சென்னை:
பாஜகவில் இருந்து மட்டுமல்லாமல் அரசியலில் இருந்தே சில காலம் ஒதுங்கி இருந்த கே.டி. ராகவன், அடுத்த மாஸ் ரீ என்ட்ரிக்கு தயாராகி வருவதாக தகவல்கள் தெரிவிக்கின்றன. பாஜக தலைவர் அண்ணாமலையிடம் இருந்தும் இதற்கு கிரீன் சிக்னல் கிடைத்திருப்பதே இதற்கு காரணம் எனக் கூறப்படுகிறது.
தமிழக பாஜகவில் மிகுந்த செல்வாக்கையும், டெல்லி தலைவர்களிடம் மிகவும் நெருக்கமான உறவையும் பாராட்டி வந்தவர் கே.டி. ராகவன். பாஜக மாநில பொதுச்செயலாளராகவும் அவர் பதவி வகித்து வந்தார். இந்த நிலையில்தான், கடந்த 2021-ம் ஆண்டு ஒரு வீடியோ வெளியாகி கே.டி. ராகவனின் அரசியல் வாழ்க்கையை முடக்கிப் போட்டது.
தமிழகம் மட்டுமல்லாமல் இந்தியா முழுவதுமே இந்த வீடியோ பரவி பெரும் அதிர்வலைகளை ஏற்படுத்தியது. அதன் தொடர்ச்சியாக, கே.டி. ராகவன் தனது பதவியை ராஜினாமா செய்தார். தொலைக்காட்சி விவாத நிகழ்ச்சிகளில் பாஜக சார்பில் கலந்துகொள்வது, கமலாலய நிகழ்ச்சிகளில் முதல் வரிசையில் இருப்பது என லைம் லைட்டில் இருந்து வந்த கே.டி. ராகவனை கடந்த 2 ஆண்டுகளாக பொதுவெளியில் பார்க்கவே முடியவில்லை.
அண்ணாமலைக்கு வந்த அழைப்பு:
இந்த சூழலில்தான், அவர் ரீ என்ட்ரிக்கு தயாராவதற்கான சமிக்ஞைகள் தென்பட தொடங்கியுள்ளன. தனது வீட்டு கிரகபிரவேசத்திற்கு வந்து சிறப்பிக்குமாறு பாஜக மாநிலத் தலைவர் அண்ணாமலைக்கு கே.டி. ராகவன் அழைப்பு விடுத்திருந்தார். திங்கள்கிழமை (மே 22) இந்த நிகழ்ச்சி நடைபெறவுள்ளது. பெயர் கெட்டுப்போனதால் கே.டி. ராகவனின் அழைப்பை அண்ணாமலை ஏற்க மாட்டார் என்றே பாஜக வட்டாரங்கள் தெரிவித்து வந்தன.
கே.டி. ராகவனுடன் சந்திப்பு:
ஆனால் அனைவரையும் ஆச்சரியப்படுத்தும் விதமாக, கே.டி. ராகவனின் புதிய இல்லத்திற்கு நேற்று அதிரடியாக சென்றார் அண்ணாமலை. அவரிடமும், அவரது குடும்பத்தினரிடமும் மகிழ்ச்சி பொங்க பேசிய அண்ணாமலை, அவர்களுக்கு வாழ்த்துகளையும் தெரிவித்தார். மேலும், கே.டி. ராகவன் வீட்டுக்கு சென்ற புகைப்படங்களையும் தனது ட்விட்டர் பக்கத்தில் ஷேர் செய்துள்ளார் அண்ணாமலை. அண்ணாமலையின் இந்த செயலுக்காக கே.டி. ராகவனும் மனப்பூர்வமாக நன்றி தெரிவித்துள்ளார்.
அண்ணாமலை ப்ளான்:
இந்நிலையில், இந்த நிகழ்வானது கே.டி. ராகவன் மீண்டும் பாஜகவுக்குள் ரீ என்ட்ரி கொடுப்பதற்கான சிக்னல்தான் என்று கமலாலய வட்டாரங்கள் தெரிவிக்கின்றன. தற்போது தமிழக பாஜகவிலேயே அண்ணாமலைக்கு எதிராக சில கோஷ்டிகள் செயல்பட்டு வருவதாக கூறப்படுகிறது. இதனால் தற்போது தனக்கு ஆதரவான ஆட்களை திரட்டும் பணியில் அண்ணாமலை ஈடுபட்டு வருவதாக கட்சியின் இரண்டாம் கட்ட தலைவர்கள் சிலர் தெரிவிக்கின்றனர்.
மாஸ் ரீ என்ட்ரி:
மேலும், தனக்கு சாதகமாக டெல்லி மேலிடத்தில் பேசவும், தகவல்களை பரிமாறவும் ஒரு நம்பகமான நபர் அண்ணாமலைக்கு தேவைப்படுகிறாராம். இந்தப் பின்னணியில்தான், கே.டி. ராகவனின் இல்லத்திற்கு அண்ணாமலை சென்றிருப்பதாக தகவல்கள் வெளியாகியுள்ளன. இதனால் விரைவில் கே.டி. ராகவன் தமிழக பாஜகவுக்குள் மீண்டும் வருவார் என நம்பத்தகுந்த வட்டாரங்கள் தெரிவிக்கின்றன.