சென்னை:
கோடைக்காலத்தில் கேன் தண்ணீரின் தேவை அதிகரித்திருக்கும் நிலையில், அதன் தரம் குறித்தும், அதில் சேர்க்கப்படும் பொருட்கள் குறித்தும் கேள்வியெழும்பி இருக்கிறது. இந்நிலையில், சென்னையில் உணவுப்பாதுகாப்புத் துறை அதிகாரிகள் இந்த கேன் தண்ணீர் கடைகளில் இன்று அதிரடியாக சோதனை நடத்தினர். இந்த ஆய்வின் போது அதிகாரிகளே அதிர்ச்சியில் உறைந்தனர்.
ஒருகாலத்தில் வீட்டுக்கு வீடு குழாய்களில் வரும் ஆற்றுத் தண்ணீர் அல்லது மெட்ரோ தண்ணீரையும் தான் நாம் குடித்து வந்திருக்கிறோம்.
சில சமயங்களில் அதனை சுட வைத்து காய்ச்சும் பருகி இருக்கிறோம். அப்பொழுதெல்லாம் உடல் ஆரோக்கியத்தில் எந்தப் பிரச்சினையும் இல்லாமல்தான் இருந்தது.
பயமுறுத்தும் கேன் தண்ணீர்: இந்த சூழலில்தான், சரியாக 15 வருடங்களுக்கு முன்பு ஒரு பிரச்சாரம் செய்யப்பட்டது. அதாவது நாம் குடிக்கும் தண்ணீர் சுகாதமற்றது என்றும், சுத்திகரிக்கப்பட்ட கேன் தண்ணீரே நல்லது எனவும் கூறப்பட்டது. இதையடுத்து, அப்போது அறிமுகமான கேன் தண்ணீரை அனைவரும் வாங்கிக் குடிக்க ஆரம்பித்தார்கள். ஆற்று தண்ணீருடன் ஒப்பிடுகையில், இதை பார்க்க சுத்தமாக இருப்பதால் கேன் தண்ணீருக்கு பெரும்பாலான மக்கள் மாறினர். தற்போது கேன் தண்ணீர் இல்லாத வீடே இல்லை என்ற நிலை வந்துவிட்டது.
கெமிக்கல்கள் சேர்ப்பு:
இந்நிலையில்தான், இந்த கேன் தண்ணீர் குறித்து தற்போது சில பகீர் விஷயங்கள் வந்து கொண்டிருக்கின்றன. நிலத்தடி நீரை எடுத்து அதை சுத்திகரிக்கிறோம் என்ற பெயரில் பல கெமிக்கல்களையும், சுவையூட்டிகளையும் சிலர் அதில் சேர்ப்பது தெரியவந்துள்ளது. இது உடலுக்கு மிகவும் ஆபத்தானது என்றும், கொஞ்சம் கொஞ்சமாக பல பாதிப்புகளை ஏற்படுத்தும் எனவும் மருத்துவர்கள் எச்சரிக்கின்றனர்.
தொடரும் ஆய்வு:
மேலும், பொதுமக்களிடம் இருந்தும் கேன் தண்ணீர் தொடர்பாக பல புகார்கள் வரவே, உணவுப் பாதுகாப்புத்துறை அதிகாரிகள் தற்போது களத்தில் குதித்திருக்கின்றனர். தமிழகம் முழுவதும் பல்வேறு மாவட்டங்களில் கேன் தண்ணீரின் தரம் சோதிக்கப்படுகிறது. இந்த ஆய்வில் கெமிக்கல் உள்ளிட்டவை கலக்கப்படுவது தெரியவந்தால் உடனடியாக அந்கக் கடைக்கும், அதனை விநியோகிக்கும் தொழிற்சாலைக்கும் சீல் வைக்கப்படுகிறது.
சென்னையில் சோதனை:
அந்த வகையில், இன்று சென்னையில் பல்வேறு இடங்களில் கேன் தண்ணீர் கடைகளிலும், தொழிற்சாலைகளிலும் உணவு பாதுகாப்புத்துறை அதிகாரிகள் அதிரடி சோதனை மேற்கொண்டனர். கொண்டிதோப்பு, அரும்பாக்கம் உள்ளிட்ட பகுதிகளிலும் உள்ள கேன் தண்ணீர் தயாரிக்கும் தொழிற்சாலைகளில் சோதனை நடத்தப்பட்டது.
நோட்டீஸ்:
அப்போது ஐஎஸ்ஐ தரச்சான்று இல்லாமல் கேன் தண்ணீரை விற்ற 6 கடைகளுக்கு விளக்கம் கேட்டு நோட்டீஸ் அனுப்பப்பட்டது. இந்தக் கடைகளில் விற்பனை செய்யப்படும் கேன் தண்ணீர் மாதிரிகளும் தரச்சோதனைக்கு அனுப்பப்பட்டன. இதில் தரமில்லாத குடிநீர் எனக் கண்டறியப்பட்டால் அந்தக் கடைகளுக்கும், கேன் தண்ணீரை விநியோகம் செய்த தொழிற்சாலைகளுக்கும் சீல் வைக்கப்படும் என அதிகாரிகள் தெரிவித்தனர்.