சென்னை: Kushi First Single (குஷி ஃபர்ஸ்ட் சிங்கிள்) விஜய் தேவரகொண்டா, சமந்தா நடித்திருக்கும் குஷி படத்தின் ஃபர்ஸ்ட் சிங்கிள் என் ரோஜா நீயா பாடல் வெளியாகி ரசிகர்களிடையே வரவேற்பைப் பெற்றிருக்கிறது.
தமிழ்நாட்டை பூர்வீகமாகக் கொண்ட சமந்தா தமிழ் மட்டுமின்றி தெலுங்கிலும் வெற்றிக்கொடி நாட்டியவர். அங்கு நடித்தபோது நாகார்ஜுனாவின் மகனும், நடிகருமான நாக சைத்னயாவை காதலித்து திருமணம் செய்துகொண்டார். இருவீட்டார் சம்மதத்துடன் பிரமாண்டமாக அவர்களது திருமணம் கோவாவில் நடந்தது. மகிழ்ச்சியாக சென்றுகொண்டிருந்த அவர்களது திருமண வாழ்க்கை திடீரென பிரிவில் முடிந்தது. இருவரும் பரஸ்பரமாக விவாகரத்து பெற்று பிரிந்துவிட்டனர்.
உச்சம் சென்ற சமந்தா: திருமண வாழ்க்கை முடிந்துவிட்டதால் அது கொடுக்கும் மன அழுத்தம் காரணமாக இனி சமந்தாவால் திரைப்படங்களில் கவனம் செலுத்த முடியாது என பலரும் ஆரூடம் கூறினர். ஆனால் அவர்களது ஆரூடத்தை அடித்து நொறுக்கும்படி சமந்தா கோலிவுட், ஹாலிவுட் என றெக்கை கட்டி பறந்தார். நடிப்பு மட்டுமின்றி புஷ்பா படத்தில் ஊ சொல்றியா மாமாவுக்கு நடனமும் ஆடினார். இதனால் அவரது கரியர் கிராஃப் உச்சம் சென்றது.
சமந்தாவுக்கு வந்த நோய்: இப்படி அவரது கரியரின் கிராஃப் உச்சத்தை நோக்கி சென்றுகொண்டிருந்த சூழலில் அவருக்கு மையோசிடிஸ் எனும் அரிய வகை தோல் நோய் வந்தது. இதுகுறித்து அவரே அதிகாரப்பூர்வமாக அறிவித்தார். ரசிகர்கள் அனைவரும் அதனை கேட்டு அதிர்ச்சி அடைய; தன்னம்பிக்கை இழக்காத சமந்தா தொடர்ந்து சிகிச்சை மேற்கொண்டு தற்போது அந்த நோயிலிருந்து மீண்டிருக்கிறார்.
நடிப்பில் கவனம்: நோயிலிருந்து மீண்டிருக்கும் சமந்தா மீண்டும் முழு வேகத்தில் படங்களில் நடித்துவருகிறார். அந்தவகையில் அவர் நடித்த சாகுந்தலம் படம் அண்மையில் ரிலீஸாகி படுதோல்வியை சந்தித்தது. பத்து கோடி ரூபாய்கூட அந்தப் படம் வசூல் செய்யவில்லை என கூறப்படுகிறது. இதன் காரணமாக சமந்தாவின் கரியரில் சாகுந்தலம் பெரும் தோல்வி படமாக சேர்ந்திருக்கிறது. எனவே ஒரு ஹிட் படத்தை கொடுக்க வேண்டும் என்ற முனைப்பில் இருக்கிறார் அவர்.
சமந்தாவின் குஷி: இப்படிப்பட்ட சூழலில் ஷிவ நாராயணா எழுதி இயக்கியிருக்கும் குஷி படத்தில் சமந்தா நடித்திருக்கிறார். ஹீரோவாக நாக சைதன்யா நடித்திருக்கிறார். காதலை மையப்படுத்தி உருவாகியிருக்கும் அந்தப் படம் சமந்தாவுக்கு வெற்றிப்படமாக அமைய வேண்டும் என அவரது ரசிகர்கள் வேண்டிவருகின்றனர், படமானது செப்டம்பர் ஒன்றாம் தேதி தெலுங்கு, தமிழ் உள்ளிட்ட மொழிகளில் திரையரங்குகளில் வெளியாகவுள்ளது.
ஃபர்ஸ்ட் சிங்கிள்: இந்நிலையில் குஷி படத்தில் இடம்பெற்றிருக்கும் நா ரோஜா நுவ்வே என்ற ஃபர்ஸ்ட் சிங்கிள் பாடல் வெளியாகியிருக்கிறது. அப்துல் வஹாப் இசையமைத்திருக்கிறார். அப்பாடலானது தமிழில் என் ரோஜா நீயா என்ற வரியோடு தொடங்குகிறது. தமிழில் பாடலை மதன் கார்க்கி எழுதியிருக்கிறார். பாடல் முழுக்க முழுக்க பனிபிரதேசத்தில் படமாக்கப்பட்டுள்ளது. பாடலோடு பாடலின் மேக்கிங் வீடியோவும் இடம்பெற்றுள்ளது. இந்தப் பாடல் பக்கா மெலோடியாக இருப்பதாக ரசிகர்கள் அதனை அதிகம் பகிர்ந்துவருகின்றனர்.
விஜய் தேவரகொண்டாவுக்கு பிறந்தநாள்: இதற்கிடையே குஷி படத்தின் ஹீரோ விஜய் தேவரகொண்டா இன்று தனது 33ஆவது பிறந்தநாளை கொண்டாடுகிறார். நுவ்விலா என்ற படத்தின் மூலம் தெலுங்கு திரையுலகில் அடியெடுத்து வைத்த விஜய் தேவரகொண்டா ஆரம்பகட்டத்தில் போராட்டத்தை சந்தித்தவர். அதன் பிறகு 2017ஆம் ஆண்டு வெளியான அர்ஜுன் ரெட்டி படம் இவரை இளம் பெண்கள் மத்தியில் க்ரஷ் மெட்டீரியலாக மாற்றியது. அதேபோல் கீதா கோவிந்தம் படமும் இவருக்கு பெரும் வரவேற்பை கொடுத்தது.
அந்தப் படத்திலிருந்துதான் இவருக்கும், ராஷ்மிகாவுக்கும் கெமிஸ்ட்ரி நன்றாகவே ஒர்க் அவுட் ஆனது குறிப்பிடத்தக்கது. இவர் கடைசியாக நடித்த லைகர் படம் மோசமான விமர்சனத்தை சந்தித்த சூழலில், குஷி படம் நிச்ச்யம் ஹிட்டாகும் என்ற நம்பிக்கையில் இருக்கிறார் விஜய் தேவரகொண்டா.