டேராடூன்: பாஜக நிர்வாகி தனது மகளை முஸ்லிம் இளைஞருக்கு மகளை திருமணம் செய்து வைப்பதற்கு இந்துத்வா அமைப்புகள் கடும் எதிர்ப்பு தெரிவித்தனர். இந்த எதிர்ப்புக்கு பணிந்து மகளின் திருமணத்தை ஒத்திவைப்பதாக உத்தரகாண்ட் பாஜக நிர்வாகி தெரிவித்துள்ளார்.
உத்தரகாண்ட் மாநிலத்தில் உள்ள பவ்ரி ஹர்வால் மாவட்டத்தின் பவ்ரி நகராட்சியின் தலைவராக யஷ்பால் பேனம் என்பவர் உள்ளார். பாஜக பிரமுகரான இவரது மகள் இஸ்லாமிய மதத்தை சேர்ந்த இளைஞர் ஒருவரை காதலித்தார். மகளின் விருப்பத்திற்கு தடை ஏதும் விதிக்காத யஷ்வல் பேனம், மாப்பிள்ளை வீட்டில் பேசி திருமணத்திற்கு ஏற்பாடு செய்தார்.
இதன்படி வரும் 28 ஆம் தேதி திருமணம் நடத்த முடிவு செய்தது. திருமணத்திற்கான முன்னேற்பாடுகள் எல்லாம் தடல் புடலாக மேற்கொள்ளப்பட்டு வந்தது. திருமணத்திற்கான அழைப்பிதழ்களையும் அச்சிட்டு உறவினர்கள் நண்பர்கள், கட்சி நண்பர்களுக்கு என கொடுத்து திருமணத்திற்கு வந்து மணமக்களை வாழ்த்த வேண்டும் என்று அழைத்து வந்தார்.
இந்த நிலையில், கடந்த சில தினங்களுக்கு முன்பாக இணையத்தில் இந்த திருமண அழைப்பிதழ் பரவியது. பாஜக பிரமுகரின் மகளுக்கு இஸ்லாமிய மதத்தை சேர்ந்த மணமகனுக்கு திருமணம் செய்து கொடுப்பதா? என பல இந்து அமைப்புகள் கடும் எதிர்ப்பு தெரிவித்தனர். யஷ்பால் பேனத்தின் உருவ பொம்மையையும் எரித்து சில அமைப்புகள் போராட்டம் நடத்தின.
குறிப்பாக விஷ்வ இந்து பரிஷத், பைரவ் சேனா, பஜ்ரங் தள் உள்ளிட்ட அமைப்புகள் கடும் எதிர்ப்பு தெரிவித்து போராட்டத்தை நடத்தின. இத்தகைய திருமணத்தை நாங்கள் கடுமையாக எதிர்க்கிறோம் என்றும் விஷ்வ இந்து பரிஷத் அமைப்பின் மாவட்ட தலைவர் கூறியிருந்தார். அதேபோல், சமூக வலைத்தளங்களிலும் ஒரு தரப்பினர் விமர்சித்து கருத்துக்களை கூறி வந்தனர்.
சிலர் ஆதரவாகவும் கருத்துக்களை கூறி வந்தனர். உத்தரகாண்டில் இந்த விவகாரம் பேசுபொருளான நிலையில், எதிர்ப்புகளுக்கு பயந்து தனது மகளின் திருமணத்தை தள்ளி வைப்பதாக யஷ்பல் பேனம் தெரிவித்துள்ளார். இது தொடர்பாக செய்தியாளர்களுக்கு பேட்டி அளித்த யஷ்பல் பேனம், தனது மகளின் மகிழ்ச்சிக்காக முஸ்லீம் இளைஞருக்கு திருமணம் செய்து கொடுக்க சம்மதம் தெரிவித்தேன்.
ஆனால், இந்த திருமணத்திற்கு சமூக வலைதளங்களில் இருந்து எதிர்ப்பு கிளம்பியது. எனவே, திருமணத்தை தள்ளி வைத்துள்ளேன். தற்போது பொதுமக்களின் குரலுக்கும் மதிப்பு கொடுத்து இருக்கிறேன்” என்றார்.