சென்னை:
வெளிநாடுகளுக்கு தமிழ்நாட்டை அடிமையாக்குவதற்காக முதல்வர் மு.க. ஸ்டாலின் பயணம் மேற்கொண்டிருப்பதாக நாம் தமிழர் கட்சி தலைமை ஒருங்கிணைப்பாளர்
தெரிவித்துள்ளார்.
அந்நிய முதலீடுகளை ஈர்ப்பதற்காகவும், வெளிநாடுகள் இங்கு தொழில் நிறுவனங்களை தொடங்குவதற்காகவும் தமிழக முதல்வர் மு.க. ஸ்டாலின் சிங்கப்பூர் பயணம் மேற்கொண்டுள்ளார். இன்று சிங்கப்பூருக்கு சென்றுள்ள முதல்வர் ஸ்டாலின் அந்நாட்டின் தொழிலதிபர்களை சந்தித்து பேசினார். தமிழ்நாட்டில் தொழில் தொடங்க சிங்கப்பூர் நிறுவனங்கள் முன்வர வேண்டும் என்றும் அவர் அழைப்பு விடுத்தார்.
சிங்கப்பூரில் இன்றும், நாளையும் நடைபெறும் நிகழ்ச்சிகளில் கலந்துகொள்ளும் ஸ்டாலின், நாளை மறுதினம் ஜப்பான் சென்று அங்குள்ள தொழிலதிபர்களை சந்தித்து ஆலோசனை நடத்தவுள்ளார். இதனிடையே, முதல்வரின் வெளிநாட்டு பயணத்தை எதிர்க்கட்சிகள் விமர்சித்து வருகின்றன. ஸ்டாலின் இன்பச் சுற்றுலா சென்றிருப்பதாக அதிமுக பொதுச்செயலாளர் எடப்பாடி பழனிசாமி கடுமையாக தாக்கி பேசினார்.
இந்நிலையில், முதல்வரின் வெளிநாட்டுப் பயணம் குறித்து சீமானிடம் செய்தியாளர்கள் கேள்வியெழுப்பினார். அதற்கு பதிலளித்து அவர் கூறியதாவது:
இந்தியாவில் எத்தனை மாநிலங்கள் இருக்கிறது.. இத்தனை மாநிலங்களில் எந்த முதலைமைச்சர் வெளிநாடுகளுக்கு பயணம் செய்து அந்நிய முதலீடுகளா ஈர்த்திருக்கிறார்? பினராயி விஜயன் போயிருக்கிறாரா, உம்மன் சாண்டி போயிருக்கிறாரா, ஜெகன்மோகன் ரெட்டி போயிருக்கிறாரா, நவீன் பட்நாயக் போயிருக்கிறாரா? யாரும் செல்லவில்லையே. அப்படியென்றால் அவர்களின் மாநிலங்களில் வெளிநாடுகள் முதலீடு செய்யவில்லையா?
இதற்கு முன்பு துபாய் உள்ளிட்ட அரபு நாடுகளுக்கு ஸ்டாலின் சென்றாரே.. அதற்கு பின்னர் தமிழ்நாட்டுக்கு எவ்வளவு முதலீடு ஈர்க்கப்பட்டது? வெளிநாடுகளுக்கு சென்று தயவுசெய்து எங்க ஊருக்கு வாங்க என கெஞ்சி கூப்பிடும் அளவுக்குதான் தமிழ்நாடு இருக்கிறது. அப்படிதானே.. அன்றைக்கு கப்பலில் வர்த்தகம் செய்ய வந்தவர்களை (ஆங்கிலேயர்கள்) எதிர்த்து போராடினீர்கள். கேட்டால் விடுதலைப் போராட்டம் என்றீர்கள். இப்போது வானூர்திகளில் வந்து வர்த்தகம் செய்ய வாருங்கள் வாருங்கள் எனக் கூப்பிடுகிறீர்கள்.
அன்று பிரிட்டிஷ் என்ற ஒரு நாட்டுக்கு அடிமையாக இருந்தோம். இன்று ஏராளமான நாடுகளுக்கு அடிமையாக வேண்டும் என துடிக்கிறீர்கள். இதுக்கு பெயர்தான் சுதந்திரமா? சரி.. இப்போ வெளிநாட்டு முதலீட்டாளர்கள் வந்துவிட்டார்கள் என வைத்துக் கொள்வோம். அவர்கள் எதில் முதலீடு செய்வார்கள்? முதலீடு செய்பபவர்களின் தேவை என்ன? லாபம். அவர்கள் லாபம் ஈட்டுவதற்காக எவ்வளவு நிலத்தை வேண்டுமானாலும் எடுத்துக் கொள்ளுங்கள் என அரசாங்கம் சொல்லும். அவர்கள் விரைந்து சரக்குகளை கொண்டு செல்ல 4 வழிச்சாலையை 8 வழிச்சாலையை விவசாய நிலத்தை அழித்து போடுவீர்கள்.
இதில் எங்கள் மண்ணுக்கும், எங்கள் மக்களுக்கும் என்ன லாபம்? வேலைவாய்ப்பு கிடைக்கும் என்று சொல்வீர்கள். இப்போது தமிழ்நாட்டில் இருக்கும் தனியார் நிறுவனங்களில் எத்தனை சதவீதம் தமிழர்கள் வேலை செய்கிறார்கள்? அரசாங்கத்தால் புள்ளி விவரங்களுடன் வெள்ளை அறிக்கை கொடுக்க முடியுமா? இது எல்லாம் உங்களுக்கே நாடகமாக தெரியவில்லையா? என சீமான் கேள்வியெழுப்பினார்.