சென்னை:
அடுத்த அமைச்சரவை மாற்றத்தின் முதல் குறியாக நிதியமைச்சர் பி.டி.ஆர். பழனிவேல் ராஜன் இருக்கும் நிலையில், அவருக்கு ஆதரவாக பொதுமக்கள் பலரும் கருத்து தெரிவித்து வருவது அனைவராலும் கவனிக்கப்பட்டு வருகிறது.
என்னை சர்வாதிகாரியாக மாற்றி விடாதீர்கள் என தனது கட்சியினருக்கு முதல்வர் மு.க. ஸ்டாலின் ஒருமுறை கூறியதன் உண்மைத்தன்மை இப்போதுதான் வெளிப்பட்டு வருகிறது. பொதுவெளியில் அமைச்சர்களின் நடவடிக்கைகள், துறை ரீதியாக அவர்களின் பெர்ஃபார்மன்ஸ் உள்ளிட்டவற்றை மையமாக வைத்து பல அமைச்சர்களை கட்டம் கட்டியுள்ளார் மு.க. ஸ்டாலின்.
அதில் முதலில் சிக்கியது பால்வளத்துறை அமைச்சர் நாசர். அவரை அமைச்சரவையில் இருந்து அதிரடியாக நீக்கி இருக்கிறார் ஸ்டாலின். அதேபோல, அமைச்சரவையில் டிஆர்பி ராஜா புதிதாக சேர்க்கப்பட்டிருக்கிறார். அவருக்கு தொழில்துறை வழங்கப்படலாம் என நம்பத்தகுந்த வட்டாரங்கள் தெரிவிக்கின்றன.
டார்கெட் பிடிஆர்: இந்த அமைச்சரவை மாற்றம் முதல்கட்டம்தான் என்கிறார்கள் விவரம் அறிந்தவர்கள். நாளை அல்லது நாளை மறுதினத்துக்குள் அடுத்த அமைச்சரவை மாற்றத்துக்கான ஆர்டர் வந்துவிடும் எனக் கூறப்படுகிறது. இதில் முதல் ஆளாக இருப்பவர் நிதியமைச்சர் பழனிவேல் தியாகராஜன் தான். உதயநிதி ஸ்டாலின் தொடர்பாக அவர் பேசியதாக கூறப்படும் ஆடியோ விவகாரம்தான் இதற்கு பின்னணியில் இருப்பதாக தெரிகிறது.
குவியும் ஆதரவு: அவரிடம் இருந்து நிதித்துறை பறிக்கப்பட்டு தகவல் தொழில்நுட்பத் துறை பிடிஆருக்கு வழங்கப்படும் என தகவல் வெளியாகியுள்ளது. நிதித்துறை தங்கம் தென்னரசுக்கு வழங்கப்பட வாய்ப்பு உள்ளது. இந்நிலையில், நிதியமைச்சர் பிடிஆருக்கு ஆதரவாக பொதுமக்கள் பலரும் குரல் கொடுத்து வருகின்றனர். சமூக வலைதளங்களில் அவருக்கு இருக்கும் ஆதரவை வெளிப்படையாக பார்க்கப்படுகிறது. அரசியல் சாராத பொதுமக்களிடம் இருந்தும், அரசியல் கட்சிகளை சார்ந்தவர்களிடம் இருந்தும் அவருக்கு ஆதரவு குவிந்து வருகிறது.
திறமையான நிதியமைச்சர்: இதில் கவனிக்கப்பட வேண்டிய விஷயம் என்னவென்றால், திமுகவினர் பலரும் அவருக்கு வெளிப்படையாக சப்போர்ட் செய்து கருத்து தெரிவித்து வருகிறார்கள். வெகுநாட்களுக்கு பிறகு ஒரு திறமையான நிதியமைச்சரை தமிழகம் பெற்றிருக்கிறது. கடுமையான நிதி நெருக்கடியில் சிக்கி இருக்கும் பொருளாதாரத்தை பிடிஆர் தான் மெல்ல மெல்ல மீட்டு வருகிறார். மேலும், உலக அளவில் பொருளாதார மந்த நிலையும் நிலவி வருகிறது. இதுபோன்ற சூழலில் பிடிஆரை நிதியமைச்சர் பதவியில் இருந்து நீக்குவது தமிழகத்திற்கு பெரும் பாதிப்பை ஏற்படுத்தும் என பெரும்பாலானோர் கூறி வருகின்றனர்.
பின்வாங்குவாரா மு.க. ஸ்டாலின்: அதுமட்டுமல்லாமல், பிடிஆர் மீது நடவடிக்கை எடுத்தால் அவரது ஆடியோ குறித்து பாஜகவினர் கூறுவதும் உண்மையாகிவிடும் என பலரும் தெரிவிக்கின்றனர். இதனிடையே, பிடிஆருக்கு ஆதரவாக மக்களின் குரல் ஒலிப்பது குறித்து முதல்வருக்கும் ரிப்போர்ட் சென்றுள்ளது. பிடிஆர் விஷயத்தில் முதல்வர் பின்வாங்குவாரா அல்லது தனது நடவடிக்கையில் உறுதியாக இருப்பாரா.. சில நாட்களில் தெரிந்துவிடும்.