சர்வதேச ஸ்குவாஷ் போட்டி 2023, சென்னையில் 13.06.2023 முதல் 17.06.2023 வரை நடைபெறுகிறது. இந்த போட்டி தொடர்பான செய்தியாளர்கள் கூட்டம் சென்னை கன்னிமாரா ஹோட்டலில் இன்று நடைபெற்றது. இந்த கூட்டத்தில் செய்தியாளர்களுடன் கலந்துரையாடல் நடத்திய இளைஞர் நலன் மற்றும் விளையாட்டு மேம்பாட்டுத் துறை அமைச்சர்
பேசிம்போது, ‘‘2023 SDAT-WSF ஸ்குவாஷ் உலகக் கோப்பையை ஜூன் 13 முதல் ஜூன் 17 வரை நடத்த விளையாட்டு நகரமான சென்னை தயாராகி வருகிறது.
தமிழ்நாடு அரசின் நிதியுதவியுடன் நடைபெறும் இந்த போட்டி, உலகெங்கிலும் உள்ள சிறந்த ஸ்குவாஷ் வீரர்களை ஒன்றிணைப்பது மட்டுமல்லாமல் கோப்பையினை வெல்ல நமது வீரர்களுக்கு வாய்ப்பு கிடைத்துள்ளது என நான் நம்புகிறேன். 2023 ஸ்குவாஷ் உலகக் கோப்பையில் போட்டியை நடத்தும் இந்தியாவுடன் ஹாங்காங், சீனா, ஜப்பான், மலேசியா, எகிப்து, தென்னாப்பிரிக்கா, ஆஸ்திரேலியா மற்றும் கொலம்பியா ஆகிய எட்டு நாடுகளை சேர்ந்த தலைசிறந்த ஸ்குவாஷ் வீரர்கள் பங்கேற்கின்றனர்.
நமது ரசிகர்கள் தங்கள் சொந்த அணியை ஆதரிக்கவும், உலகத் தரம் வாய்ந்த ஸ்குவாஷ் விளையாட்டைக் காணவும் வாய்ப்பைப் பெறுவார்கள். தேசிய சாம்பியன்களான அபய் சிங் மற்றும் ஜோஷ்னா சின்னப்பா (19 முறை தேசிய சாம்பியன்) மற்றும் வரவிருக்கும் ஆசிய விளையாட்டுப் போட்டிகளில் இந்தியாவைப் பிரதிநிதித்துவப்படுத்தும் தன்வி கண்ணா ஆகியோருடன், தற்போது உலகத் தரவரிசையில் 19வது இடத்தில் உள்ள இந்தியக் குழுவை சவுரவ் கோசல் வழிநடத்துவார்.
2023 சென்னை ஸ்குவாஷ் ஸ்குவாஷ் உலகக் கோப்பை WORLDS QUASH.TV (உலகம் முழுவதும்) மற்றும் ஒலிம்பிக் சேனலில் நேரடியாகவும், இலவசமாகவும் ஒளிபரப்பப்படும். 2023 SDAT – WSF SQUASH உலகக் கோப்பை ஸ்குவாஷின் உணர்வைக் கொண்டாடும் உலகம் முழுவதும் உள்ள வீரர்கள் மற்றும் ரசிகர்களை ஒன்றிணைக்கும் ஒரு மறக்க முடியாத நிகழ்வாக இந்த போட்டிகள் இருக்கும். ஸ்குவாஷ் நட்சத்திரங்கள் போட்டியிடுவதால், இந்த தீவிர போட்டியினை காண சென்னை மட்டுமல்ல உலகமே தயாராக உள்ளது. இந்த உற்சாகத்தை ஜூன் 13 முதல் ஜூன் 17 வரை ஒன்று சேர்ந்து அனைவரும் நேரடியாக அனுபவிக்கலாம்.
மாணவர்கள் மற்றும் இளைஞர்கள் விளையாட்டுத் துறையில் முன்னேற்றம் பெற வேண்டும் என்ற அடிப்படையில் செஸ் ஒலிம்பியாட், சர்வதேச மகளிர் டென்னிஸ் நடத்தப்பட்டுள்ளது. அந்த வகையில் மேலும் சிறப்பு செய்யும் விதமாக “முதலமைச்சர் கோப்பை” போட்டிகள் மாநிலம் முழுவதும் தமிழ்நாடு விளையாட்டு மேம்பாட்டு ஆணையம் மூலம் வெற்றிகரமாக நடத்தப்பட்டு வருகிறது. வருகின்ற நாட்களில் சர்வதேச அளவிலான ஹாக்கி மற்றும் ஸ்குவாஷ் போட்டிகள் நடத்தப்படவுள்ளன’’ என அவர் கூறினார்.