கிருஷ்ணகிரி:
கிருஷ்ணகிரியில் நடைபெற்ற ஒரு சம்பவம் பெரும் அதிர்வலைகளை ஏற்படுத்தி இருக்கிறது. பாண்டிய நாடு திரைப்படத்தில் வருவதை போல தனது மகனை கொலை செய்தவனை பக்காவாக ஸ்கெட்ச் போட்டு தீர்த்துக் கட்டியிருக்கிறார் ஒரு தந்தை. என்ன நடந்தது.. பார்க்கலாம்.
கிருஷ்ணகிரி மாவட்டம் ஓசூர் அருகே உள்ள சொப்பட்டி கிராமத்தைச் சேர்ந்தவர் திலக் (22). கடந்த 12-ம் தேதி தனது நண்பர்களுடன் டீக்கடையில் அமர்ந்து டீ குடித்துக் கொண்டிருந்தார். அப்போது அங்கு மோட்டார் சைக்கிளில் வந்த 4 பேர் திடீரென கத்தி, அரிவாளை எடுத்து திலக்கையும், அவரது நண்பர்களையும் தாக்க தொடங்கினர்.
இதில் மற்றவர்கள் தப்பிவிட திலக் மட்டும் மாட்டிக் கொண்டார். இதையடுத்து, திலக்கை அந்த கும்பரல் சரமாரியாக வெட்ட, சம்பவ இடத்திலேயே அவர் உயிரிழந்தார்.
ஜாமீனில் வெளியே வந்தவர்:
கிருஷ்ணகிரியில் பெரும் பரபரப்பை ஏற்படுத்திய இந்தக் கொலை சம்பவம் தொடர்பாக போலீஸார் வழக்கு பதிவு செய்து விசாரணை நடத்தி வந்தனர். ஆனால், பெரிதாக எந்த துப்பும் கிடைக்கவில்லை. அப்போதுதான், கடந்த 2022-ம் ஆண்டு மோகன் என்ற இளைஞரை கொலை செய்த சம்பவத்தில் திலக்குக்கு தொடர்பு இருந்தது தெரியவந்தது. இந்த வழக்கில் அண்மையில்தான் ஜாமீனில் வெளியே வந்திருக்கிறார் திலக்.
போலீஸ் சந்தேகம்:
இதனால் மோகனின் கொலைக்கு பழிவாங்கும் விதமாக திலக் கொல்லப்பட்டிருக்கலாம் என்ற சந்தேகம் போலீஸாருக்கு வந்தது. இதன்பேரில், மோகனின் நண்பர்களிடம் முதலில் போலீஸார் விசாரணை நடத்தினர். ஆனால் அவர்களுக்கு இந்தக் கொலையில் தொடர்பு இல்லை என்பது தெரியவந்தது. இதனைத் தொடர்ந்து, மோகனின் தந்தை திம்மராயப்பனிடம் போஸீஸார் விசாரணை மேற்கொண்டனர்.
தந்தையிடம் விசாரணை:
இதில் அவர் முன்னுக்கு பின் முரணாக பதிலளிக்கவே, சந்தேகமடைந்த போலீஸார் அவரிடம் கிடுக்கிப்பிடி விசாரணை நடத்தினர். அப்போது அவர் அளித்த வாக்குமூலம் போலீஸாரையே அதிர்ச்சி அடையச் செய்தது. போலீஸாரிடம் அவர் கூறியதாவது: எனது மகன் மோகன் மிகவும் நல்ல பையன். படித்து முடித்து புதிதாக வேலையில் சேர்ந்திருந்தான். வார விடுமுறை அன்று நண்பர்களுடன் சேர்ந்து கிரிக்கெட் விளையாடுவான்.
மகனின் கொலைக்கு பழிதீர்க்க..
அப்படி ஒரு நாள் கிரிக்கெட் விளையாடும் போது அவர்களுக்குள் தகராறு ஏற்பட்டுள்ளது. இதில் எனது மகனை 6 பேர் சேர்ந்து கிரிக்கெட் மட்டையால் அடித்துக் கொலை செய்தனர். என் மகனை கொலை செய்துவிட்டு என் கண் முன்னே அவர்கள் சுற்றுவதை என்னால் தாங்கிக்கொள்ள முடியவில்லை.
வாக்குமூலம் – கைது:
அதனால் குதிரைப்பாளையத்தை சேர்ந்த சசிகுமார் என்பவருக்கு ரூ.2 லட்சம் கொடுத்து என் மகனை கொலை செய்தவர்களை கொலை செய்யுமாறு கூறினேன். ஆனால் அன்று திலக் மட்டும் மாட்டிக் கொண்டான்” என திம்மராயப்பன் வாக்குமூலம் அளித்தார். இதையடுத்து, திம்மராயப்பன் மற்றும் கொலைக்கு உடந்தையாக இருந்தவர்களை போலீஸார் கைது செய்தனர்.