வீட்டை சென்று பார்த்திருக்கிறான். வீடு அவனுக்கு பிடித்து போக, அந்த வீட்டு உரிமையாளரை தொடர்புகொண்டு வாடகை பற்றி விசாரித்திருக்கிறான்.
என்னய்யா மார்க் வாங்கிருக்க..
அதற்கு அவர் ஒரு பெரிய தொகையை வாடகையாக கூற, அவனும் சம்மதித்துள்ளான். ஆனால், அதன் பிறகு அவனது 12-ம் வகுப்பு மதிப்பெண் பட்டியலை அவர் கேட்டிருக்கிறார். அதை பார்த்த வீட்டு உரிமையாளர், 75 சதவீதம் தான் மதிப்பெண் வாங்கி இருக்கிறீர்கள்.. 90 சதவீதம் மதிப்பெண் எடுத்தவருக்குதான் வீடு கொடுப்பேன் என கறாக கூறி இருக்கிறார். இதனால அவனுக்கு வீடு கிடைக்கவில்லை” எனக் கூறியிருக்கிறார்.
மாரக் முக்கியம் குமாரு..
மேலும், அந்த பதிவுக்கு கீழே அந்த வீட்டு உரிமையாளருடன் தனது மருமகன் செய்த வாட்ஸ் அப் சாட்டிங்கையும் ஸ்க்ரீன் ஷாட் எடுத்து அவர் போட்டுள்ளார். அதிற்கு மேலே “மதிப்பெண்கள் உங்கள் எதிர்காலத்தை தீர்மானிக்காது; ஆனால் பெங்களூரில் நீங்கள் இருக்க வேண்டுமா இல்லையா என்பதை நிச்சயம் தீர்மானிக்கும்” என கிண்டலாக கூறி இருக்கிறார். இந்த பதிவு தற்போது சமூக வலைதளங்களில் வைரலாக பரவிக் கொண்டிருக்கிறது. அதில் பெங்களூர்வாசிகள் பலர் தாங்கள் வாடகைக்கு வீடு தேடும் போது சந்தித்த கசப்பான அனுபவங்களை பகிர்ந்து வருகின்றனர்.