சென்னையில் இன்று செய்தியாளர்களிடம் பேசிய மின்துறை அமைச்சர் செந்தில் பாலாஜி, தமிழகத்தில் கடந்த இரண்டு ஆண்டுகளாக சிறப்பான முறையில் மின்சாரத் துறை செயல்பட்டு வந்துள்ளது. புகார்கள் பாதியளவிற்கு கீழே குறைந்திருக்கின்றன. இதையும் முழுவதுமாக குறைக்க அரசு பல்வேறு நடவடிக்கைகளை எடுத்து வருகிறது. தமிழகத்தில் கடந்த 45 நாட்களில் மின் தேவை 19,387 மெகாவாட்டாக அதிகரித்துள்ளது.
சென்னையின் மின்சார தேவை
இது கடந்த காலங்களை விட சுமார் 3 ஆயிரம் மெகாவாட் உயர்வாகும். ஒருநாள் சராசரி மின் தேவை 423 மில்லியன் யூனிட்டாக அதிகரித்துள்ளது. இவ்வளவு பாதிப்புகள் இருந்தாலும் கூட மாநிலம் முழுவதும் சீரான மின் விநியோகம் வழங்கப்பட்டிருக்கிறது. சென்னையில் கடந்த சில நாட்களாக மின்சார பிரச்சினை சற்று அதிகமாக இருந்தது. நேற்று குறைக்கப்பட்டது. இன்று முழுவதுமாக குறைக்க அறிவுறுத்தப்பட்டுள்ளது.
மின் தேவை அதிகரிப்பு
எங்கெல்லாம் ஓவர் லோடு இருக்கிறதோ, அதையும் சரிசெய்ய நடவடிக்கை எடுத்து வருகிறோம் என்று கூறினார். தமிழகத்தில் இரவு 8 மணியில் இருந்து நள்ளிரவு 12 மணி வரை மின் தேவை அதிகமிருக்கிறது. சென்னையில் மட்டும் மின்சாரம் 3,850 மெகாவாட் தேவைப்படுகிறது. இதை சமாளிக்க தயாராக இருக்கிறோம். வடசென்னை அனல்மின் நிலையத்தில் மூன்றாவது அலகில் அடுத்த ஆண்டு பணிகள் தொடங்கும்.
அதிமுக ஆட்சியில் பிரச்சினை
புதிய அலகுகள் உற்பத்தியை தொடங்கும் போது நமது மாநிலத்தின் தேவையை நம்மாலேயே பூர்த்தி செய்ய முடியும் என்றார். கடந்த அதிமுக ஆட்சியில் மின் துறையில் சரியான முறையில் வேலை செய்யவில்லை. குறிப்பாக கொரோனா நெருக்கடி காலத்தில் அப்படியே விட்டு விட்டனர். இதை சரிசெய்வதற்கு கால அவகாசம் தேவைப்பட்டது. இதன் வெளிப்பாடு மின் தட்டுப்பாடாக தெரிந்திருக்கலாம்.
தடையற்ற மின்சாரம்
திமுக ஆட்சிக்கு வந்தாலே மின்வெட்டு என்று பொதுவாக பேசக்கூடாது. கடந்த ஆட்சியிலும் மின் வெட்டு, மின் தடை ஏற்பட்டிருக்கிறது. அதை புத்தகமாகவே போட்டு வைத்துள்ளேன். வேண்டுமெனில் தருகிறேன். அதனை படித்து பார்த்துவிட்டு இந்த ஆட்சியில் எப்படி இருக்கிறது என ஒப்பிட்டு அதன்பிறகு கேள்வி எழுப்புங்கள் எனத் தெரிவித்தார். மின்வெட்டு, மின் தடை இரண்டிற்கு வித்தியாசம் உள்ளது.
மின்வெட்டு என்பது தமிழ்நாடு மின்சார வாரியத்தில் தேவைக்கு ஏற்ப மின்சார உற்பத்தி இல்லை, கொள்முதல் இல்லை. அதனால் ஏற்படும் இடைவெளி என்று சொல்லலாம். மின் தடை என்பது நிர்வாகம் சார்பில் பராமரிப்பு பணிகள், பழுது பார்க்கும் பணிகளுக்காக ஏற்படுவது. இவை இரண்டையும் ஒப்பிட்டு பார்த்து செய்தித்தாள்கள் சரியான செய்தியை வெளியிட வேண்டும் என்று அமைச்சர் செந்தில் பாலாஜி கேட்டுக் கொண்டார்.