2000 ரூபாய் நோட்டுக்களை திரும்ப பெறுவதாக மத்திய ரிசர்வ் வங்கி நேற்று இரவு அறிவித்தது. மக்கள் தங்களிடம் உள்ள 2000 ரூபாய் நோட்டுக்களை வரும் செப்டம்பர் மாதம் 30 ஆம் தேதி வரை மாற்றிக்கொள்ளலாம் என்றும் தெரிவித்துள்ளது. ஏற்கனவே 2016 ஆம் ஆண்டு இதுபோன்ற ஒரு அறிவிப்பை வெளியிட்டார் பிரதமர் மோடி.
அப்போது 500 மற்றும் 1000 ரூபாய் நோட்டுக்கள் செல்லாது என அறிவித்தார். இதனால் மக்கள் மிகுந்த சிரமத்திற்கு ஆளானார்கள். வங்கிகளில் நீண்ட நேரம் வரிசையில் நின்று தங்களின் பணத்தை மாற்றினர். இந்நிலையில் தற்போதும் அப்படி ஒரு அறிவிப்பு வெளியாகியுள்ளது.
ஆனால் இம்முறை 2000 ரூபாய் நோட்டு மட்டும்தான் செல்லாது என அறிவிக்கப்பட்டுள்ளது நிம்மதியை மக்களுக்கு சற்று நிம்மதியை கொடுத்துள்ளது. காரணம், சாமானிய மக்கள் மத்தியில் 2000 ரூபாய் நோட்டுக்களின் புழக்கம் இல்லை. இதனால் 2000 நோட்டுக்களை வைத்திருக்கும் பணக்காரர்கள் பாதிக்கப்படுவார்கள்.
இந்நிலையில் 2000 ரூபாய் நோட்டுக்களை திரும்ப பெறும் முடிவுக்கு டெல்லி முதல்வர் அரவிந்த் கெஜ்ரிவால் கண்டனம் தெரிவித்துள்ளார். இதுதொடர்பாக பிரதமர் மோடியையும் அரவிந்த் கெஜ்ரிவால் காட்டமாக விமர்சித்துள்ளார். இதுகுறித்து அரவிந்த் கெஜ்ரிவால் பதிவிட்டுள்ள டிவிட்டில், முதலில் 2000 ரூபாய் நோட்டுகளை கொண்டு வந்தால் ஊழல் ஒழியும் என்றார்கள். இப்போது 2000 நோட்டுகளை தடை செய்தால் ஊழல் ஒழிந்துவிடும் என்கிறார்கள்.
அதனால்தான் நாங்கள் சொல்கிறோம், பிரதமர் படித்தவராக இருக்க வேண்டும். படிக்காத பிரதமரிடம் யார் வேண்டுமானாலும் என்ன வேண்டுமானாலும் சொல்லலாம். அவருக்கு எதுவும் புரியாது. பொதுமக்கள் அவதிப்பட வேண்டும்” என அரவிந்த் கெஜ்ரிவால் இந்தி மொழியில் டிவிட்டியுள்ளார். அரவிந்த் கெஜ்ரிவால் பிரதமரை இப்படி காட்டமாக விமர்சித்திருப்பதற்கு பாஜகவினர் கடும் கண்டனம் தெரிவித்து வருகின்றனர்.