தமிழகத்தில் அரசு பள்ளி ஆசிரியராக பணி நியமனம் பெறுவதற்கு டெட் எனப்படும் தகுதித் தேர்வு எழுத வேண்டும். கடந்த 2013ஆம் ஆண்டு நடத்தப்பட்ட டெட் தேர்வை எழுதிய 16 ஆயிரம் ஆசிரியர்கள் தேர்வு செய்யப்பட்டனர். ஆனால் 10 ஆண்டுகள் ஆகியும் இவர்களுக்கு பணி நியமனம் வழங்கப்படவில்லை. இதற்கிடையில் சில முறை டெட் தேர்வு எழுதி புதிதாக பலரும் தேர்ச்சி பெற்றனர். ஆனால் யாருக்கும் பணி நியமனம் என்பது வழங்கப்படவே இல்லை. மேலும் மறுநியமனத் தேர்வு முறை அறிமுகம் செய்யப்பட்டது.
ஆசிரியர்களின் எதிர்காலம்
இதனால் ஆசிரியர்கள் பெரும் கவலைக்கு ஆளாகினர். தங்களின் எதிர்காலம் கேள்விக்குறியாகி விடுமோ என அஞ்சினர். இந்நிலையில் 2013ஆம் ஆண்டு டெட் தேர்வில் தேர்ச்சி பெற்று அரசு ஆசிரியர் பணிக்காக காத்திருக்கும் நபர்கள், கடந்த 9ஆம் தேதி முதல் போராட்டத்தில் ஈடுபட முடிவு செய்தனர். அதன்படி, சென்னை நுங்கம்பாக்கத்தில் உள்ள டிபிஐ வளாகத்தில் தொடர்ந்து 5வது நாளாக ஆசிரியர்கள் உண்ணாவிரதப் போராட்டத்தில் ஈடுபட்டனர். சுமார் 500க்கும் மேற்பட்டோர் போராடி கொண்டிருந்தனர்.
டிபிஐ வளாகத்தில் போராட்டம்
அதில் 350க்கும் மேற்பட்டோர் பெண் ஆசிரியர்கள் என்பது கவனிக்கத்தக்கது. தங்களின் தொடர் போராட்டத்தால் 60க்கும் மேற்பட்டோர் வாந்தி, மயக்கம் உள்ளிட்ட உடல்நலக் குறைபாடுகள் ஏற்பட்டு மருத்துவமனையில் சிகிச்சைக்காக அனுமதிக்கப்பட்டனர். பின்னர் சிகிச்சை முடிந்ததும் மீண்டும் போராட்ட களத்திற்கு திரும்பி வந்தனர். இவர்களுக்கு ஆதரவாக அரசியல் கட்சி தலைவர்கள் பலரும் குரல் கொடுக்க ஆரம்பித்தனர்.
அரசியல் கட்சிகள் ஆதரவு
நாம் தமிழர் கட்சி சீமான், பாஜக மாநிலத் தலைவர் அண்ணாமலை, விடுதலை சிறுத்தைகள் கட்சி தலைவர் திருமாவளவன் உள்ளிட்டோர் நேரில் சென்று ஆசிரியர்களுக்கு ஆதரவு தெரிவித்தனர். சீமான் தனது அறிக்கையில், மறுநியமனத் தேர்வை ரத்து செய்வோம் என்று வாக்குறுதி அளித்த திமுக அரசு இரண்டு ஆண்டுகளை ஆன பின்னரும் அதை செய்யவில்லை.
ஆசிரியர் பணி வயது வரம்பு
இதுதொடர்பாக புதிய அரசாணை பிறப்பிக்க வேண்டும் என்றும், ஆசிரியர் பணியில் சேருவதற்கான வயது வரம்பை மீண்டும் 57ஆக உயர்த்த வேண்டும் என்றும் வலியுறுத்தினார். இந்நிலையில் வரும் 15ஆம் தேதிக்குள் ஒரு தீர்வை தமிழக அரசு அறிவிக்க வேண்டும். இல்லையெனில் ஆசிரியர்கள் உடன் பாஜகவும் கைகோர்த்து போராட்டத்தில் ஈடுபடும் என்று அண்ணாமலை தெரிவித்திருந்தார்.
அமைச்சர் பொன்முடி உறுதி
இந்நிலையில் போராட்டத்தில் ஈடுபட்டு வரும் ஆசிரியர்கள் உடன் உயர்கல்வித்துறை அமைச்சர் பொன்முடி பேச்சுவார்த்தையில் ஈடுபட்டார். அப்போது, சட்ட சிக்கலை நீக்குவது தொடர்பாக உறுதி அளித்தார். இது ஆசிரியர்களுக்கு ஆறுதலாக அமைந்த நிலையில் தங்களது போராட்டத்தை வாபஸ் பெற்றுக் கொண்டனர். விரைவில் பிரச்சினைகள் களையப்பட்டு ஆசிரியர்களுக்கு பணி நியமன ஆணை வழங்கப்படும் என எதிர்பார்க்கப்படுகிறது.