இம்பால்:
மணிப்பூரில் பழங்குடியினருக்கும், பழங்குடி அல்லாத மக்களுக்கும் இடையே ஏற்பட்ட மோதல் தற்போது பயங்கர கலவரமாக மாறியுள்ளது. இரு தரப்பினரும் மூர்க்கத்தனமாக சண்டையிட்டுக் கொள்வதால் அங்கு பதற்றமான சூழல் நிலவுகிறது. வீடுகள், கட்டிடங்கள், வாகனங்களுக்கும் தீ வைக்கப்பட்டு வருவதால் மணிப்பூரே போர்க்கோலம் பூண்டிருக்கிறது.
வடகிழக்கு மாநிலங்களில் ஒன்று மணிப்பூர். இங்கு முதல்வர் பிரென் சிங் தலைமையில் பாஜக கூட்டணி ஆட்சி நடைபெற்று வருகிறது. இங்கு பழங்குடியின மக்கள் அதிக அளவில் வசித்து வருகிறார்கள். அதேபோல, பல்வேறு இனக் குழுக்களைச் சேர்ந்த மக்களும் அங்கு பரவலாக உள்ளனர்.
இவர்களுக்கு இடையே அவ்வப்போது மோதல் ஏற்படுவது வழக்கம். மணிப்பூரின் பூர்வக்குடி மக்கள் யார் என்ற போட்டியில் அவர்களுக்கு இடையே இதுபோன்ற மோதல் சம்பவங்கள் ஏற்பட்டு வருகின்றன.
எஸ்டி அந்தஸ்து கோரும் மெய்டெய்ஸ் மக்கள்:
இந்நிலையில், மணிப்பூரில் பரவலாக வசிக்கும் ‘மெய்டெய்ஸ்’ சமூக மக்கள் தங்களுக்கு பழங்குடியினர் (scheduled Tribe) அந்தஸ்து வழங்கக் கோரி பேரணி, ஆர்ப்பாட்டம் போன்றவற்றில் ஈடுபட்டு வருகின்றனர். இவர்கள் இம்பால் பள்ளத்தாக்கு உள்ளிட்ட பகுதிகளில் அதிக அளவில் இருப்பதால், வாக்கு வங்கிக்காக அவர்களின் கோரிக்கையை பாஜக அரசு ஏற்றுக்கொள்வதற்கான சமிக்ஞைகள் அங்கு தென்படுகின்றன.
எஸ்டி அந்தஸ்து தரக்கூடாது..
இதனால் பழங்குடியின சமூகங்களைச் சேர்ந்த மக்கள் கடும் அதிருப்தி அடைந்துள்ளனர். மெய்டெய்ஸ் சமூகத்தினருக்கு பழங்குடியின அந்தஸ்து தரக்கூடாது எனக் கூறி பழங்குடியின மக்கள் கடந்த சில தினங்களாக பெரும் போராட்டத்தில் ஈடுபட்டனர். மணிப்பூரில் கிட்டத்தட்ட அனைத்து மாவட்டங்களிலும் இந்தப் போராட்டங்கள் நடைபெற்றன. இதன் ஒருபகுதியாக, சர்வாசந்த்பூர் மாவட்டத்தில் பழங்குடியின சமூகங்கள் சார்பில் ஒற்றுமை பேரணி கடந்த திங்கள்கிழமை நடைபெற்றது.
பழங்குடி vs பழங்குடி அல்லாத மக்கள்:
அப்போது, மெய்டெய்ஸ் மக்கள் வசிக்கும் இடத்துக்கு அருகே பேரணி சென்ற போது, சிலர் அவர்களின் வீடுகளின் மீது கல்வீச்சில் ஈடுபட்டதாக தெரிகிறது. இதையடுத்து, மெய்டெய்ஸ் மக்கள் கத்தி, அரிவாள் போன்ற பயங்கர ஆயுதங்களுடன் வந்து எதிர் தாக்குதல் நடத்திய போது பெரும் மோதல் வெடித்தது. இதுகுறித்த செய்தி மற்ற மாவட்டங்களுக்கும் பரவியதால், அது பழங்குடியின மக்களுக்கும், பழங்குடி அல்லாத மக்களுக்கும் இடையே கலவரமாக வெடித்தது.
வெடித்தது பயங்கர கலவரம்:
இரு தரப்பினரும் ஒருவர் மீது ஒருவர் தாக்குதல் நடத்துவதுடன் வீடுகள், கட்டிடங்களுக்கும் தீ வைத்து வருகின்றனர். ஆயிரக்கணக்கான வாகனங்கள் தீக்கிரையாக்கப்பட்டுள்ளன. மோதலில் பெண்கள், குழந்தைகள் உட்பட நூற்றுக்கணக்கானோர் படுகாயம் அடைந்துள்ளனர். மோதலை தடுக்க வரும் போலீஸார் மீதும் இரு தரப்பினருமே தாக்குதல் நடத்துவதால், போலீஸாரால் ஊருக்குள் நுழைய முடியாத நிலை ஏற்பட்டிருக்கிறது. 3 தினங்களாக மணிப்பூரில் பயங்கர கலவரம் ஏற்பட்டு வருகிறது.
களம் இறங்கிய ராணுவம்:
நிலைமை கைமீறி செல்வதை உணர்ந்த மத்திய உள்துறை அமைச்சர் அமித் ஷா, முதல்வர் பிரென் சிங்கை நேற்று தொலைபேசியில் தொடர்பு கொண்டு பேசினார். இதையடுத்து, நிலைமையை சமாளிக்க துணை ராணுவத்தினரை அனுப்புவதாக அமித் ஷா உறுதி அளித்தார். இதன்பேரில், அங்கு அசாம் ரைஃபிள்ஸ் துணை ராணுவப் படையினர் மணிப்பூரில் குவிக்கப்பட்டு வருகின்றனர். இதேபோல, ராணுவத்தினரும் மணிப்பூருக்கு அனுப்பப்பட்டு வருகின்றனர்.
144 தடை உத்தரவு..
மேலும், மணிப்பூர் முழுவதும் இணைய சேவை ரத்து செய்யப்பட்டுள்ளது. பெரும்பாலான மாவட்டங்களில் 144 தடை உத்தரவு போடப்பட்டுள்ளதாக மத்திய உள்துறை அமைச்க வட்டாரங்கள் தெரிவிக்கின்றன. இந்தக் கலவரத்தில் உயிர்ச்சேதம் ஏதும் ஏற்பட்டுள்ளதா, எத்தனை பேர் காயம் அடைந்திருக்கிறார்கள் என்பன போன்ற எந்த தகவலும் அதிகாரப்பூர்வமாக தெரிவிக்கப்படவில்லை.