தமிழ் சினிமாவில் 20-வது ஆண்டைக் கொண்டாடுகிறார் `ஜெயம்’ ரவி. படங்களில் காதலாக இருந்தாலும், ஆக்ஷனாக இருந்தாலும் குழந்தைகளுடன், குடும்பத்துடன் காணும் படியான கதைகளை தேர்ந்து எடுத்து நடித்து வரும் நாயகன்.
`பொன்னியின் செல்வன் 2′ வெற்றிக்குப் பின், அஹமத் இயக்கத்தில் நடித்த `இறைவன்’ வெளியாகக் காத்திருக்கிறது. இப்போது கிருத்திகா உதயநிதி இயக்கத்தில் கமிட் ஆகியிருப்பதாகத் தகவல்கள் வெளிவர அவரது அடுத்தடுத்த படங்களின் லைன் அப்கள் குறித்து விசாரித்தேன்.
`ஜெயம்’ ரவியின் கைவசம் இப்போது அரை டஜன் படங்கள் இருக்கின்றன. ஆனாலும் அவரைப் பொறுத்தவரையில் ஒரு படத்தை முடித்துக் கொடுத்துவிட்டே அடுத்த படத்தில் நடிப்பார். `பொன்னியின் செல்வன்’ முடித்துவிட்டு, `அகிலன்’ ஆக மாறினார். அதை முடித்துவிட்டு `இறைவன்’ படப்பிடிப்பிற்குள் வந்தார்.
`மனிதன்’, `என்றென்றும் புன்னகை’ அஹமத் இயக்கத்தில் நயன்தாராவுடன் நடித்திருக்கும் `இறைவன்’ ஜூலை 14ல் வெளியாகிறது.
`இரும்புத்திரை’, `விஸ்வாசம்’ படங்களுக்கு வசனம் எழுதிய அந்தோணி பாக்யராஜ் இயக்குநராக அறிமுகமாகும் ‘சைரன்’ படத்தில் நடித்து முடித்திருக்கிறார். கீர்த்தி சுரேஷ், அனுபமா பரமேஸ்வரன் நடிக்கின்றனர்.
இதற்கிடையே ‘சிவா மனசுல சக்தி’ ராஜேஷ் எம். இயக்கத்தில் நடித்து வரும் படத்திற்கு இன்னமும் தலைப்பு வைக்கப்படவில்லை. இது ஜெயம் ரவியின் 30வது படமாகும். பிரியங்கா மோகன் நடித்து வருகிறார். `இறைவன்’ படத்திற்கு பின் இந்தப் படம் வெளியாகும் என்று இதனையடுத்தே ‘சைரன்’ திரைக்கு வரும் என்றும் சொல்கிறார்கள்.
அடுத்து `வேல்ஸ்’ ஐசரி கணேஷ் தயாரிப்பில் புதுமுக இயக்குநர் ஒருவரின் படத்தில் கமிட் ஆகியிருக்கிறார். இது பேன்டஸி படம் என்றும், பெரிய பட்ஜெட்டில் ரெடியாகும் என்கிறார்கள். இதனையடுத்தே, கிருத்திகா உதயநிதியின் படத்திற்கு வருகிறார்.
`வணக்கம் சென்னை’ படத்தை இயக்கிய கிருத்திகா, மீண்டும் ஒரு முழு நீள காதல் கதையை இயக்குகிறார். ஜெயம் ரவியின் ஜோடியாக நித்யா மேனன் நடிக்கிறார். ஏ.ஆர்.ரஹ்மான் அல்லது அனிருத் இவர்களிடம் பேசி வருகிறார்கள். அக்டோபரில் இதன் படப்பிடிப்பு இருக்கும் எனத் தகவல்.
தவிர, சென்ற வருடத்தில் நடித்து, முற்றுபெறாமல் இருக்கும் `ஜன கண மன’ படத்தில் ரவியின் ஜோடி டாப்ஸி. பெரும்பகுதி படப்பிடிப்பு முடிந்த நிலையில் டாப்ஸி இந்தியில் பிஸியானார். அவரது போர்ஷனை இந்தாண்டு எடுத்துவிடும் திட்டத்தில் இருப்பதால், அந்தப் படமும் ரவியின் லைன் அப்பில் இருக்கிறது.
இந்த கமிட்மென்ட்டுகள் முடிந்த பிறகே, மோகன் ராஜா இயக்கும் ‘தனி ஒருவன் 2’ படத்திற்கு வருவார் என்கிறார்கள்.