வருகிற 10ம் தேதி கர்நாடகாவில் தேர்தல் நடைபெறும் நிலையில், இன்றுடன் தேர்தல் பிரச்சாரம் நிறைவடைந்தது.
கர்நாடகா மாநிலத்தில் வருகிற 10ம் தேதி நடைபெற இருக்கும் சட்டமன்ற தேர்தல் மிகுந்த முக்கியத்துவம் வாய்ந்ததாக கருதப்படுகிறது. தென் இந்தியாவின் பாஜக ஆட்சியில் உள்ள ஒரே மாநிலமாக கர்நாடகா உள்ளது. பொதுமாக தென் இந்தியாவில் மாநில கட்சிகளே கோலோச்சி வருகின்றன. தமிழ்நாட்டின் திராவிடக்கட்சிகள், ஆந்திராவின் தெலுங்கு தேசம் மற்றும் ஒய்எஸ்ஆர்
காங்கிரஸ்
, தெலங்கானாவின் சந்திர சேகரராவ் என மூன்று மாநிலங்களில் அம்மாநில கட்சிகளே கோலோச்சி வருகிறது.
அதேபோல் கேரளாவிலும், கர்நாடகாவிலும் தேசிய கட்சிகளே ஆதிக்கம் செலுத்தி வருகின்றன. கேரளாவில் மார்க்சிஸ்ட் கம்யூனிஸ்ட் மற்றும் காங்கிரஸ் என இரு துருவ அரசியல் நிகழ்ந்து வருகிறது. ஆனால் கர்நாடகாவில் பாஜக, காங்கிரஸ் உள்ளிட்ட தேசிய கட்சிகளும், குமாரசாமியின் மதச்சார்பற்ற ஜனதா தளம் ஆகிய கட்சிகளுக்கு இடையே மும்முனை போட்டி நிலவி வருகிறது.
பாஜக மற்றும் காங்கிரஸ் இடையே தான் உண்மையான போட்டி நிலவிவருகிறது. அரசு டெண்டர் எடுக்க 40 சதவிகித ஊழல், ஹிஜாப் பிரச்சனை, லிங்காயத் மற்றும் ஒக்கலிகா சமூக மக்களின் இடஒதுக்கிடு விவகாரம், வேலையில்லா திண்டாட்டம், விலை வாசி உயர்வு என பாஜகவின் பல்வேறு செயல்பாடுகள் மக்கள் மத்தியில் அதிருப்தியை ஏற்படுத்தியுள்ளதாக கூறப்படுகிறது. அதனால் இந்த முறை காங்கிரஸ் கட்சியே ஜாக்பாட் அடிக்கும் என தேர்தல் கணிப்புகள் கூறியுள்ளன.
பாஜகவிற்கு எதிரான மனநிலை மற்றும் காங்கிரஸ் கட்சியின் தேர்தல் வாக்குறுதிகள் அக்கட்சிக்கு மகத்தான வெற்றியை தரக்கூடும் என அரசியல் நிபுணர்கள் கூறுகின்றனர். தமிழ்நாட்டைப் போலவே மகளிர் இலவச பேருந்து பயணம், குடும்பத் தலைவிகளுக்கு 2 ஆயிரம் ரூபாய் உரிமை தொகை, வேலையில்லா பட்டதாரிகளுக்கு மாதம் 3 ஆயிரம், டிப்ளோமா படித்தவர்களுக்கு மாதம் ரூ.1500 மற்றும் 200 யுனிட் வரை இலவச மின்சாரம் உள்ளிட்ட காங்கிரஸ் கட்சியின் தேர்தல் வாக்குறுதிகள் தேர்தலில் எதிரொலிக்கும் என கூறப்படுகிறது.
இந்த நிலையில் தேர்தலுக்கு இடையே இன்னும் ஒரு நாள் தான் இருக்கும் நிலையில், இன்றுடன் தேர்தல் பிரச்சாரம் நிறைவடைந்துள்ளது. வெளியூரைச் சேர்ந்தவர்கள் சொந்த ஊருக்கு திரும்ப ஆணையிடப்பட்டுள்ளது. தேர்தல் பிரச்சாரம் நிறைவடையும் நிலையில் கடைசியாக மம்தா பானர்ஜி ஒரு கருத்து தெரிவித்துள்ளார். ‘‘கர்நாடகா மக்களுக்கு ஒரு வேண்டுகோள் விடுக்கிறேன். தயவுசெய்து பாஜகவிற்கு மட்டும் வாக்களித்து வெற்றி பெற வைத்துவிடாதீர்கள். பாஜக ஒரும் விஷம். உங்கள் எதிர்காலத்தை சிந்தித்து வாக்களியுங்கள்’’ என மம்தா பானர்ஜி தெரிவித்துள்ளார்.