ராகுல் காந்திக்கு சிறைத் தண்டனை வழங்கிய நீதிபதியின் பதவி உயர்வு செல்லாது என உச்சநீதிமன்றம் உத்தரவிட்டுள்ளது.
கடந்த 2019ம் ஆண்டு நடைபெற இருந்த மக்களவை தேர்தலுக்கு முன்னதாக, கர்நாடகா மாநிலம் கோலாருக்கு வாக்கு சேகரிக்கச் சென்ற ராகுல் காந்தி, ‘‘மோடி என்ற பெயரை வைத்தவர்கள் எல்லாம் திருடர்களாகவே இருக்கின்றார்கள்’’ என பேசினார். அதையடுத்து மோடி என்ற பெயரை பயன்படுத்தும் ஓபிசி மக்களை ராகுல் காந்தி இழிவுபடுத்தி விட்டார் என பாஜகவினர் பிரச்சாரம் செய்தனர். அதைத் தொடர்ந்து குஜராத் முன்னாள் அமைச்சர் ராகுல் காந்தி மீது சூரத் நீதிமன்றத்தில் அவமதிப்பு வழக்கு தொடர்ந்தார்.
இந்தநிலையில் 2 ஆண்டுகளாக அவமதிப்பு வழக்கு சூரத் மாவட்ட நீதிமன்றத்தி நடைபெற்று வந்தது. இத்தகைய சூழலில் கடந்த மார்ச் மாதம் ராகுல் காந்திக்கு 2 ஆண்டுகள் சிறைதண்டனை விதித்து சூரத் நீதிமன்றம் உத்தரவிட்டது. மக்களால் தேர்தெடுக்கப்பட்ட பிரதிநிதிக்கு இரண்டு ஆண்டுகள் அல்லது அதற்கு மேல் சிறைதண்டனை விதிக்கப்பட்டால், அவரை தகுதி நீக்கம் செய்ய அரசியலமைப்பு சட்டத்தில் விதிகள் உள்ளது.
அந்தவகையில் ராகுல் காந்தியின் எம்பி பதவியை பறித்து மக்களவை செயலகம் அறிவித்தது. ராகுல் காந்தியின் அரசு இல்லத்தை காலி செய்யச் சொல்லி நோட்டிஸ் வழங்கப்பட்டது. அதானி குறித்து நாடாளுமன்றத்தில் விவாதிக்க கூடாது எனவும், மோடி தலைமையிலான பாஜக அரசை விமர்சிக்கும் எதிர்கட்சிகளின் குரலை நசுக்கவே ராகுல் காந்தியின் எம்பி பதவி பறிக்கப்பட்டதாக காங்கிரஸ் உள்ளிட்ட எதிர்கட்சிகள் நாடாளுமன்ற வளாகத்தில் கடுமையான போராட்டத்தை முன்னெடுத்தன. காங்கிரஸ் கட்சியினர் நாடு முழுவதும் போராட்டத்தில் ஈடுபட்டனர்.
ராகுல் காந்தியின் எம்பி பதவி பறிக்கப்பட்டாலும், அவர் எங்கு சென்றாலும் மக்கள் கூட்டம் அலைமோதுவதை வீடியோ ஆதாரங்களுடன் காங்கிரஸ் கட்சியினர் பகிர்ந்து வருகின்றனர். உதாரணத்திற்கு கர்நாடகாவில் சட்டமன்ற தேர்தல் பிரச்சாரத்தின் போது ராகுல் காந்தியை சூழ்ந்த மக்கள் வெள்ளத்தை பார்த்து பாஜகவினர் அதிர்ந்ததையு ட்விட்டரில் காங்கிரஸார் ட்ரெண்டாக்கினர்.
அதேபோல் ராகுல் காந்திக்கு சிறை தண்டனை வழங்கிய நீதிபதி, அமித்ஷாவிற்காக வழக்காடியவர் எனவும், அவர் பாஜகவின் சித்தாந்தை உள்வாங்கியவர் எனவும் திருமாவளவன் உள்ளிட்டோர் குற்றம்சாட்டியுள்ளனர். இந்தநிலையில், ராகுல் காந்திக்கு சிறைத் தண்டனை வழங்கிய சூரத் மாவட்ட நீதிபதி எச்.எச்.வர்மா உள்பட 68 நீதிபதிகளுக்கு குஜராத் அரசு பதவி உயர்வு வழங்கியது.
ஆனால் இந்த பதவி உயர்வு செல்லாது என உச்சநீதிமன்றம் அதிரடி தீர்ப்பு வழங்கியுள்ளது. நீதிபதிகள் பதவி உயர்வுக்கு எதிரான வழக்குகள் உச்சநீதிமன்றத்தில் நிலுவையில் இருப்பதால், குஜராத் அரசால் வழங்கப்பட்ட பதவி உயர்வு என்பது செல்லுபடியாகாது என எம்.ஆர்.ஷா மற்றும் சி.டி.ரவிக்குமார் ஆகியோர் அடங்கிய அமர்வு உத்தரவிட்டுள்ளது.