கர்நாடகாவில்
வெற்றிக்கு முக்கிய காரணகர்த்தாவான சசிகாந்த் செந்தில் சமயம் தமிழுக்கு பேட்டி அளித்துள்ளார்.
கர்நாடகாவில் கடந்த மே 10ம் தேதி மொத்தம் உள்ள 224 தொகுதிகளுக்கும் ஒரே கட்டமாக தேர்தல் நடைபெற்றது. அதைத் தொடர்ந்து கடந்த 13ம் தேதி வாக்கு எண்ணிக்கை நடைபெற்று தேர்தல் முடிவுகள் அறிவிக்கப்பட்டன. அதில் ஆட்சி அமைக்க பெரும்பான்மைக்கு தேவையான 113 தொகுதிகளைக் காட்டிலும் கூடுதலாக 22 தொகுதிகளை அதாவது 135 இடங்களில் வெற்றி பெற்று காங்கிரஸ் கட்சி 1989க்கு பிறகு புதிய வரலாற்றை படைத்தது.
தென்மாநிலங்களில் பாஜக ஆட்சியில் இருந்த ஒரே மாநிலத்தையும் பறிகொடுத்தது. பல்வேறு வியூகங்களை அமைத்து பாஜக தேர்தல் பணிகளை செய்தாலும், அதையெல்லாம் முறியடிக்கும் வகையில் காங்கிரஸ் கட்சி சிறப்பாக செயல்பட்டது. இந்த சூழலில் கர்நாடக தேர்தலின் மாஸ்டர் மைண்ட், காங்கிரஸ் கட்சியின் வார் ரூம் பொறுப்பாளரான முன்னாள் ஐஏஎஸ் அதிகாரி சசிகாந்த் செந்தில், இன்று நமது சமயம் தமிழுக்கு சிறப்பு பேட்டி ஒன்றை அளித்தார். காங்கிரஸின் செயல்பாடுகள், வியூகங்கள், பாஜகவின் தந்திரங்களை முறியடித்தது உள்பட பல விஷயங்களை நம்மோடு பகிர்ந்து கொண்டார்.
பேட்டியில் சசிகாந்த் செந்தில் கூறும்போது, ‘‘சில விஷயங்களில் நாங்கள் உறுதியாக இருந்தோம். பாஜகவின் வழக்கமான வியூகங்களான சமூகங்களுக்கிடையேயான பிரிவினையை தூண்டுவது, அதன் மூலம் பெரும்பான்மை சமூகத்தை வளைப்பது, தேர்தல் நெருங்கும் சமயத்தில் பிரதமர் மோடி, அமித்ஷா உள்ளிட்ட தலைவர்கள் மாநிலத்தில் முகாமிட்டு பெருந்திரளான மக்கள் பாஜகவோடு இருப்பதாக பிம்பத்தை உருவாக்குவது உள்ளிட்ட வியூகங்களை நாங்கள் நன்கு அறிந்து செயல்பட்டோம்.
மக்களின் தற்போதை அன்றாட பிரச்சனைகளில் நாங்கள் கவனம் செலுத்தி மக்களிடம் கொண்டு சென்றோம், அது நன்றாக பலனளித்தது. 40 சதவிகித கமிஷன் அரசு உள்ளிட்ட பாஜகவின் ஊழல்களை மக்களிடம் நேரடியாக அம்பலப்படுத்தினோம். இருப்பினும் எங்களுடைய வெற்றிக்கு முக்கிய காரணமாக அமைந்ததாக நான் கருதுவது, காங்கிரஸ் கட்சியின் 5 முக்கிய வாக்குறுதிகளை ஒவ்வொரு வீட்டிற்கும் கொண்டு சென்றது தான்.
பாஜகவின் செயல்பாடுகள் தான் காங்கிரஸ் கட்சிக்கு மாபெரும் வெற்றியை தந்துள்ளது. சிறுபான்மையின மக்களால் தான் பெரும்பான்மையின மக்களுக்கு ஆபத்து என்ற மாயத்தோற்றத்தை உருவாக்கி, அச்ச உணர்வை ஏற்படுத்தி வாக்குகளை அறுவடை செய்வது தான் பாஜகவின் ஒற்றை ஃபார்முலா. அது எங்களுக்கு நன்றாக தெரிந்ததால், அதற்கு எதிரான காரணிகளை நாங்கள் முன்னிலை படுத்தினோம். மதம், சாதியை கடந்து பாஜகவிற்கு அரசியல் செய்ய வேறு எதுவும் இல்லை. கர்நாடகா தேர்தலுக்கு பிறகு மோடியின் பிம்பம் சரிவை கண்டுள்ளதாக நான் உணர்கிறேன்.
தமிழ்நாட்டில் காங்கிரஸ் கட்சியில் பிரச்சனை உள்ளது என்பதை ஒப்புக் கொள்கிறேன். அதை மீண்டும் உயிர்ப்புடன் செயல்பட வைக்க பல்வேறு பணிகளை செய்ய வேண்டியுள்ளது. தமிழகத்தில் பாஜக ஆடியோ அரசியல் செய்து வருகிறது. அதைவிட்டால் அவர்களுக்கு அரசியல் செய்வதற்கு வேறு காரணிகள் இல்லை. எதிராளியில் வியூகங்களை நன்கு உள்வாங்கி செயல்பட்டதால், காங்கிரஸ் கட்சி அபார வெற்றியை ஈட்டியுள்ளோம்’’ என தெரிவித்தார்.