திமுக 2021ஆம் ஆண்டு ஆட்சியமைக்க தயாரான போதே புதிய தலைமைச் செயலகமாக ஓமந்தூரார் பன்னோக்கு மருத்துவமனை செயல்படுமா என்கின்ற கேள்விகள் வலம் வரத் தொடங்கின. கொரோனா காலத்தில் ஜார்ஜ் கோட்டையில் இட நெருக்கடி நிலவிய போது கலைவானர் அரங்கிற்கு சட்டசபை நடவடிக்கைகள் மாற்றப்பட்டன. அப்போதும் ஓமந்தூரார் மருத்துவமனை குறித்த பேச்சு எழுந்தது.
சமீபத்தில் நடந்து முடிந்த பட்ஜெட் கூட்டத்தொடரிலும் புதிய சட்டமன்றம் குறித்த கோரிக்கைகள் எழுந்தன. அப்போது பேசிய மூத்த அமைச்சர் துரைமுருகன், “ராஜ் பவன் இடத்தை புதிய சட்டமன்றம் கட்ட பயன்படுத்தலாம், கிண்டி ரேஸ் கோர்ஸ் இடத்தை பயன்படுத்தலாம்” என்று தனது யோசனையை முன்வைத்தார்.
சட்டசபைக்காக பிரத்யேகமாக வடிவமைக்கப்பட்டு கட்டப்பட்டதை அரசியல் காழ்ப்புணர்ச்சி காரணமாக பன்னோக்கு மருத்துவமனையாக ஜெயலலிதா மாற்றினார் என அப்போதே எதிர்ப்புகள் கிளம்பின. தற்போதும் 25 சதவீத இடங்களே மருத்துவமனையாக பயன்படுத்தப்படுகிறது என்றும் மீதமுள்ள இடங்கள் பயன்படுத்தப்படவில்லை என்றும் கூறப்படுகிறது.
ஆனால் ஓமந்தூராா் அரசு பல்நோக்கு மருத்துவமனையை மீண்டும் தலைமைச் செயலகமாக மாற்றும் திட்டமில்லை என்றும், அது மருத்துவமனையாகவே தொடா்ந்து செயல்பட முதல்வா் அறிவுறுத்தியுள்ளாா் என்றும் மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்துள்ளார்.
சென்னை கிண்டியில் புதிதாக ரூ.230 கோடியில் பல்நோக்கு உயா் சிறப்பு மருத்துவமனையை தமிழக அரசு கட்டியுள்ளது.அந்த மருத்துவமனையை வரும் ஜூன் 5-ஆம் தேதி குடியரசுத் தலைவா் திரௌபதி முா்மு திறந்து வைக்கவுள்ளாா். இதனிடையே, அண்ணாசாலையில் செயல்படும் ஓமந்தூராா் அரசு பல்நோக்கு உயா் சிறப்பு மருத்துவமனை கிண்டிக்கு மாற்றப்பட இருப்பதாகவும், ஓமந்தூராா் வளாகத்தில் பழையபடி தலைமைச் செயலகம் செயல்படவுள்ளதாகவும் தகவல்கள் வெளியாகி வருகின்றன.
இது குறித்து விளக்கமளித்த அமைச்சர் மா.சுப்பிரமணியன், “அரசு பல்நோக்கு உயா் சிறப்பு மருத்துவமனையாக செயல்படும் கட்டடம் தலைமைச் செயலகத்துக்காக கட்டப்பட்டது. கடந்த ஆட்சியாளா்கள் காழ்ப்புணா்சியால் அதனை மருத்துவமனையாக மாற்றினாா்கள்.ஆனால், முதல்வா் மு.க.ஸ்டாலின் பரந்த மனதோடு, அது மருத்துவமனையாகவே தொடா்ந்து செயல்பட விருப்பம் தெரிவித்தாா்.மேலும், மருத்துவமனையில் அதிநவீன கருவிகளை வாங்கி கொடுத்து, புதிய சிகிச்சை முறைகளையும் தொடங்கி வைத்தாா்” என்று கூறியுள்ளார்.