உலக பத்திரிக்கை சுதந்திர குறியீட்டில் இந்தியா 161வது இடத்தில் உள்ளது.
உலகம் முழுவதும் இன்று பத்திரிக்கை சுதந்திர நாள் கொண்டாடப்படுகிறது. அதைக் கொண்டாடும் வகையில் தமிழ்நாடு முதல்வர் முக ஸ்டாலின் தனது ட்விட்டர் பதிவில், ‘‘உலகப் பத்திரிகை சுதந்திர நாளில், பல்வேறு தாக்குதல்கள், அச்சுறுத்தல்களுக்கு இடையேயும் ஜனநாயகத்தின் நான்காவது தூணை வலிமையாக வைத்திருக்க வேண்டி மனச்சான்றுப்படி பணியாற்றும் துணிச்சல்மிகு பத்திரிகையாளர்கள் அனைவருக்கும் எனது பாராட்டுகளைத் தெரிவித்துக் கொள்கிறேன்’’ என்று தெரிவித்துள்ளார்.
ஜனநாயகத்தின் நான்காவது தூணாக ஊடகத்துறை பார்க்கப்படுகிறது. அந்த வகையில் உலகின் பெரிய ஜனநாயக நாடான இந்தியாவில் பத்திரிக்கை சுதந்திரம் என்பது பாஜக ஆட்சிக்கு வந்த 2014ம் ஆண்டு முதலே கேள்விக்குறியாகி வருவதாக எதிர்கட்சிகளும் ஜனநாயகவாதிகளும் குற்றம்சாட்டி வருகின்றனர். ஊடகங்கள் மீது பல்வேறு தாக்குதல்கள் நடத்தப்பட்டு வருகின்றன.
பிரதமர் மோடியையும், ஆளும் பாஜகவையும் கேள்வி கேட்கும் ஊடகங்களில் வருமான வரி சோதனைகள் நடத்தப்பட்டு, அச்சுறுத்தப்படுவதாக ராகுல் காந்தி தொடர்ந்து குற்றம்சாட்டி வருகிறார். 2002ம் ஆண்டு குஜராத்தில் நடந்த கலவரத்தில் ஆயிரக்கணக்கான முஸ்லிம்கள் கொல்லப்பட்டனர். பெண்ணின் கருவை கிழித்து சிசுவை பாறையில் அடித்து கொன்ற அவலமும் நடந்தது.
இந்த கலவரத்திற்கு அப்போதைய குஜராத் முதல்வர் நரேந்திர மோடிக்கு நேரடி தொடர்பு இருந்ததாக ஆதாரங்களுடன், இங்கிலாந்தைச் சேர்ந்த பிரபல ஊடகம் பிபிசி ஆவணப்படங்களை வெளியிட்டது. அந்த படங்களை இந்திய அரசு தடை செய்ததுடன், டெல்லி மற்றும் மும்பையில் இருக்கும் பிபிசி அலுவலகங்களில் ரெய்டு நடத்தப்பட்டது. இதை அமெரிக்காவும், இங்கிலாந்தும் கண்டித்தன. ஊடக நிறுவனங்கள் சுதந்திரத்துடன் செயல்பட வேண்டும் என வலியுறுத்தின.
ஆனால் அதை எல்லாம் கவனத்தில் கொள்ளாத பாஜக அரசு, இந்தியாவையும், பிரதமர் மோடியின் நற்பெயருக்கு களங்கம் விளைவிக்கும் வெளிநாட்டு சதி என இந்திய வெளியுறவுத்துறை அமைச்சகம் தெரிவித்தது. அதேபோல் மக்களின், விவசாயிகளின், வேலை இல்லாத இளைஞர்களின் பிரச்சனைகளை பற்றி விவாதம் நடத்தாத ஊடகங்கள், பிரதமர் மோடியை வானளாவ புகழ்ந்து வருவதாக ராகுல் காந்தி குற்றம்சாட்டி வருகிறார்.
இந்த சூழலில் இன்று உலக நாடுகளின் பத்திரிக்கை சுதந்திர குறியீடு வெளியிடப்பட்டுள்ளது. பத்திரிக்கை சுதந்திரத்தில் மொத்தம் உள்ள 180 நாடுகளில் இந்தியா 161 இடத்தை பெற்றுள்ளது. கடந்த 2022ம் ஆண்டில் 150வது இடத்தில் இந்தியா இருந்தது குறிப்பிடதக்கது. அதேபோல் தாலிபான்கள் ஆட்சி செய்யும் ஆப்கானிஸ்தான் 152 இடத்திலும், ராணுவத்தின் கட்டுப்பாட்டில் உள்ள பாகிஸ்தான் 150வது இடத்திலும் உள்ளது. முதல் இடத்தில் நார்வே மற்றும் அமெரிக்கா 45வது இடத்திலும் இருக்கிறது. ஊடக சுதந்திரத்தில் இந்தியா தொடர்ந்து பின்தங்கி வருவது ஜனநாயகவாதிகளிடையே அதிர்ச்சியை ஏற்படுத்தியுள்ளது.