மும்பை:
10 ஆயிரம் அடிக்கு மேலே விமானம் பறந்து கொண்டிருந்த போது கதவை திறக்குமாறு கூறி அராஜகம் செய்த பயணியால் ஏர் இந்தியா விமானமே 7 மணிநேரமாக திக்குமுக்காடிய சம்பவம் பெரும் பரபரப்பை ஏற்படுத்தி இருக்கிறது.
சமீபகாலமாக விமானத்தில் நடைபெறும் சம்பவங்களை பார்க்கும் போது, அச்சம் மேலோங்குவதை தவிர்க்க முடியவில்லை. கஷ்டப்பட்டால் கூட பரவாயில்லை ரயிலிவோ, பஸ்ஸிலோ கூட சென்றுவிடலாம்.. விமானம் வேண்டாம் என்கிற எண்ணம்தான் ஏற்படுகிறது.
சக பெண் பயணி மீது போதை ஆசாமி சிறுநீர் கழித்தது; விமானத்துக்குள் இளைஞர் சிகரெட் பிடித்தது, நடுவானில் விமானத்தின் அவசரக் கதவை திறந்தது என ஏதோ திகில் படம் பார்ப்பது போன்ற உணர்வைதான் சமீபகாலமாக வரும் செய்திகள் தந்து கொண்டிருக்கின்றன.
ஏர் இந்தியா விமானம்:
அந்த வகையில், நேற்று நடந்த சம்பவம் இன்னும் மோசமனதாக இருந்திருக்கிறது. அமெரிக்காவின் நேவார்க் நகரில் இருந்து மும்பைக்கு ஏர் இந்தியா விமானம் (AI – 144) நேற்று மதியம் 12.30 மணிக்கு புறப்பட்டிருக்கிறது. விமானம் புறப்பட்ட சுமார் ஒரு மணிநேரத்தில் முதல் வகுப்பில் பயணம் செய்த 70 வயது மதிக்கத்தக்க நபர் ஒருவர் திடீரென அலறினார். விமானம் உயரத்துக்கு செல்ல செல்ல அவருக்கு பய உணர்வு அதிகரித்து பதற்றம் உண்டாகி இருக்கிறது.
கதவை திற..
நான் இறங்கனும்.. பதற்றம் அதிகரிக்கவே, அவர் பயங்கரமாக கத்த தொடங்கினார். இதனால் விமானப் பயணிகள் அதிர்ச்சியில் உறைந்தனர். பின்னர் அவர் கத்திக்கொண்டே விமானத்தில் அங்குமிங்கும் ஓடினார். ஒருகட்டத்தில், விமானத்தின் கதவை திறக்குமாறு கூறி ரகளையில் ஈடுபட ஆரம்பித்தார். அவர் மூர்க்கத்தனமாக இருப்பதை பார்த்த பயணிகள், எங்கே இவர் அவசரக்கதவை திறந்துவிடுவாரோ என பயப்பட தொடங்கினர். “விமானம் 10 ஆயிரம் அடிக்கு மேலே பறந்து கொண்டிருக்கிறது. இப்போது எப்படி கதவை திறப்பது. பேசாமல் உட்காருங்கள்” விமானக் குழுவினர் சற்று அதட்டலாக கூறியுள்ளனர்.
கழுத்து நெரிப்பு:
இதனால் மேலும் ஆத்திரமடைந்த அவர், தனது மனைவியின் கழுத்தை கடுமையாக நெரிக்கத் தொடங்கினார். நிலைமையின் விபரீதத்தை உணர்ந்த விமானக் குழுவினரும், சில பயணிகளும் அவரை மடக்கிப் பிடித்து ஓரிடத்தில் உட்கார வைத்தனர். 6 அடி உயரத்தில் ஆஜானுபாகுவாக இருந்ததால் அவரை எளிதில் பிடித்து வைக்க முடியவில்லை.
ஊசி போட்ட டாக்டர்கள்:
இதையடுத்து, விமானத்தில் பயணம் செய்த இரண்டு மருத்துவர்கள், அந்த நபருக்கு பதற்றத்தை குறைக்கும் ஊசியை போட்டனர். இதனால் பதற்றம் தணிந்து அவர் கண் அயர்ந்தார். பின்னர் விமானம் பத்திரமாக மும்பையில் தரை இறங்கியது. பதற்றத்தில் பயணி செய்த செயலால் 7 மணிநேரம் மற்ற பயணிகள் அலறியபடியே வந்துள்ளனர். இதுகுறித்து அவரது மனைவி கூறுகையில், “அவருக்கு விமானப்பயணம் என்றால் பதற்றம் ஆகிவிடுவார். இந்த பதற்றத்தை தணிப்பதற்காக மாத்திரையை வைத்திருந்தார். ஆனால், அவர் அதை உட்கொள்ளாததால் பதற்றம் அதிகரித்திருக்கிறது.