கர்நாடக தேர்தல் முடிவுகள் எக்ஸிட் போல் சொன்னதை விட ஆச்சரியப்படும் வகையில் அமைந்திருக்கிறது. மெஜாரிட்டி கிடைக்க தட்டு தடுமாறி வர வேண்டுமா? என காங்கிரஸ் நினைத்திருந்த சூழலில் அறுதி பெரும்பான்மையை கையில் கொடுத்து கர்நாடக மக்கள் திக்குமுக்காட வைத்துள்ளனர். ஒரே ஒரு சின்ன மாற்றம் தான். நேற்று நள்ளிரவு வரை காங்கிரஸ் 136 இடங்களில் வெற்றி என ஊடகங்கள் செய்தி வெளியிட்டு வந்தன.
தென்னிந்தியாவில் பாஜக அவுட்ஜெய நகர் தொகுதியில் கடைசி நேர ட்விஸ்டாக வெற்றி காங்கிரஸ் கையில் இருந்து பாஜக வசம் சென்றுள்ளது. இதனால் மொத்தமுள்ள 224 தொகுதிகளில் காங்கிரஸ் 135, பாஜக 66, மதச்சார்பற்ற ஜனதா தளம் 19, மற்றவை 4 என முடிவுகள் வெளிவந்துள்ளன. இதன்மூலம் தென்னிந்தியாவில் பாஜகவின் ஆட்சி முழுவதுமாக அகற்றப்பட்டு விட்டது. இதனை திராவிட பூமியில் மதவாதத்திற்கு இடமில்லை என்பதை மக்கள் உணர்த்தி விட்டனர் என்று கூறி பல்வேறு அரசியல் கட்சிகளும் கொண்டாடி வருகின்றனர்.
கூட்டணி பேரத்தில் சிக்கல்இந்த தேர்தல் முடிவுகள் 2024 மக்களவை தேர்தலில் தாக்கத்தை ஏற்படுத்தும் என்ற பேச்சு அடிபடுகிறது. இதற்கான வாய்ப்புகள் அதிகமிருக்கின்றன. குறிப்பாக தமிழகத்தை எடுத்து கொண்டால் அதிமுக மீது தான் கடந்த சில தேர்தல்களாக பாஜக சவாரி செய்து வந்துள்ளது. அடுத்து வரும் தேர்தலிலும் இந்த நிலை தொடரும் என இருகட்சிகளின் மேல்மட்ட தலைவர்களும் கூறுகின்றனர். எனவே சீட் பேரத்தில் அதிமுக கறார் காட்டுவதற்கான வாய்ப்பு ஏற்பட்டுள்ளது.
2019 மக்களவை தேர்தல் அளித்த பாடம்கடந்த 2019 மக்களவை தேர்தலில் அதிமுக கூட்டணியில் பாஜகவிற்கு 5 சீட்கள் கொடுக்கப்பட்டன. அதில் ஒன்றில் கூட வெற்றி பெறவில்லை. ஏன் அதிமுக கூட்டணியே வாஷ் அவுட் ஆனது. இதற்கு பாஜகவிற்கு எதிரான சிறுபான்மையின மக்களின் வாக்குகள் எதிரணிக்கு சென்றதும் ஒரு காரணமாக பார்க்கப்படுகிறது. கிட்டதட்ட பாஜக இருந்தால் சிறுபான்மையின வாக்குகளுக்கு வராது என்ற நிலை தான். இதை உணர்ந்தே அதிமுக கடந்த தேர்தலில் அக்னி பரீட்சையில் இறங்கியது.
எடப்பாடி கையில் அதிகாரம்இதன் பின்னணியில் பல்வேறு அரசியல் கணக்குகள் இருந்தன. இம்முறையும் அதற்கு சிறிதும் பஞ்சமில்லை. ஒற்றை அதிகார மையமாக உயர்ந்து நிற்கும் எடப்பாடி பழனிசாமி, நீதிமன்றம் மற்றும் தேர்தல் ஆணையத்தின் ஒப்புதலை பெற்றுவிட்டார். இரட்டை இலைக்கு கையெழுத்து போடும் அதிகாரம் இவரிடம் தான் உள்ளது. இந்த சின்னத்திற்கான மதிப்பு தமிழக மக்கள் மத்தியில் இன்னும் பரவலாக இருக்கிறது.
பாஜகவிற்கு பின்னடைவுஅதேசமயம் தமிழ் மண்ணிற்கு ஏற்ப, மதவாதம் சக்திகளுக்கு இடமளிக்காத, திராவிட சித்தாந்தத்தை ஒட்டிய அரசியலை முன்னெடுத்தால் வெற்றி நிச்சயம் என்பதில் சந்தேகமில்லை. இவை அனைத்திற்கும் பதில் சொல்லும் வகையில் தான் 2024 மக்களவை தேர்தல் வரவுள்ளது. கர்நாடக தேர்தல் முடிவுகள் பாஜகவிற்கு பின்னடைவாக அமைந்த நிலையில், இதை வைத்து எடப்பாடி தனது பிடியை இறுக்க வாய்ப்பிருக்கிறது.
அதிமுக – பாஜக கூட்டணிஏற்கனவே கொடுத்த 5 சீட்களை கொடுப்பது சிரமம். எங்கள் செல்வாக்கை நிரூபிக்க அதிக இடங்கள் தேவைப்படுகின்றன என சாக்கு போக்கு சொல்லி சீட்டை குறைக்கலாம். ஒருவேளை பாஜக சீறினால் கர்நாடகாவின் நிலையை சுட்டிக் காட்டி நெருக்கடி கொடுக்கலாம். தமிழகத்தில் அதிமுக மட்டுமே பாஜகவின் ஒற்றை நம்பிக்கையாக இருப்பதால் மேற்சொன்ன கெடுபிடிகளுக்கு உடன்படவும் வாய்ப்புகள் இருக்கின்றன. அதேசமயம் தேர்தலுக்கு இன்னும் ஓராண்டு காலம் உள்ளது. அதற்குள் அரசியல் கணக்குகள் எப்படி வேண்டுமானாலும் மாறலாம்.