மாநில கல்வி கொள்கை உருவாக்கம் தொடர்பாக
அரசை கடுமையாக விமர்சனம் செய்துள்ளார் டிடிவி தினகரன்.
கடந்த 2020ம் ஆண்டு தேசிய கல்வி கொள்கை அறிமுகப்படுத்தப்பட்டது. இது மறுபடியும் இந்தியாவை பின்னோக்கி இழுத்து செல்வதாகவும், குலத் தொழிலை ஊக்கப்படுத்துவதாகவும் அப்போதைய எதிர்கட்சி தலைவரும் திமுக தலைவரும் முக
கடுமையாக எதிர்த்தார். இந்த சூழலில் கடந்த 2021ம் ஆண்டு திமுக ஆட்சியை கைப்பற்றியது. தேசிய கல்வி கொள்கைக்கு மாற்றாக மாநிலக் கல்வி கொள்கை உருவாக்கப்படும் என முதல்வர் ஸ்டாலின் கூறினார்.
அதற்கு தமிழ்நாட்டு மக்களிடையே பெரும் வரவேற்பு இருந்தது. மாநில கல்வி கொள்கையை உருவாக்க பல்வேறு நிபுணர்கள் அடங்கிய குழுவும் அமைக்கப்பட்டது. இந்த சூழலில் தேசிய கல்வி கொள்கையை பின்பற்றியே மாநிலக் கல்வி கொள்கை உருவாக்க வேண்டும் என முதல்வரின் செயலாளர் உள்ளிட்ட உயரதிகாரிகள் அழுத்தம் கொடுத்ததால் மாநில கல்வி கொள்கைக்குழுவில் இருந்து பேராசிரியர் ஜவஹர் நேசன் விலகினார். இந்த விவகாரம் தமிழகத்தில் பேசு பொருளானது.
இந்த சூழலில் அமமுக பொதுச் செயலாளர் டிடிவி தினகரன் திமுக அரசை கடுமையாக விமர்சித்துள்ளார். இது குறித்து அவர் தனது ட்விட்டர் பதிவில், ‘‘மாநிலக் கல்விக் கொள்கைக்குழுவின் ஒருங்கிணைப்பாளர் பேராசிரியர் ஜவஹர் நேசன் பதவி விலகியதன் மூலம் மத்திய அரசின் கல்விக்கொள்கையை செயல்படுத்த மாட்டோம் என கூறி மாநிலக் கல்வி கொள்கை குறித்து ஆராய்வதாக திமுக அரசு மேற்கொண்ட இரட்டை வேடம் அம்பலத்துக்கு வந்திருக்கிறது.
மத்திய அரசின் தேசிய கல்விக்கொள்கை வெளியான உடன் அதற்கு எதிர்ப்பு தெரிவிப்பது போல நடித்த திமுக அரசு, சில மாதங்கள் கழித்து அதற்கு இசைவாக 10 ஆம் வகுப்பு, 12 ஆம் வகுப்புத் தேர்வு முறையில் மாற்றங்களை மேற்கொண்டபோதே அதற்கு அமமுக எதிர்ப்புத் தெரிவித்தது. மாநிலக் கல்வி கொள்கை குழுவில் இருந்து விலகியுள்ள ஜவஹர் நேசன், கார்ப்பரேட் கல்விக்கொள்கையையே மாநில கல்விக்கொள்கையாக மாற்றும்படி அதிகாரிகளைக் கொண்டு திமுக ஆட்சியாளர்கள் மிரட்டுவதால் ராஜினாமா செய்திருப்பதாகக் குற்றஞ்சாட்டியிருக்கிறார்.
தேசிய கல்விக்கொள்கை 2020-ன் அடியைப் பின்பற்றி மாநிலக் கல்விக் கொள்கையை வடிவமைக்கும் திசையில் குழு முன்னோக்கிச்சென்று கொண்டிருக்கிறது என்றும், இந்நிலை நீடித்தால், தமிழ்ச் சமூகத்தின் உயரிய விழுமியங்களுக்கு எதிராக கல்வி கொள்கையின் விளைவுகள் இருக்கும் என அஞ்சுவதாக பேராசிரியர் ஜவஹர் நேசன் கூறியிருப்பதை புறந்தள்ளி விட முடியாது.
திராவிடமாடல், மாநில சுயாட்சி, மாநில உரிமை என்று உதட்டளவில் மட்டுமே திமுக அரசு பேசி வருகிறது என்பதற்கு மற்றும் ஒரு உதாரணமாக மாநில கல்விக்கொள்கை விவகாரத்தில் திமுக அரசு செயல்பட்டு வந்திருக்கிறது என்பது வெட்டவெளிச்சமாகி இருக்கிறது. இனியும் திமுக அரசு மக்களை ஏமாற்றாமல் தேசிய கல்வி கொள்கை விவகாரத்தில் வெளிப்படையான முடிவை அறிவிக்க வேண்டும். மாநில கல்விக்கொள்கை குழுவை சீரமைத்து குழுவில் உள்ளோர் சுதந்திரமாக முடிவு எடுக்க அனுமதித்து, மக்களிடம் கொடுத்த வாக்குறுதியை நிறைவேற்ற நடவடிக்கை எடுக்க வேண்டும்’’ என தெரிவித்துள்ளார்.